சூப்பர் ஸ்டார் ரஜினிகாந்த் நடிப்பில் உருவாகி வரும் ‘ஜெயிலர் 2’ படத்தின் பாடலுக்கு டேவிட் வார்னர் நடனமாடுவது போன்ற ஏஐ வீடியோ இணையத்தில் வைரலாகி வருகிறது.
ஆஸ்திரேலிய அணியின் முன்னாள் கிரிக்கெட் வீரரான டேவிட் வார்னர், கிரிக்கெட் மைதானத்தில் மட்டுமின்றி சமூக வலைதளங்களிலும் தனது நகைச்சுவையான பதிவுகள் மற்றும் நடன வீடியோக்கள் மூலம் இந்திய ரசிகர்களிடம் பிரபலமானவர்.
இந்திய சினிமா பாடல்கள் மீது ஆர்வம் கொண்டுள்ள வார்னர், தற்போது ‘ஜெயிலர் 2’ திரைப்படத்தின் ‘அல போலேலோ’ பாடலுக்கு தான் நடனமாடுவது போன்று உருவாக்கப்பட்ட ஏஐ வீடியோவை தனது இன்ஸ்டாகிராம் பக்கத்தில் மறுபதிவு செய்துள்ளார்.
இந்த வீடியோவில் டேவிட் வார்னர் நடனமாடுவது போன்ற காட்சிகள் ஏஐ தொழில்நுட்பத்தின் மூலம் உருவாக்கப்பட்டுள்ளன. இதைப் பார்த்த வார்னர், நகைச்சுவையாக தனது நடனத்தைப் பற்றி ரசிகர்களிடம் கருத்து கேட்டுள்ளார்.
மேலும், ‘பாலிவுட் டேவ்’ சில அசத்தலான நடன அசைவுகளை கொண்டிருப்பதாக குறிப்பிட்ட அவர், தனது நடனத் திறமைக்கு 10-க்கு எவ்வளவு மதிப்பெண் வழங்குவீர்கள் என்றும் ரசிகர்களிடம் கேட்டுள்ளார்.
வார்னரின் இந்த பதிவு வெளியானதும் இந்தியா மற்றும் ஆஸ்திரேலிய ரசிகர்கள் பலரும் சமூக வலைதளங்களில் கருத்துகளை பதிவிட்டு வருகின்றனர். குறிப்பாக தென்னிந்திய ரசிகர்கள் பலர், இந்திய சினிமா மீதான வார்னரின் ஆர்வத்தை குறிப்பிட்டு அவரை திரைப்படங்களில் நடிக்க வருமாறும் அழைப்பு விடுத்து வருகின்றனர்.
கொரோனா ஊரடங்கு காலத்தில் தனது குடும்பத்தினருடன் தமிழ் மற்றும் தெலுங்கு திரைப்பட பாடல்களுக்கு நடனமாடி வீடியோக்களை வெளியிடத் தொடங்கிய வார்னர், இதன் மூலம் இந்திய ரசிகர்களிடையே ‘பாலிவுட் டேவ்’ என்ற செல்லப்பெயரையும் பெற்றார்.
நெல்சன் திலீப்குமார் இயக்கத்தில் ரஜினிகாந்த் நடிப்பில் உருவாகியுள்ள ‘ஜெயிலர் 2’ திரைப்படம் அக்டோபர் 15-ம் தேதி உலகம் முழுவதும் திரையரங்குகளில் வெளியாக உள்ளது.