மொராக்கோ நாட்டின் வரலாற்றில் முதல் முறையாக ஒரு பெண் பிரதமராக நியமிக்கப்பட்டுள்ளார். மன்னர் 6-ம் முகமது, ஃபாத்திமா எஸ்ஸஹ்ரா எல் மன்சூரியை நாட்டின் புதிய அரசுத் தலைவராக நியமித்து, புதிய அரசை அமைக்கும் பொறுப்பையும் அவரிடம் ஒப்படைத்துள்ளார். இந்த நியமனம் கடந்த செப்டம்பர் 29-ம் தேதி நடைபெற்றது.
50 வயதான ஃபாத்திமா எஸ்ஸஹ்ரா எல் மன்சூரி, வழக்கறிஞராக பணியாற்றியவர். அரசியலுக்கு வருவதற்கு முன்பும், அதன்பிறகும் மொராக்கோவின் உள்ளாட்சி மற்றும் தேசிய அரசியலில் முக்கிய பொறுப்புகளை வகித்துள்ளார்.
யார் இந்த ஃபாத்திமா எஸ்ஸஹ்ரா எல் மன்சூரி?
ஃபாத்திமா எஸ்ஸஹ்ரா எல் மன்சூரி 1976-ம் ஆண்டு மராக்கெஷில் பிறந்தவர். பிரான்சில் உள்ள மான்ட்பெலியர் பல்கலைக்கழகத்தில் சட்டம் பயின்ற இவர், அமெரிக்காவின் நியூயார்க் பல்கலைக்கழகத்திலும் ஆங்கிலோ-சாக்சன் வணிகச் சட்டம் தொடர்பான படிப்பை முடித்துள்ளார். பின்னர் வழக்கறிஞராகப் பணியாற்றினார்.
அரசியலில் நுழைந்த அவர், மொராக்கோவின் Authenticity and Modernity Party (PAM) கட்சியில் இணைந்தார். 2009-ம் ஆண்டு மராக்கெஷ் நகர மேயராக தேர்ந்தெடுக்கப்பட்டதன் மூலம் அந்த நகரின் முதல் பெண் மேயர் என்ற பெருமையைப் பெற்றார். 2021-ம் ஆண்டு மீண்டும் மராக்கெஷ் நகர மேயராக பொறுப்பேற்றார்.
மத்திய அரசில் அமைச்சர் பதவி
2021-ம் ஆண்டு அக்டோபரில் மொராக்கோவின் தேசிய நில திட்டமிடல், நகர்ப்புற மேம்பாடு, வீட்டு வசதி மற்றும் நகரக் கொள்கை அமைச்சராக ஃபாத்திமா எஸ்ஸஹ்ரா எல் மன்சூரி நியமிக்கப்பட்டார்.
இந்தப் பதவியில் இருந்தபோது வீட்டு வசதி, நகர்ப்புற திட்டமிடல் மற்றும் 2023-ம் ஆண்டு அல் ஹவுஸ் நிலநடுக்கத்தால் பாதிக்கப்பட்டவர்களுக்கான மறுகுடியமர்வு உள்ளிட்ட பல்வேறு விவகாரங்களில் பணியாற்றினார்.
தேர்தலுக்குப் பிறகு பிரதமர் பதவி
மொராக்கோவில் செப்டம்பர் 23-ம் தேதி நடைபெற்ற நாடாளுமன்றத் தேர்தலில் ஃபாத்திமா எஸ்ஸஹ்ரா எல் மன்சூரி சார்ந்த PAM கட்சி 395 இடங்களில் 97 இடங்களைப் பெற்று அதிக இடங்களை வென்ற கட்சியாக உருவெடுத்தது. இதையடுத்து அரசியலமைப்பின் விதிகளின்படி, மன்னர் 6-ம் முகமது அவரை அரசுத் தலைவராக நியமித்து புதிய அரசை அமைக்க அழைப்பு விடுத்தார்.
எனினும், 395 உறுப்பினர்களைக் கொண்ட நாடாளுமன்றத்தில் பெரும்பான்மைக்கு 198 இடங்கள் தேவைப்படும் நிலையில், PAM கட்சிக்கு 97 இடங்கள் மட்டுமே கிடைத்துள்ளன. எனவே புதிய அரசை அமைக்க கூட்டணி கட்சிகளுடன் பேச்சுவார்த்தை நடத்த வேண்டிய நிலை ஏற்பட்டுள்ளது.
மொராக்கோவின் முதல் பெண் பிரதமர்
ஃபாத்திமா எஸ்ஸஹ்ரா எல் மன்சூரியின் நியமனம் மொராக்கோவின் அரசியல் வரலாற்றில் முக்கிய நிகழ்வாக பார்க்கப்படுகிறது. நாட்டின் அரசுத் தலைமைப் பொறுப்பை ஏற்கும் முதல் பெண் என்ற பெருமையை அவர் பெற்றுள்ளார். அரபு உலகில் பிரதமர் பதவியை வகிக்கும் பெண்களில் ஒருவராகவும் அவர் இணைந்துள்ளார்.
தனது நியமனத்துக்குப் பிறகு பேசிய எல் மன்சூரி, நாட்டின் வரலாற்றில் முதல்முறையாக ஒரு பெண் அரசாங்கத்தை வழிநடத்தும் பொறுப்பை ஏற்றிருப்பது அனைத்து மொராக்கோ பெண்களுக்கும் பெருமை அளிக்கும் தருணம் என்று குறிப்பிட்டார்.
முன்னுள்ள முக்கிய பொறுப்புகள்
புதிய அரசை அமைப்பதற்கான கூட்டணி பேச்சுவார்த்தைகளை முன்னெடுப்பது அவரது முதல் முக்கிய பணியாக உள்ளது. இதனுடன் பொருளாதாரம், வேலைவாய்ப்பு, விலைவாசி மற்றும் ஊதியம் போன்ற உள்நாட்டு விவகாரங்களிலும் புதிய அரசு கவனம் செலுத்த வேண்டியுள்ளது.
மேலும், 2030-ம் ஆண்டு உலகக் கோப்பை கால்பந்து போட்டியை ஸ்பெயின் மற்றும் போர்ச்சுகலுடன் இணைந்து நடத்த உள்ள மொராக்கோவில், அதற்கான உள்கட்டமைப்பு மற்றும் முதலீட்டு திட்டங்களும் புதிய அரசின் முக்கிய பொறுப்புகளில் ஒன்றாக இருக்கும்.
அதிகாலையில் குலுங்கிய ஆப்கானிஸ்தான் – 5.3 ரிக்டர் அளவில் சக்திவாய்ந்த நிலநடுக்கம்!