கணினிகளில் பயன்படுத்தப்படும் ரேம் (RAM) நினைவகத்தைப் பற்றிய கருத்தால் இணையவாசிகளின் விமர்சனத்திற்கு உள்ளான ஓபன் ஏஐ நிறுவனத்தின் தலைமைச் செயல் அதிகாரி சாம் ஆல்ட்மேன், தனது எக்ஸ் (X) சமூக வலைதளப் பக்கத்தின் பெயரை தற்காலிகமாக “ராம் ஆல்ட்மேன்” என மாற்றியுள்ளார். அவரது இந்த நடவடிக்கை இணையத்தில் கவனம் பெற்றுள்ளது.
செயற்கை நுண்ணறிவு (AI) தொழில்நுட்பத்தின் வளர்ச்சியால் உலகம் முழுவதும் கணினி நினைவகமான DRAM-க்கான தேவை அதிகரித்து வருகிறது. இதுதொடர்பாக கடந்த அக்டோபர் 29-ஆம் தேதி ‘Cheeky Pint’ என்ற பாட்காஸ்ட் நிகழ்ச்சியில் சாம் ஆல்ட்மேன் பேசிய கருத்து சர்ச்சையை ஏற்படுத்தியது.
அப்போது, உலகளவில் குறைவாகக் கிடைக்கும் DRAM நினைவகத்தைப் பலரும் தங்களது தனிப்பட்ட கணினிகளில் வைத்துக்கொண்டு, அதில் பெரும்பகுதியை பயன்படுத்தாமல் இருப்பது வளங்களை ஒதுக்கும் முறையில் திறனற்றதாக இருப்பதாக அவர் குறிப்பிட்டார். அதற்குப் பதிலாக, கிளவுட் டேட்டா சென்டர்களில் நினைவகத்தை அதிக அளவில் பயன்படுத்துவது சிறந்தது என்றும் அவர் தெரிவித்திருந்தார்.
இந்தக் கருத்துக்கு கணினி பயனர்கள், கேமிங் ஆர்வலர்கள் மற்றும் தொழில்நுட்பத் துறையினர் பலர் எதிர்ப்பு தெரிவித்தனர். செயற்கை நுண்ணறிவு நிறுவனங்களின் தேவைக்காக சாதாரண கணினிப் பயனர்களின் ரேம் பயன்பாட்டைக் குறைக்க வேண்டும் என்று சாம் ஆல்ட்மேன் விரும்புகிறாரா என சமூக வலைதளங்களில் விமர்சனங்கள் எழுந்தன.
இந்த விவாதத்தில் எலான் மஸ்க்கும் கருத்து தெரிவித்திருந்தார். “மக்களுக்கும் அவர்களுடைய ரேம் கிடைக்க வேண்டும்!” என்ற பொருளில் அவர் வெளியிட்ட பதிவு இணையத்தில் பரவலாகப் பகிரப்பட்டது.
“ராம் ஆல்ட்மேன்” என பெயர் மாற்றம்
இந்தச் சூழலில், சாம் ஆல்ட்மேனின் எக்ஸ் பதிவுக்குப் பதிலளித்த பயனர் ஒருவர், “உங்களது எக்ஸ் கணக்கின் பெயரை ராம் ஆல்ட்மேன் என மாற்ற முடியுமா?” என்று நகைச்சுவையாகக் கேட்டார். இதற்கு சாம் ஆல்ட்மேன் சம்மதம் தெரிவித்து, தனது கணக்கின் பெயரைத் தற்காலிகமாக “Ram Altman” என மாற்றினார்.
மேலும், தனது முந்தைய கருத்துகள் தவறான முறையில் புரிந்துகொள்ளப்பட்டதாகக் குறிப்பிட்ட அவர், உலகம் முழுவதும் அதிக அளவில் நினைவக உற்பத்தி செய்யப்பட வேண்டும் என்பதே தனது விருப்பம் என்றும் தெரிவித்தார்.
“மக்கள் தங்களது கணினிகளில் தங்களுக்குத் தேவையான அளவு ரேமை வைத்துக்கொள்ள வேண்டும். உலகம் முழுவதும் அதிக அளவில் நினைவகத்தை உற்பத்தி செய்ய வேண்டும் என்பதற்காக நான் நீண்டகாலமாக வலியுறுத்தி வருகிறேன்” என்றும் அவர் விளக்கமளித்தார்.
மற்றொரு பதிவில், “உங்களிடம் அதிக அளவு ரேம் இருக்க வேண்டும் என்பதே எனது விருப்பம். அதிகமாக உற்பத்தி செய்வோம்” என்ற கருத்தையும் அவர் பகிர்ந்தார்.
செயற்கை நுண்ணறிவு நிறுவனங்களின் டேட்டா சென்டர்களுக்கு அதிக அளவில் நினைவகச் சிப்கள் தேவைப்படும் நிலையில், தனிப்பட்ட கணினிப் பயனர்களுக்கும் அதே வளங்கள் தேவைப்படுகின்றன. இந்த இரு தரப்பினருக்கும் இடையிலான தேவையை எவ்வாறு சமநிலைப்படுத்துவது என்ற விவாதத்தை சாம் ஆல்ட்மேனின் கருத்துகள் மீண்டும் முன்னிலைப்படுத்தியுள்ளன.