கும்கி 2 படத்தின் ரிலீஸ் தேதி அறிவிக்கப்பட்டுள்ளது.
கடந்த 2012 ஆம் ஆண்டு விக்ரம் பிரபு, லட்சுமி மேனன், தம்பி ராமையா ஆகியோரின் நடிப்பில் ‘கும்கி’ திரைப்படம் வெளியானது. பிரபு சாலமன் இயக்கியிருந்த இந்த படம் ரசிகர்கள் மத்தியில் பெரும் வரவேற்பை பெற்றது. ஹீரோவுக்கும், யானைக்கும் இடையிலான பாசப்பணிப்பை மையமாக வைத்து எடுக்கப்பட்ட இந்த படமும், படத்தில் இடம்பெற்ற பாடல்களும் இன்று வரையிலும் ரசிகர்களின் ஃபேவரைட்டாக இருக்கிறது. இந்நிலையில் தான் கடந்த சில தினங்களுக்கு முன்னர் ‘கும்கி 2’ படம் தொடர்பான அதிகாரப்பூர்வ அறிவிப்பு வெளியானது. முதல் பாகத்தைப் போல் யானையை மையமாக வைத்து உருவாகும் இந்த படத்தை பென் ஸ்டுடியோஸ் நிறுவனம் தயாரிக்க நிவாஸ் கே. பிரசன்னா இதற்கு இசையமைக்கிறார். எம். சுகுமார் இதன் ஒளிப்பதிவு பணிகளை கவனிக்கிறார்.
மேலும் இந்த படத்தில் அர்ஜுன் தாஸ் ஹீரோவாக நடிக்கிறார் என்றும் மதி மற்றும் ஸ்ரிதா ராவ் ஆகியோர் முக்கிய கதாபாத்திரங்களில் நடிக்கின்றனர் என்றும் சொல்லப்பட்டது. ஆனால் தற்போது படக்குழு, அறிமுக நடிகர் மதி தான் இந்த படத்தின் ஹீரோ என அறிவித்துள்ளது. எனவே அர்ஜுன் தாஸ் இந்த படத்தில் கேமியோ ரோலில் தோன்றுவார் என்று எதிர்பார்க்கப்படுகிறது. அடுத்தது இந்த படமானது 2025 நவம்பர் 14ஆம் தேதி உலகம் முழுவதும் வெளியாகும் எனவும் அறிவிக்கப்பட்டுள்ளது.