தமிழ் சினிமாவில் கதாநாயகனாக நடித்து வரும் நடிகர் பரத், தற்போது புதிய திரைப்படம் ஒன்றில் நடிக்கிறார். அறிமுக இயக்குநர் எம். குரு எழுதி இயக்கும் இப்படத்தில் மூன்று நாயகிகள் நடிக்க உள்ளனர்.
3 நாயகிகள் இணையும் புதிய படம்!
நகைச்சுவை, காதல், குடும்ப உணர்வுகள் மற்றும் சென்டிமென்ட் என அனைத்து அம்சங்களும் நிறைந்த பொழுதுபோக்குத் திரைப்படமாக இப்படம் உருவாக உள்ளது. இதில் நடிகைகள் சிவேஷ்தா ராஜ், மீனாட்சி தினேஷ், ரக்ஷனா இந்துசூடன் ஆகியோர் கதாநாயகிகளாக நடிக்கின்றனர்.
மேலும், மலையாள நடிகர் ராஜேஷ் மாதவன் முக்கிய கதாபாத்திரத்தில் நடிக்கிறார். முனீஷ்காந்த், சுஜிதா, கட்டெறும்பு ஸ்டாலின் உள்ளிட்டோரும் இப்படத்தில் முக்கிய கதாபாத்திரங்களில் இடம்பெறுகின்றனர்.
சென்னை, ஆலப்புழாவில் படப்பிடிப்பு!
இப்படத்திற்கு எஸ்.ஆர். சதீஷ் குமார் ஒளிப்பதிவு செய்கிறார். ட்வின் டவர் புரொடக்ஷன்ஸ் மற்றும் டி க்ரோனிகல்ஸ் புரொடக்ஷன்ஸ் ஆகிய நிறுவனங்கள் இணைந்து இப்படத்தைத் தயாரிக்கின்றன.
படத்தின் படப்பிடிப்பு சென்னை மற்றும் கேரள மாநிலம் ஆலப்புழா பகுதிகளில் நடைபெறத் திட்டமிடப்பட்டுள்ளது. இதற்கான படப்பூஜை சென்னையில் நடைபெற்றது. இதில் படக்குழுவினர் கலந்துகொண்டனர்.
நடிகர் பரத், மூன்று நாயகிகள் மற்றும் அனுபவம் வாய்ந்த துணை நடிகர்கள் இணைந்துள்ள இப்படம், நகைச்சுவை மற்றும் குடும்ப உணர்வுகள் கலந்த பொழுதுபோக்குப் படமாக உருவாகவுள்ளது. படத்தின் தலைப்பு மற்றும் வெளியீட்டுத் தேதி குறித்த அறிவிப்புகள் அடுத்தகட்டமாக வெளியாகும் என எதிர்பார்க்கப்படுகிறது.