ஊழியர்களின் வருங்கால வைப்பு நிதி அமைப்பான EPFO, பி.எப். சந்தாதாரர்களின் வசதிக்காகப் புதிய வாட்ஸ்-அப் சேவையை அறிமுகப்படுத்தியுள்ளது. இதன் மூலம் இனி பி.எப். கணக்கின் இருப்புத் தொகையைச் சரிபார்க்கவும், பாஸ்புக் விவரங்களைப் பார்க்கவும் அதிகாரப்பூர்வ இணையதளத்திற்குச் செல்ல வேண்டிய அவசியமில்லை. பதிவு செய்யப்பட்ட செல்போன் எண்ணிலிருந்து வாட்ஸ்-அப் மூலம் ஒரு செய்தி அனுப்பினாலே தேவையான விவரங்களைப் பெறலாம்.
புதிய வசதியைத் தொடங்கி வைத்த மத்திய அமைச்சர்:
மத்திய தொழிலாளர் மற்றும் வேலைவாய்ப்புத் துறை அமைச்சர் மன்சுக் மாண்டவியா, EPFO-வின் 74-வது நிறுவன நாள் கொண்டாட்டத்தின்போது இந்தப் புதிய வசதியைத் தொடங்கி வைத்தார்.
இந்தச் சேவையின் மூலம் சந்தாதாரர்கள் தங்களது பி.எப். கணக்கின் தற்போதைய இருப்புத் தொகை, பாஸ்புக் விவரங்கள் மற்றும் கடைசியாக நடைபெற்ற 5 பணம் செலுத்துதல் அல்லது பணம் எடுத்தல் பரிவர்த்தனைகளின் விவரங்களை வாட்ஸ்-அப் மூலமாகவே தெரிந்துகொள்ள முடியும்.
செயல்படாத கணக்குகளில் உள்ள பணத்தைப் பெறவும் புதிய வசதி:
வாட்ஸ்-அப் சேவையுடன், நீண்டகாலமாகச் செயல்படாமல் இருக்கும் பி.எப். கணக்குகளில் உள்ள பணத்தைப் பெறுவதற்கும் EPFO எளிய நடைமுறையை அறிமுகப்படுத்தியுள்ளது.
அதன்படி, பழைய அல்லது செயல்படாத பி.எப். கணக்குகளில் ரூ.1,000 வரை இருப்புத் தொகை வைத்திருப்பவர்கள், அதனைப் பெறுவதற்குத் தனியாக விண்ணப்பப் படிவம் சமர்ப்பிக்க வேண்டியதில்லை.
சந்தாதாரரின் அடையாளம் மற்றும் வங்கிக் கணக்கு விவரங்கள் சரிபார்க்கப்பட்டிருந்தால், EPFO தானாகவே அந்தத் தொகையைச் சம்பந்தப்பட்டவரின் வங்கிக் கணக்கிற்கு மாற்றும்.
இந்த நடவடிக்கையின் மூலம் சுமார் ஒரு லட்சம் செயல்படாத கணக்குகளுக்குத் தீர்வு காணப்பட உள்ளது. இந்தக் கணக்குகளில் சுமார் ரூ.5 கோடி உரிமை கோரப்படாத தொகையாக உள்ளது.
ரூ.32 லட்சம் கோடி நிதியை நிர்வகிக்கும் EPFO:
EPFO தற்போது 8 கோடிக்கும் அதிகமான செயலில் உள்ள உறுப்பினர்களைக் கொண்டுள்ளது. சுமார் ரூ.32 லட்சம் கோடி மதிப்பிலான நிதியை நிர்வகித்து வருகிறது.
தொழிலாளர்களுக்குப் பயனளிக்கும் வகையில் புதிய தொழில்நுட்பங்களைப் பயன்படுத்திச் சேவைகளை மேம்படுத்த வேண்டும் என்றும், நடைமுறைகளை டிஜிட்டல் மயமாக்கி வெளிப்படைத்தன்மையை அதிகரிக்க வேண்டும் என்றும் மத்திய அமைச்சர் அதிகாரிகளுக்கு அறிவுறுத்தியுள்ளார்.
வாட்ஸ்-அப்பில் பி.எப். பேலன்ஸ் பார்ப்பது எப்படி?
பி.எப். கணக்குடன் இணைக்கப்பட்டுள்ள பதிவு செய்யப்பட்ட செல்போன் எண்ணிலிருந்து கீழ்க்கண்ட வழிமுறைகளைப் பின்பற்ற வேண்டும்.
1. வாட்ஸ்-அப் எண்ணுக்கு செய்தி அனுப்பவும்:
முதலில், உங்கள் பி.எப். கணக்குடன் இணைக்கப்பட்டுள்ள மொபைல் எண்ணிலிருந்து +91 87964 41800 என்ற EPFO-வின் வாட்ஸ்-அப் எண்ணுக்கு ‘Hi’ என்று செய்தி அனுப்ப வேண்டும்.
2. மொழியைத் தேர்வு செய்யவும்:
உடனடியாக மொழியைத் தேர்வு செய்வதற்கான செய்தி வரும். அதில் உங்களுக்குப் பிடித்த மொழியைத் தேர்வு செய்ய வேண்டும்.
3. தேவையான சேவையைத் தேர்வு செய்யவும்:
அடுத்ததாக, அனைத்து சேவைகளையும் பார்க்கும் வசதி கிடைக்கும். அதில் பி.எப். இருப்புத் தொகை, கடைசி 5 பரிவர்த்தனைகள், பி.எப். பாஸ்புக் பதிவிறக்கம், மொழியை மாற்றுதல் உள்ளிட்ட விருப்பங்கள் காட்டப்படும்.
4. ஓடிபி எண்ணைப் பதிவு செய்யவும்:
பி.எப். இருப்புத் தொகையை அறிய விரும்பினால், அதற்கான விருப்பத்தைத் தேர்வு செய்ய வேண்டும். தொடர்ந்து, பதிவு செய்யப்பட்ட மொபைல் எண்ணுக்கு ஓடிபி (OTP) அனுப்பப்படும். அந்த எண்ணைப் பதிவு செய்தவுடன் உங்கள் பி.எப். கணக்கில் உள்ள இருப்புத் தொகை காட்டப்படும்.
சில நிமிடங்களில் பி.எப். விவரங்கள்!
இதேபோல், முதன்மை மெனுவுக்குச் சென்று பாஸ்புக் விவரங்களைப் பதிவிறக்கம் செய்யவும், கடைசி 5 பரிவர்த்தனைகள் குறித்த தகவல்களைப் பெறவும் முடியும்.
இதுவரை பி.எப். இணையதளத்திற்குச் சென்று உள்நுழைந்து, ஓடிபி பெற்று, பல்வேறு நடைமுறைகளுக்குப் பிறகு இருப்புத் தொகையைச் சரிபார்க்க வேண்டிய நிலை இருந்தது. தற்போது வாட்ஸ்-அப் மூலமாகவே இந்த விவரங்களைப் பெறும் வசதி அறிமுகப்படுத்தப்பட்டுள்ளது.
கூகுளின் புதிய Gemini 4 Carbon AI முதலிடம் பிடித்தது! AI திறனாய்வு தரவரிசையில் புதிய சாதனை