விக்ரமின் 65 ஆவது படம் குறித்த லேட்டஸ்ட் தகவல் வெளியாகியிருக்கிறது.
சியான் என்று ரசிகர்களால் கொண்டாடப்படும் விக்ரம் நடிப்பில் கடைசியாக ‘வீர தீர சூரன் பாகம் 2’ திரைப்படம் வெளியானது. இதைத்தொடர்ந்து நடிகர் விக்ரம், மடோன் அஸ்வின் இயக்கத்தில் தனது 63வது திரைப்படத்தில் நடிப்பதற்கு ஒப்பந்தமானார். ஆனால் இந்த படத்தின் படப்பிடிப்பு இதுவரை தொடங்கப்படவில்லை. அடுத்த ஆண்டில் இதன் படப்பிடிப்பு தொடங்கும் என எதிர்பார்க்கப்படுகிறது. இதற்கிடையில் ‘மெய்யழகன்’ படத்தின் இயக்குனர் பிரேம்குமார் இயக்கத்தில் தனது 64வது திரைப்படத்தில் நடித்து வருகிறார். விக்ரமின் அடுத்தடுத்த படங்களின் மீதான எதிர்பார்ப்பு மிகப்பெரிய அளவில் இருக்கும் நிலையில் விக்ரமின் 65 ஆவது திரைப்படத்தை யார் இயக்கப் போகிறார்? என்ற கேள்வி சமூக வலைதளங்களில் உலா வந்தது. அதன்படி ‘பார்க்கிங்’ படத்தின் இயக்குனர் ராம்குமார் பாலகிருஷ்ணன் தான் விக்ரமின் 65 ஆவது படத்தை இயக்கப் போகிறார் என ஏற்கனவே தகவல் கசிந்தது.
இந்நிலையில் இந்த படத்தை டான் பிக்சர்ஸ் நிறுவனத்தின் சார்பில் ஆகாஷ் பாஸ்கரன் தயாரிக்க உள்ளதாக புதிய தகவல் கிடைத்திருக்கிறது. இது தொடர்பான பேச்சுவார்த்தை நடைபெற்று வருவதாகவும் விரைவில் இது தொடர்பான அதிகாரப்பூர்வ அறிவிப்பு வெளியாகும் எனவும் சினிமா வட்டாரங்கள் தெரிவிக்கின்றன. மேலும் படத்தில் நடிக்கும் மற்ற நடிகர்கள், தொழில்நுட்ப கலைஞர்கள் குறித்த விவரங்கள் இனிவரும் நாட்களில் வெளியாகும் என எதிர்பார்க்கப்படுகிறது.