மத்திய கிழக்கில் ஈரான் – அமெரிக்கா இடையேயான போர் பதற்றம் அதிகரித்து வரும் நிலையில், ஹார்முஸ் நீரிணைக்கு அருகே 2,500-க்கும் மேற்பட்ட கன்டெய்னர்களை ஏற்றிச் சென்ற சரக்குக் கப்பல் கடலில் மூழ்கியுள்ளது. இந்தச் சம்பவத்தைத் தொடர்ந்து, கப்பலில் இருந்த பொருட்கள் கடலில் மிதக்கும் காட்சிகள் இணையத்தில் கவனம் பெற்றுள்ளன.
கண்ணிவெடியில் சிக்கியதாகத் தகவல்
ஈரானின் புரட்சிகர காவல் படையின் கடற்படை வெளியிட்ட தகவலின்படி, கடற்பாதையில் சென்ற சரக்குக் கப்பல் கடற்படை கண்ணிவெடியில் சிக்கி தீப்பிடித்துள்ளது. தீ அதிகரித்ததைத் தொடர்ந்து கப்பல் கடலில் மூழ்கியதாகக் கூறப்படுகிறது. இந்தக் கப்பலில் 2,500-க்கும் மேற்பட்ட கன்டெய்னர்கள் இருந்ததாகத் தகவல்கள் தெரிவிக்கின்றன.
கடலில் மிதந்த ஐபோன்கள், வாசனைத் திரவியங்கள்
கப்பல் மூழ்கியதைத் தொடர்ந்து, அதில் இருந்த கன்டெய்னர்களும் அவற்றில் இருந்த பொருட்களும் கடலில் மிதப்பது போன்ற காட்சிகள் சமூக வலைதளங்களில் பரவி வருகின்றன. குறிப்பாக, ஐபோன் பெட்டிகள் மற்றும் விலையுயர்ந்த வாசனைத் திரவியங்கள் கடலில் மிதப்பதாகக் கூறப்படும் காட்சிகள் பேசுபொருளாகியுள்ளன.
சிறிய படகுகளில் சென்ற சிலர் கடலில் மிதந்த பொருட்களைச் சேகரிப்பது போன்ற வீடியோக்களும் வெளியாகியுள்ளன. எனினும், இந்தக் காட்சிகள் அனைத்தும் இந்தக் குறிப்பிட்ட கப்பல் விபத்துடன் தொடர்புடையவை என்பது சுயமாக உறுதிப்படுத்தப்படவில்லை.
மத்திய கிழக்கில் அதிகரிக்கும் பதற்றம்
ஈரான் – அமெரிக்கா இடையேயான மோதலால் ஹார்முஸ் நீரிணையில் கப்பல் போக்குவரத்து பாதிக்கப்பட்டுள்ளது. உலகளாவிய எரிசக்தி மற்றும் சரக்குப் போக்குவரத்திற்கு முக்கியத்துவம் வாய்ந்த இந்தக் கடல்வழியில், கப்பல்கள் மீதான தாக்குதல்கள் அதிகரித்து வருவது சர்வதேச அளவில் கவலையை ஏற்படுத்தியுள்ளது.
கப்பலில் இருந்த மாலுமிகள் அனைவரும் பாதுகாப்பாக மீட்கப்பட்டதாகவும், உயிரிழப்புகள் ஏற்பட்டதாகத் தகவல் இல்லை என்றும் சர்வதேச ஊடகங்கள் செய்தி வெளியிட்டுள்ளன.