உலகின் முதல் மற்றும் மிக நீளமான 24 காரட் தங்கத்திலான நடைபாதையை துபாயில் திறக்கத் திட்டமிடப்பட்டுள்ளது. இந்த நடைபாதை அடுத்த இரண்டு மாதங்களுக்குள், அதாவது 2026-ம் ஆண்டு இறுதிக்குள் திறக்கப்படும் என எதிர்பார்க்கப்படுகிறது.
ஐக்கிய அரபு அமீரகத்தில் அமைந்துள்ள துபாய், உலகின் முக்கிய வணிக மற்றும் சுற்றுலா மையங்களில் ஒன்றாக விளங்குகிறது. குறிப்பாக, தங்கம் மற்றும் நகை விற்பனைக்குப் புகழ்பெற்ற நகரமாகத் திகழ்கிறது. உலகின் பல்வேறு நாடுகளில் இருந்து சுற்றுலாப் பயணிகளும் முதலீட்டாளர்களும் தங்கம் வாங்குவதற்காக துபாய்க்கு வருகின்றனர்.
தங்க மாவட்டத்தில் புதிய சுற்றுலா ஈர்ப்பு!
துபாயின் தெய்ரா பகுதியில் கடந்த ஜனவரி மாதம் தொடங்கப்பட்ட துபாய் கோல்டு டிஸ்ட்ரிக்ட் பகுதியில் இந்தப் புதிய நடைபாதை அமைக்கப்பட உள்ளது. தங்கம், நகைகள், விலைமதிப்புமிக்க கற்கள் மற்றும் ஆடம்பரப் பொருட்கள் விற்பனை செய்யும் ஏராளமான கடைகள் இப்பகுதியில் செயல்பட்டு வருகின்றன.
சுற்றுலாப் பயணிகளையும் உள்ளூர் மக்களையும் கவரும் வகையில் இந்தத் திட்டம் முன்னெடுக்கப்பட்டுள்ளது. 24 காரட் தங்கத்தால் உருவாக்கப்படும் இந்த நடைபாதை, உலகிலேயே தனித்துவமான சுற்றுலா ஈர்ப்பாக அமையும் என எதிர்பார்க்கப்படுகிறது.
துபாய் கோல்டு டிஸ்ட்ரிக்ட்டின் வர்த்தகப் பிரிவு மூத்த இயக்குநர் ரஷித் அல் ஹர்மூதி, இந்த நடைபாதை அடுத்த இரண்டு மாதங்களுக்குள் திறக்கப்படும் எனத் தெரிவித்துள்ளார். இருப்பினும், இதன் துல்லியமான நீளம், கட்டுமானச் செலவு மற்றும் திறப்பு விழா குறித்த கூடுதல் விவரங்கள் இன்னும் வெளியிடப்படவில்லை.
தங்க வர்த்தகத்தில் வளர்ச்சி!
துபாய் கோல்டு டிஸ்ட்ரிக்ட்டில் தங்க மொத்த விற்பனை அலுவலகங்களின் எண்ணிக்கை 2026-ம் ஆண்டு தொடக்கம் முதல் 20 சதவீதம் அதிகரித்துள்ளதாகத் தெரிவிக்கப்பட்டுள்ளது. இதே காலகட்டத்தில் தங்கம், நகைகள், விலைமதிப்புமிக்க கற்கள் மற்றும் ஆடம்பரக் கடிகாரங்கள் விற்பனை செய்யும் புதிய கடைகளின் எண்ணிக்கையும் 15 சதவீதம் உயர்ந்துள்ளது.
மேலும், மத்திய கிழக்கின் மிகப்பெரிய தங்கம் மற்றும் நகை வர்த்தகக் கண்காட்சிகளில் ஒன்றை உருவாக்குவதற்கான திட்டங்களும் முன்னெடுக்கப்பட்டு வருகின்றன.
தங்க வர்த்தகத்தை மேம்படுத்துவதுடன், சுற்றுலாப் பயணிகளைக் கவரும் புதிய முயற்சியாகவும் இந்த 24 காரட் தங்க நடைபாதை அமைய உள்ளது. துபாயின் தங்க வர்த்தகப் புகழை உலக அளவில் மேலும் உயர்த்தும் வகையில் இந்தத் திட்டம் முக்கியத்துவம் பெற்றுள்ளது.