தமிழகத்தில் தமிழக வெற்றிக் கழகத்தின் (தவெக) அரசு பொறுப்பேற்று 100 நாட்கள் நிறைவடைந்துள்ள நிலையில், தவெக ஆட்சியில் போதைப்பொருள் புழக்கம், சட்டம்-ஒழுங்கு சீர்கேடு மற்றும் சட்டமன்ற புறக்கணிப்பு குறித்து மூத்த பத்திரிகையாளர் தராசு ஷியாம் நேர்காணல் ஒன்றில் கடுமையான விமர்சனங்களை முன்வைத்துள்ளார்.
சினிமா சாதனையா 100 நாள் ஆட்சி?:
தவெக அரசு தனது 100-வது நாளை “யுகத்திற்கான ஆட்சி” எனக் கொண்டாடுவது குறித்துப் பேசிய தராசு ஷியாம், “100 நாட்கள் நிறைவு என்பதெல்லாம் திரைப்படங்களுக்கு வேண்டுமானால் சாதனையாக இருக்கலாம். எம்.ஜி.ஆர், சிவாஜி காலத்தில் அது சாதனையாகப் பார்க்கப்பட்டது. ஆனால், ஆட்சியில் 100 நாட்கள் முடிந்தது ஒரு சாதனை என்றால், மீதி நாட்களில் என்ன செய்யப் போகிறார்கள்?” எனக் கேள்வி எழுப்பினார். மேலும், “இந்த ஆட்சியில் ஒரு நிமிடம் போவதே ஒரு யுகம் போவது போல் இருப்பதாகப் பொதுமக்கள் பெருமூச்சு விடுகிறார்கள்” என்றும் சாடினார்
சட்டமன்றத்தைப் புறக்கணித்த முதல்வர் விஜய்:
சட்டமன்றத்தில் போதைப்பொருள் தடுப்பு மற்றும் சட்டம்-ஒழுங்கு குறித்து எதிர்க்கட்சித் தலைவர் கவனஈர்ப்புத் தீர்மானம் கொண்டுவந்து விவாதித்தபோது, அதற்குப் பொறுப்பான முதல்வர் விஜய் அவைக்கு வராதது குறித்துப் பேசிய அவர், “எவ்வளவு பெரிய விழாவாக இருந்தாலும் அதைத் தொடங்கி வைத்துவிட்டு உடனே சட்டமன்றத்திற்கு வந்திருக்க வேண்டும். மக்கள் நலம் சார்ந்த மிக முக்கியமான விவாதங்கள் நடக்கும் போது முதல்வர் அவையைத் தவிர்ப்பது சரியான அணுகுமுறை அல்ல” என்று குறிப்பிட்டார்.
அதிகரிக்கும் போதைப்பொருள் கலாச்சாரம் & கொலைகள்:
பள்ளிகள் வரை போதைப்பொருட்களின் ஊடுருவல் அதிகரித்துள்ளது குறித்து அதிர்ச்சி தெரிவித்த தராசு ஷியாம், கோவையில் போதைப்பொருள் புழக்கத்தைக் காட்டிக்கொடுத்ததற்காக அமுதன் என்ற இளைஞரும், திருவொற்றியூரில் தனுஷ் என்பவரும் படுகொலை செய்யப்பட்ட சம்பவங்களைச் சுட்டிக்காட்டினார். போதைப்பொருள் தகவல்களை ரகசியமாகக் காக்க வேண்டிய காவல்துறையின் வீழ்ச்சியே இதுபோன்ற சம்பவங்களுக்குக் காரணம் என்றும், இதில் தவறு நடக்கும் போது பொதுமக்கள் அச்சமடைந்து தகவல் கொடுக்க முன்வர மாட்டார்கள் என்றும் எச்சரித்தார்.
அண்ணாமலைக்கு கேள்வி:
தவெக அமைச்சர்கள் லஞ்சம் வாங்குவதாகவும், அதற்கான ஆடியோ ஆதாரங்கள் தன்னிடம் இருப்பதாகவும், ஒரு வருடம் கழித்து அதை வெளியிடுவேன் என்றும் அண்ணாமலை கூறியிருப்பது குறித்துப் பேசிய ஷியாம், “ஒரு ஐ.பி.எஸ் அதிகாரியாக இருந்தவர் குற்ற ஆதாரங்கள் இருந்தால் உடனே வெளியிட வேண்டுமே தவிர, ஒரு வருடம் கழித்து வெளியிடுவேன் என அவகாசம் கொடுப்பது ஏன்? இது என்ன ஊறுகாய் பானையா போட்டு வைக்க?” என்று கேள்வி எழுப்பினார்.
- தவெக அரசின் 100 நாள் ஆட்சி சாதனை அல்ல என பத்திரிகையாளர் தராசு ஷியாம் விமர்சனம்.
- முக்கியமான சட்டம்-ஒழுங்கு விவாதத்தின் போது சட்டமன்றத்தைப் புறக்கணித்த முதல்வர் விஜய்.
- போதைப்பொருள் காட்டிக் கொடுத்த இளைஞர்கள் படுகொலை செய்யப்பட்ட சம்பவத்திற்கு கண்டனம்.
- அமைச்சர்களின் லஞ்ச ஆடியோவை உடனடியாக வெளியிடாமல் அவகாசம் கேட்கும் அண்ணாமலைக்கு கேள்வி.