19 வயதுக்கு உட்பட்டோருக்கான ஆசிய கோப்பை கிரிக்கெட் தொடரில், ஐக்கிய அரபு அமீரக அணியை 70 ரன்கள் வித்தியாசத்தில் வீழ்த்தி இந்திய அணி அபார வெற்றி பெற்றுள்ளது. இந்தப் போட்டியில் இந்திய அணியின் தொடக்க வீரர் ஆர்யவீர் சேவாக் அதிரடியாக 160 ரன்கள் குவித்து அனைவரது கவனத்தையும் ஈர்த்தார்.
ஆர்யவீர் சேவாக் அதிரடி ஆட்டம்!
ஓமனில் நடைபெற்று வரும் 19 வயதுக்கு உட்பட்டோருக்கான ஆசிய கோப்பை கிரிக்கெட் தொடரின் குரூப் ஏ பிரிவில் இந்தியா – ஐக்கிய அரபு அமீரக அணிகள் மோதின. இப்போட்டியில் டாஸ் வென்ற ஐக்கிய அரபு அமீரக அணி முதலில் பந்துவீச்சைத் தேர்வு செய்தது.
இதையடுத்து முதலில் பேட்டிங் செய்த இந்திய அணி, நிர்ணயிக்கப்பட்ட 50 ஓவர்களில் 7 விக்கெட் இழப்பிற்கு 309 ரன்கள் குவித்தது.
இந்திய அணியின் தொடக்க வீரராகக் களமிறங்கிய ஆர்யவீர் சேவாக், தொடக்கம் முதலே நிதானமாகவும் அதிரடியாகவும் விளையாடினார். 168 பந்துகளை எதிர்கொண்ட அவர், 17 பவுண்டரிகள் மற்றும் 7 சிக்ஸர்களுடன் 160 ரன்கள் விளாசினார்.
அவருக்கு சிறப்பான ஒத்துழைப்பு அளித்த வி.கே. வினீத் 69 பந்துகளில் 67 ரன்கள் எடுத்தார். இருவரும் இணைந்து இரண்டாவது விக்கெட்டுக்கு 193 ரன்கள் சேர்த்து இந்திய அணியின் ஸ்கோரை வலுப்படுத்தினர்.
310 ரன்கள் இலக்கு: UAE தோல்வி!
இதையடுத்து 310 ரன்கள் எடுத்தால் வெற்றி என்ற இலக்குடன் களமிறங்கிய ஐக்கிய அரபு அமீரக அணி, இந்திய அணியின் பந்துவீச்சை எதிர்கொள்ள முடியாமல் தடுமாறியது.
50 ஓவர்கள் முடிவில் அந்த அணி 239 ரன்கள் மட்டுமே எடுத்தது. இதன்மூலம் இந்திய அணி 70 ரன்கள் வித்தியாசத்தில் வெற்றி பெற்று அசத்தியது.
அரையிறுதிக்கு முன்னேறிய இந்தியா!
இந்த வெற்றியின் மூலம் குரூப் ஏ பிரிவில் இந்திய அணி இரண்டாவது இடத்தைப் பிடித்து அரையிறுதிக்கு முன்னேறியுள்ளது. இதே பிரிவில் பாகிஸ்தான் அணியும் அரையிறுதிக்குத் தகுதி பெற்றுள்ளது.
குரூப் பி பிரிவில் ஆப்கானிஸ்தான் மற்றும் வங்கதேச அணிகள் அரையிறுதிக்குத் தகுதி பெற்றுள்ளன.
முந்தைய போட்டியில் பாகிஸ்தானிடம் தோல்வியடைந்த இந்திய அணி, இந்த வெற்றியின் மூலம் மீண்டும் வெற்றிப் பாதைக்குத் திரும்பியுள்ளது. குறிப்பாக, ஆர்யவீர் சேவாக்கின் அபாரமான 160 ரன்கள் இந்திய அணிக்கு மிகப்பெரிய பலமாக அமைந்துள்ளன.
டெஸ்ட் கிரிக்கெட்டில் இருந்து ஓய்வு பெறுவதாக முகமது ஷமி அறிவிப்பு – 13 ஆண்டு கால பயணம் நிறைவு!