அருண் விஜய் நடிக்கும் ரெட்ட தல படத்தின் புதிய அறிவிப்பு வெளியாகி உள்ளது.
தமிழ் சினிமாவில் முன்னணி நடிகர்களில் ஒருவரான அருண் விஜய் கடைசியாக ‘வணங்கான்’ திரைப்படத்தில் நடித்திருந்தார். அடுத்தது இவர், தனுஷின் ‘இட்லி கடை’ திரைப்படத்தில் முக்கிய கதாபாத்திரத்தில் நடித்துள்ளார். இப்படம் வருகின்ற அக்டோபர் 1ஆம் தேதி திரைக்கு வர இருக்கிறது. இதற்கிடையில் இவர், ரெட்ட தல எனும் படத்தில் நடித்துள்ளார். கிரிஷ் திருக்குமரன் இந்த படத்தை இயக்க பிடிஜி யுனிவர்சல் நிறுவனம் இதனை தயாரித்துள்ளது. சாம். சி.எஸ் இதற்கு இசையமைத்திருக்கிறார். ஆக்ஷன் கலந்த ஜானரில் உருவாகும் இந்த படத்தில் அருண் விஜய் இரட்டை வேடங்களில் நடிக்க அவருடன் இணைந்து சித்தி இத்னானி, தான்யா ரவிச்சந்திரன், பாலாஜி முருகதாஸ் ஆகியோர் முக்கிய கதாபாத்திரங்களில் நடித்துள்ளனர். 
இந்த படத்தின் படப்பிடிப்புகள் ஏற்கனவே நிறைவடைந்து படத்திலிருந்து அடுத்தடுத்த போஸ்டர்களும், டீசரும் வெளியாகி ரசிகர்களை வெகுவாக கவர்ந்துள்ளது. தடம் படத்திற்கு பிறகு அருண் விஜய் இந்த படத்தில் இரட்டை வேடங்களில் நடித்திருப்பதால் இப்படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. அதே சமயம் இந்த படம் இந்த ஆண்டு இறுதிக்குள் ரிலீஸாகும் என எதிர்பார்க்கப்படுகிறது. இந்நிலையில் படக்குழு புதிய அறிவிப்பு ஒன்றை வெளியிட்டுள்ளது. அதன்படி இன்று (செப்டம்பர் 16) மாலை 6.30 மணி அளவில் இதன் முதல் பாடல் குறித்த அப்டேட் வெளியாகும் என அறிவிக்கப்பட்டுள்ளது.