அமெரிக்காவின் ஒரிகன் மாகாணத்தில் உள்ள பெண்ட் நகரில் செயல்படும் சில்வர் ரெயில் தொடக்கப் பள்ளியில் (Silver Rail Elementary School) அக்டோபர் 15ஆம் தேதி நடந்த துப்பாக்கிச் சூட்டில் மூன்று குழந்தைகள் மற்றும் ஓர் ஆசிரியர் என நான்கு பேர் உயிரிழந்தனர். இந்தச் சம்பவத்தில் மேலும் ஒரு குழந்தையும் ஓர் ஆசிரியரும் காயமடைந்தனர். தாக்குதலில் ஈடுபட்ட 16 வயது சிறுவனும் சம்பவ இடத்தில் உயிரிழந்ததாகக் காவல்துறை தெரிவித்துள்ளது.
வகுப்பறைக்குள் புகுந்து துப்பாக்கிச் சூடு
காவல்துறை வெளியிட்ட தகவலின்படி, சிறுவன் பள்ளியின் பூட்டப்பட்ட நுழைவுக் கதவுகளைத் துப்பாக்கியால் சுட்டு உடைத்து உள்ளே நுழைந்துள்ளார். பின்னர் சிறப்புக் கல்வி தேவைப்படும் மாணவர்கள் இருந்த வகுப்பறைக்குள் சென்று துப்பாக்கிச் சூடு நடத்தியதாகக் கூறப்படுகிறது.
உயிரிழந்த குழந்தைகள் 5, 8 மற்றும் 11 வயதுடையவர்கள். 25 வயதான ஆசிரியையும் இந்தத் தாக்குதலில் உயிரிழந்தார். மேலும் 7 வயதுக் குழந்தையும் 54 வயதுடைய ஆசிரியையும் காயமடைந்து மருத்துவமனையில் அனுமதிக்கப்பட்டனர்.
தாக்குதலைத் தடுக்க முயன்ற ஆசிரியர், பொதுமகன்
துப்பாக்கிச் சூட்டின்போது, அங்கிருந்த ஓர் ஆசிரியர் தாக்குதலாளரை எதிர்கொண்டு தடுக்க முயன்றதாகக் காவல்துறை தெரிவித்துள்ளது. அவர் தனது கைப்பேசியை வீசியதுடன், சிறுவனைப் பிடித்துத் தடுத்து நிறுத்தவும் முயன்றுள்ளார்.
அப்போது பள்ளியில் படிக்கும் இரண்டு குழந்தைகளின் தந்தையான 36 வயது கேலுப் ஜியாமான்கோ (Kaylub Giamanco), தாக்குதலைக் கவனித்து பள்ளிக்குள் சென்று சிறுவனைத் துப்பாக்கியால் சுட்டதாக அதிகாரிகள் தெரிவித்தனர். இதனால் தாக்குதல் முடிவுக்கு வந்தது. ஆசிரியர் மற்றும் அந்தப் பொதுமகனின் நடவடிக்கைகள் மேலும் உயிரிழப்புகள் ஏற்படாமல் தடுத்திருக்கலாம் எனக் காவல்துறை பாராட்டியுள்ளது.
தொடரும் விசாரணை
தாக்குதலில் ஈடுபட்டவர் கிரிஃபின் ஜே. ஜான் II (Griffin J. John II) என அடையாளம் காணப்பட்டுள்ளார். அவர் முன்பு அந்தப் பள்ளியில் சிறப்புக் கல்வி மாணவராகப் பயின்றவர் என்று அதிகாரிகள் தெரிவித்துள்ளனர். அவர் எதற்காகத் தாக்குதலில் ஈடுபட்டார் என்பதற்கான காரணம் இதுவரை உறுதிப்படுத்தப்படவில்லை.
சம்பவம் தொடர்பாகக் காவல்துறையினர் தொடர்ந்து விசாரணை நடத்தி வருகின்றனர். பள்ளி வளாகத்தில் நடந்த இந்தத் துப்பாக்கிச் சூடு, மாணவர்கள், பெற்றோர் மற்றும் அப்பகுதி மக்களிடையே பெரும் சோகத்தை ஏற்படுத்தியுள்ளது.
வானில் பறக்கும் டெஸ்லா கார் அறிமுகம்: எலான் மஸ்க்கின் ரோட்ஸ்டர் 2!