இந்தியாவின் மிகப்பெரிய பொதுத்துறை வங்கியான பாரத ஸ்டேட் வங்கியில் (SBI) ஏற்பட்டுள்ள சைபர் பாதுகாப்பு சம்பவம் வாடிக்கையாளர்கள் மத்தியில் அதிர்ச்சியை ஏற்படுத்தியுள்ளது. டார்க் வெப்பில் கிடைத்த சுமார் 3.75 லட்சம் பதிவுகளை ஆய்வு செய்ததில், 3,897 வாடிக்கையாளர்களின் தனிப்பட்ட தகவல்கள் அடங்கிய பதிவுகள் கண்டறியப்பட்டுள்ளதாக வங்கி தெரிவித்துள்ளது.
என்னென்ன தகவல்கள் கசிந்துள்ளன?
முதற்கட்ட ஆய்வின்படி, பாதிக்கப்பட்டிருக்கக்கூடிய பதிவுகளில் வாடிக்கையாளர்களின் பெயர்கள், செல்போன் எண்கள், பிறந்த தேதிகள், மின்னஞ்சல் முகவரிகள், வீட்டு முகவரிகள், வாடிக்கையாளர் அடையாள எண்கள் மற்றும் கடன் தொடர்பான விவரங்கள் உள்ளிட்ட தனிப்பட்ட தகவல்கள் இடம்பெற்றுள்ளன. இந்தத் தகவல்கள் உண்மையானவையா, முழுமையானவையா, அவை எவ்வாறு வெளியானது என்பதைக் கண்டறிய விரிவான விசாரணை தேவைப்படுவதாக வங்கி தெரிவித்துள்ளது.
அக்டோபர் 16-ல் எச்சரிக்கை
வாடிக்கையாளர் தரவுகள் கசிந்திருக்கக்கூடும் என்பது தொடர்பாக அக்டோபர் 16-ம் தேதி தனது அச்சுறுத்தல் உளவுத்துறை சேவை வழங்குநர், பாதுகாப்பு அமைப்புகள் மற்றும் இந்திய கணினி அவசரகால மீட்புக் குழுவான CERT-In ஆகியவற்றிடமிருந்து எச்சரிக்கை கிடைத்ததாக எஸ்.பி.ஐ. தெரிவித்துள்ளது. இதையடுத்து, வங்கி தனது சைபர் பாதுகாப்பு நடவடிக்கைகளைத் தீவிரப்படுத்தியுள்ளது.
மேலும், சம்பவத்தின் தன்மை, தகவல் கசிவின் அளவு, அதன் மூலக் காரணம் மற்றும் வாடிக்கையாளர்களுக்கு ஏற்படக்கூடிய அபாயங்கள் குறித்து ஆய்வு செய்ய சுயாதீன சைபர் பாதுகாப்பு நிறுவனத்தையும் வங்கி நியமித்துள்ளது.
வங்கிச் சேவைகளுக்கு பாதிப்பா?
இந்தத் தரவு கசிவு சம்பவத்தால் வங்கியின் முக்கியச் செயல்பாடுகள், நிதிநிலை அல்லது வணிகத் தொடர்ச்சியில் குறிப்பிடத்தக்க பாதிப்பு ஏற்படவில்லை என்று எஸ்.பி.ஐ. தெரிவித்துள்ளது. வங்கியின் அன்றாடச் செயல்பாடுகள் வழக்கம்போல் நடைபெற்று வருவதாகவும், பாதுகாப்பு குறைபாடுகளைக் கண்டறிந்து உரிய தடுப்பு நடவடிக்கைகளை மேற்கொண்டு வருவதாகவும் கூறியுள்ளது.
வாடிக்கையாளர்கள் கவனிக்க வேண்டியவை
தனிப்பட்ட தகவல்கள் தவறான நபர்களின் கைகளுக்குச் சென்றிருக்கக்கூடிய சூழலில், வாடிக்கையாளர்கள் விழிப்புடன் இருப்பது அவசியம். வங்கிப் பணியாளர்கள் எனக் கூறி அழைப்பவர்கள் அல்லது குறுஞ்செய்தி அனுப்புபவர்களிடம் வங்கி ரகசிய எண், OTP, PIN மற்றும் கடவுச்சொற்களைப் பகிரக்கூடாது. சந்தேகத்திற்கிடமான இணைப்புகளைத் திறப்பதையும் தவிர்க்க வேண்டும்.
வங்கிக் கணக்கில் சந்தேகத்திற்கிடமான பரிவர்த்தனைகள் ஏதேனும் தென்பட்டால், உடனடியாக எஸ்.பி.ஐ. வங்கியைத் தொடர்புகொண்டு புகார் அளிக்க வேண்டும்.
தரவுகள் கசிந்ததன் முழுமையான பின்னணி மற்றும் அதன் தாக்கம் குறித்த விசாரணை தொடர்ந்து நடைபெற்று வருகிறது. வாடிக்கையாளர்களின் தனிப்பட்ட தகவல்களைப் பாதுகாப்பது தொடர்பான சைபர் பாதுகாப்பு நடவடிக்கைகள் மீண்டும் முக்கியத்துவம் பெற்றுள்ளன.