ஐபிஎல்லில் எம்.எஸ். தோனியைப் பார்க்க ஆயிரக்கணக்கான ரசிகர்கள் மைதானத்திற்கு வருகிறார்கள். அவர் பேட்டிங் செய்ய களத்தில் இறங்கும்போது, ரசிகர்களின் மகிழ்ச்சிக்கு எல்லையே இல்லை. ஆனால் கடந்த சில சீசன்களாக தோனியின் பேட்டிங் வரிசை கேள்விக்குறியாகவே உள்ளது. அவர் மிகவும் தாமதமாக பேட்டிங் ஆர்டரில் கடையாக வருகிறார். கடைசி ஓவர்களில் மட்டுமே களமிறங்குகிறார். ஆர்சிபிக்கு எதிரான போட்டியிலும் இதே நடந்தது. இது ரசிகர்களுக்குப் பிடிக்கவில்லை. ரசிகர்களைத் தவிர, முன்னாள் இந்திய தொடக்க வீரர் வீரேந்தர் சேவாக் உட்பட பல முன்னாள் கிரிக்கெட் வீரர்களும் இது குறித்து கேள்விகளை எழுப்பினர்.
ஆர்சிபி அணிக்கு எதிராக 197 ரன்கள் என்ற இலக்கை துரத்தும் போது, தோனி 9வது இடத்தில் பேட்டிங் செய்ய வந்தார். ஆச்சரியமான விஷயம் என்னவென்றால், அவருக்கு முன் அஸ்வின் பேட்டிங் செய்ய அனுப்பப்பட்டார். அந்த நேரத்தில் தேவையான ரன் விகிதம் சுமார் 15 ஆக இருந்தது. சிஎஸ்கே வேகமாக ரன்கள் எடுக்க வேண்டியிருந்தது. அதன் பிறகு ரசிகர்கள் சமூக ஊடகங்களில் மிகுந்த கோபமடைந்தனர். தோனி சீக்கிரமே பேட்டிங் செய்ய வர வேண்டும் என்று எல்லோரும் எதிர்பார்க்கின்றனர். இந்நிலையில், கிரிக்பஸ் நிகழ்ச்சியில் தோனியின் பேட்டிங் வரிசை குறித்து வீரேந்திர சேவாக்கிடம் கேள்வி கேட்கப்பட்டபோது, அவர் கிண்டலான முறையில் பதிலளித்தார்.
தோனியின் பேட்டிங் ஆர்டரைப் பற்றி வீரேந்திர சேவாக் கூறுகையில், ‘தோனி சீக்கிரமாக வந்தார்… அவர் வந்தபோது, 16 ஓவர்கள் விளையாடப்பட்டிருந்தன. வழக்கமாக அவர் 19வது அல்லது 20வது ஓவரில் வருவார். இந்த முறை அவர் சீக்கிரமாக வந்துவிட்டார். அவர் சீக்கிரமாக வந்தாரா? அல்லது அவர்களது அணி பேட்ஸ்மேன்கள் சீக்கிரமாக விக்கெட்டுகளை இழந்ததால் வந்தாரா?” என கேள்வி எழுப்பி இருந்தார். வீரேந்தர் சேவாக்கின் இந்த கருத்து இப்போது சமூக ஊடகங்களில் வைரலாகி வருகிறது.
வீரேந்தர் சேவாக்கைத் தவிர, முன்னாள் இந்திய கிரிக்கெட் வீரர் இர்பான் பதானும் தோனியின் முடிவில் அதிருப்தி அடைந்ததாகத் தெரிகிறது. இர்ஃபான் பதான் தனது அதிகாரப்பூர்வ எக்ஸ் பதிவில், ‘தோனி 9வது இடத்தில் பேட்டிங் செய்வதை நான் ஒருபோதும் ஆதரிக்க மாட்டேன். இது அணிக்கு சரியானதல்ல’ என்று எழுதினார். இந்தப் போட்டியில் 9வது இடத்தில் பேட்டிங் செய்த தோனி, 16 பந்துகளில் 187.50 ஸ்ட்ரைக் ரேட்டில் ஆட்டமிழக்காமல் 30 ரன்கள் எடுத்தார். அதில் 3 பவுண்டரிகள் மற்றும் 2 சிக்சர்கள் அடங்கும். இந்நிலையில், தோனி பேட்டிங் வரிசையில் முன்பே களமிறங்கி விளையாடி இருந்தால், முடிவு வேறு மாதிரியாக இருந்திருக்கும்.