ஆண்பாவம் பொல்லாதது படத்தின் டிரைலர் வெளியாகி உள்ளது.
தொலைக்காட்சி நிகழ்ச்சிகளில் தொகுப்பாளராக பணியாற்றி ஏராளமான ரசிகர்களை சேகரித்து வைத்தவர் ரியோ ராஜ். இவர் கடந்த 2019ல் வெளியான ‘நெஞ்சமுண்டு நேர்மையுண்டு’ என்ற படத்தின் மூலம் கதாநாயகனாக அறிமுகமானார். அதே சமயம் இவரது நடிப்பில் வெளியான ‘ஜோ’ திரைப்படம் ரசிகர்கள் மத்தியில் பாசிட்டிவான விமர்சனங்களை பெற்று மாபெரும் வெற்றி படமாக அமைந்தது. இதைத் தொடர்ந்து இவருடைய அடுத்தடுத்த படங்களின் மீதான எதிர்பார்ப்பு மிகப்பெரிய அளவில் இருந்து வருகிறது. அந்த வகையில் கடைசியாக ‘ஸ்வீட் ஹார்ட்’ திரைப்படமும் வெளியாகி நல்ல வரவேற்பை பெற்றது. 
அடுத்தது இவரது நடிப்பில் ஆண்பாவம் பொல்லாதது எனும் திரைப்படம் உருவாகி இருக்கிறது. இந்த படத்தில் ரியோ ராஜுக்கு ஜோடியாக மாளவிகா மனோஜ் நடித்திருக்கிறார். ஏற்கனவே இந்த கூட்டணி ‘ஜோ’ திரைப்படத்தில் இணைந்திருந்தது குறிப்பிடத்தக்கது.
‘ஆண்பாவம் பொல்லாதது’ திரைப்படத்தை ட்ரம்ஸ்டிக்ஸ் புரொடக்ஷன்ஸ் நிறுவனம் தயாரிக்க கலையரசன் தங்கவேல் இயக்கியிருக்கிறார். சித்து குமார் இதன் இசையமைப்பாளராகவும், மாதேஷ் மாணிக்கம் இதன் ஒளிப்பதிவாளராகவும் பணியாற்றியுள்ளனர். ஏற்கனவே இந்த படத்தின் படப்பிடிப்புகள் முழுவதும் நிறைவடைந்து படமானது வருகின்ற அக்டோபர் 31ஆம் தேதி திரைக்கு வரும் என அறிவிக்கப்பட்டுள்ளது. இதற்கிடையில் இந்த படத்தில் இருந்து அடுத்தடுத்த போஸ்டர்களும், முன்னோட்ட வீடியோவும் வெளியாகி ரசிகர்களை கவர்ந்தது.
அதைத்தொடர்ந்து தற்போது படத்தின் டிரைலரை படக்குழு வெளியிட்டுள்ளது. அதாவது இந்த ட்ரெய்லரை பார்க்கும்போது கணவன்- மனைவி இருவருக்கும் இடையிலான உறவை மையமாக வைத்து எடுக்கப்பட்டுள்ளது போல் தெரிகிறது. மேலும் இந்த ட்ரைலரில் எமோஷனல், காமெடி, திருமண வாழ்க்கையில் நடக்கும் திருப்பங்கள் போன்றவை காட்டப்பட்டுள்ளது. இந்த கலகலப்பான ட்ரெய்லர் ரசிகர்கள் மத்தியில் நல்ல வரவேற்பை பெற்று இணையத்தில் வைரலாகி வருவதோடு படத்தின் மீதான எதிர்பார்ப்பையும் அதிகப்படுத்தி உள்ளது.