லோகேஷ் கனகராஜ் இயக்கும் கைதி 2 படத்தின் ரிலீஸ் குறித்த அப்டேட் வெளியாகியுள்ளது.
கடந்த 2019 ஆம் ஆண்டு லோகேஷ் கனகராஜ் – கார்த்தி கூட்டணியில் வெளியான ‘கைதி’ திரைப்படம் சூப்பர் டூப்பர் ஹிட் எடுத்தது. இந்த படத்தில் லோகேஷ் கனகராஜ் கார்த்தியை வேறொரு பரிமாணத்தில் காட்டி இருந்தார். இந்த படம் இன்று வரையிலும் ரசிகர்களால் கொண்டாடப்பட்டு வருகிறது. எல்சியு யுனிவர்ஸின் முதல் படமான இந்த படத்தின் ரெஃப்ரன்ஸ் லோகேஷின் அடுத்தடுத்த படங்களிலும் இடம் பெற்றிருந்தது. எனவே ‘கைதி 2’ படத்தை எதிர்நோக்கி ரசிகர்கள் நீண்ட நாட்களாக காத்துக் கொண்டிருக்கின்றனர். அதன்படி தொடர்ந்து தள்ளிப்போய்க்கொண்டிருந்த ‘கைதி 2’ திரைப்படம் தான் லோகேஷின் அடுத்த திட்டமாக இருக்கும் என்று சினிமா வட்டாரங்களில் பேசப்படுகிறது. 
இன்று முதல் (அக்டோபர் 25) இந்த படம் தொடர்பான முன் தயாரிப்பு பணிகளும் தொடங்கப்படுவதாக சொல்லப்படுகிறது. அனேகமாக இந்த படத்தின் படப்பிடிப்பு அடுத்த ஆண்டு முதல் பாதியில் ஆரம்பிக்கப்படும் என எதிர்பார்க்கப்படுகிறது. இந்நிலையில் கைதி 2 படத்தின் ரிலீஸ் குறித்த புதிய தகவல் கிடைத்திருக்கிறது. அந்த வகையில் இப்படத்தை 2027 ஆம் ஆண்டில் திரைக்கு கொண்டுவர படக்குழு திட்டமிட்டு வருவதாக தெரியவந்துள்ளது. இதனைத் தொடர்ந்து லோகேஷ் கனகராஜ், கமல்ஹாசன் மற்றும் சூர்யா ஆகிய இருவரையும் வைத்து ‘விக்ரம் 2’ படத்தை இயக்க இருக்கிறாராம். இந்த படத்தில் ரோலக்ஸ் கதாபாத்திரம் இன்னும் வலுவாக அமைக்கப்படும் என்று நம்பப்படுகிறது.
கடந்த ஆகஸ்ட் மாதம் வெளியான ‘கூலி’ திரைப்படத்தால் லோகேஷ் கனகராஜை பலரும் ட்ரோல் செய்து வந்தனர். அதன் பிறகு லோகேஷ் கனகராஜ் இயக்க உள்ள அடுத்தடுத்த படங்கள் கைவிடப்பட்டதாக பல தகவல்கள் வெளியாகி அதிர்ச்சியை ஏற்படுத்தியது. இந்நிலையில் லோகேஷ் கனகராஜ் கைதி 2, விக்ரம் 2 ஆகிய படங்களின் மூலம் இழந்த வெற்றியை திரும்ப பெற்று சிறந்த கம்பேக் கொடுப்பார் என்று எதிர்பார்க்கப்படுகிறது.