பிரதமர் நரேந்திர மோடி வரும் நவம்பர் 16ஆம் தேதி பிலிப்பைன்ஸ் நாட்டிற்கு பயணம் மேற்கொள்ள உள்ளார். அங்கு நடைபெறவுள்ள ஆசியான்-இந்தியா மாநாடு மற்றும் கிழக்காசிய மாநாடு உள்ளிட்ட முக்கியமான சர்வதேசக் கூட்டங்களில் அவர் பங்கேற்க உள்ளார்.
தென்கிழக்கு ஆசிய நாடுகளின் கூட்டமைப்பான ஆசியான் அமைப்பில் 11 நாடுகள் உறுப்பினர்களாக உள்ளன. இந்த அமைப்பு பிராந்திய வர்த்தகம், முதலீடு, பாதுகாப்பு உள்ளிட்ட பல்வேறு துறைகளில் உறுப்பு நாடுகளுக்கு இடையிலான ஒத்துழைப்பை மேம்படுத்தி வருகிறது.
நவம்பர் 16 முதல் 18 வரை மாநாடுகள்!
இந்த ஆண்டு ஆசியான் அமைப்பின் தலைமைப் பொறுப்பை பிலிப்பைன்ஸ் வகிக்கிறது. இதையொட்டி, அந்நாட்டின் தலைநகர் மணிலாவில் நவம்பர் 16ஆம் தேதி முதல் 18ஆம் தேதி வரை பல்வேறு மாநாடுகள் நடைபெற உள்ளன.
இந்த மாநாடுகளில் பங்கேற்பதற்காக பிரதமர் மோடி நவம்பர் 16ஆம் தேதி பிலிப்பைன்ஸ் செல்கிறார்.
ஆசியான்-இந்தியா மாநாட்டில் பங்கேற்கும் மோடி!
பிலிப்பைன்ஸ் பயணத்தின்போது, ஆசியான்-இந்தியா மாநாடு மற்றும் ஆசியான்-கிழக்காசிய மாநாடு உள்ளிட்ட கூட்டங்களில் பிரதமர் மோடி பங்கேற்க உள்ளார்.
இந்த மாநாடுகளில் இந்தோ-பசிபிக் கடல் பிராந்தியத்தில் வர்த்தகம், பாதுகாப்பு மற்றும் நாடுகளுக்கு இடையிலான ஒத்துழைப்பை மேம்படுத்துவது குறித்து ஆலோசிக்கப்படும் என எதிர்பார்க்கப்படுகிறது.
இந்தியாவின் ‘கிழக்கு நோக்கிய செயல்பாட்டுக் கொள்கையில்’ ஆசியான் அமைப்பு முக்கியப் பங்கு வகிக்கிறது. இந்தியா மற்றும் ஆசியான் நாடுகளுக்கு இடையிலான வர்த்தக உறவுகளை வலுப்படுத்துவதும், கடல்சார் ஒத்துழைப்பை மேம்படுத்துவதும் இந்தப் பயணத்தின் முக்கிய நோக்கங்களாக உள்ளன.
பிரதமர் மோடியின் இந்தப் பயணம் இந்தியா – தென்கிழக்கு ஆசிய நாடுகளுக்கு இடையிலான உறவுகளை மேலும் வலுப்படுத்தும் என எதிர்பார்க்கப்படுகிறது.