ஜனநாயகன் படத்தின் முக்கிய அப்டேட் வெளியாகியுள்ளது.
விஜயின் 69 ஆவது படமாக உருவாகி வரும் திரைப்படம் தான் ‘ஜனநாயகன்’. இந்த படத்தை ஹெச். வினோத் இயக்க கே.வி.என் ப்ரொடக்ஷன்ஸ் நிறுவனம் படத்தை தயாரிக்கிறது. அனிருத் இதன் இசையமைப்பாளராகவும், சத்யன் சூரியன் இதன் ஒளிப்பதிவாளராகவும் பணியாற்றுகின்றனர். படத்தில் விஜயுடன் இணைந்து பூஜா ஹெக்டே, பாபி தியோல், மமிதா பைஜூ, பிரகாஷ்ராஜ், கௌதம் மேனன், பிரியாமணி, நரேன் ஆகியோர் முக்கிய கதாபாத்திரங்களில் நடித்துள்ளனர்.
ஏற்கனவே இந்த படத்தின் படப்பிடிப்புகள் முழுவதும் நிறைவடைந்த நிலையில் தற்போது பின்னணி வேலைகள் நடைபெற்று வருகிறது. அதே சமயம் வருகின்ற டிசம்பர் 27ஆம் தேதி மலேசியாவில் இதன் இசை வெளியீட்டு விழாவை நடத்த படக்குழு திட்டமிட்டுள்ளது. இதற்கிடையில் இந்த படத்தில் இருந்து அடுத்தடுத்த அப்டேட்டுகள் வெளியாகி ரசிகர்களை உற்சாகப்படுத்தி வருகிறது. அந்த வகையில் ‘தளபதி கச்சேரி’ பாடல் வெளியாகி ரசிகர்களை ஆட்டம் போட வைத்துள்ளது. அடுத்தது இதன் 2வது பாடல் வருகின்ற டிசம்பர் 4ஆம் தேதி வெளியாகும் என எதிர்பார்க்கப்படுகிறது. 
இந்நிலையில் இந்த படம் குறித்த புதிய தகவல் ஒன்று கிடைத்துள்ளது. அதன்படி நடிகர் விஜய், ஜனநாயகன் படத்தின் டப்பிங் பணிகளை நிறைவு செய்துள்ளதாக தகவல் கசிந்திருக்கிறது. மேலும் விஜய் மற்றும் பூஜா ஹெக்டே இருவரும் டப்பிங் ஸ்டூடியோவில் இருக்கும் புகைப்படங்கள் இணையத்தில் வைரலாகி வருகிறது. விஜயின் கடைசி படம் என்பதால் இந்த படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. எனவே அடுத்த ஆண்டு ஜனவரி 9அன்று இந்த படத்தை திருவிழா போல் கொண்டாட ரசிகர்கள் தயாராகி வருகிறார்கள் என்பது குறிப்பிடத்தக்கது.