விஜய் தேவரகொண்டா நடிப்பில் வெளியான கிங்டம் திரைப்படம் தற்போது ஓடிடியில் வெளியாகி உள்ளது. 
தெலுங்கு திரையுலகில் ஏராளமான ரசிகர்களை சேகரித்து வைத்திருப்பவர் விஜய் தேவரகொண்டா. குறிப்பாக இவருக்கு தென்னிந்திய அளவில் பெண் ரசிகர்கள் அதிகம் இருக்கிறார்கள். இவருடைய அர்ஜுன் ரெட்டி, குஷி போன்ற படங்கள் ரசிகர்களின் ஃபேவரைட் படங்களாகும். மேலும் இவர் சூர்யாவின் 46வது படத்தில் சிறப்பு தோற்றத்தில் நடிக்க உள்ளதாக பேச்சு அடிபடுகிறது. இதற்கிடையில் இவரது நடிப்பில் கடந்த ஜூலை 31ஆம் தேதி திரைக்கு வந்த படம் தான் கிங்டம். இந்த படத்தை கௌதம் தின்னனுரி இயக்கி இருந்தார். சித்தாரா என்டடெயின்மென்ட் நிறுவனம் இந்த படத்தை தயாரிக்க அனிருத் இதற்கு இசையமைத்திருந்தார். இந்த படத்தில் விஜய் தேவரகொண்டாவுடன் இணைந்து பாக்யஸ்ரீ போர்ஸ், சத்யதேவ் மற்றும் பலர் நடித்திருந்தனர். ஆக்சன் திரில்லர் ஜானரில் உருவான இந்த படம் மிகுந்த எதிர்பார்ப்புகளுடன் திரையிடப்பட்டாலும் ரசிகர்கள் மத்தியில் கலவையான விமர்சனங்களை பெற்றது. 
இருப்பினும் இப்படம் ரூ.100 கோடிக்கும் அதிகமாக வசூல் செய்து சாதனை படைத்தது. இந்நிலையில் இந்த படம் இன்று (ஆகஸ்ட் 27) நெட்பிளிக்ஸ் தளத்தில் தெலுங்கு, இந்தி, தமிழ், கன்னடம், மலையாளம் ஆகிய மொழிகளில் வெளியாகி இருக்கிறது.