நியூசிலாந்தின் வடக்குத் தீவின் தெற்குப் பகுதியில் உள்ள கடற்கரையில் 50-க்கும் மேற்பட்ட பைலட் திமிங்கலங்கள் கரை ஒதுங்கியதில் பெரும்பாலானவை உயிரிழந்துள்ளன. இந்தச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
நியூசிலாந்தின் கேப் பல்லிசர் அருகே உள்ள ந்காவி கடற்கரைப் பகுதியில், பாறைகளுக்கு இடையே திமிங்கலங்கள் சிக்கியிருப்பது கண்டறியப்பட்டது. இரவு நேரத்தில் திமிங்கலங்கள் கரை ஒதுங்கியதாக உள்ளூர் மக்கள் தெரிவித்தனர். ஆரம்பத்தில் குறைந்தது 20 திமிங்கலங்கள் கரை ஒதுங்கியதாக அதிகாரிகள் தெரிவித்த நிலையில், உள்ளூர் மக்களின் கணக்குப்படி சுமார் 50 திமிங்கலங்கள் பாதிக்கப்பட்டிருந்தன.
திமிங்கலங்களை மீட்க நியூசிலாந்து பாதுகாப்புத் துறை அதிகாரிகள், உள்ளூர் மவோரி சமூகத்தினர் மற்றும் ‘ப்ராஜெக்ட் ஜோனா’ என்ற கடல்வாழ் உயிரின மீட்புக் குழுவினர் இணைந்து செயல்பட்டனர். உயிருடன் இருந்த திமிங்கலங்களை ஈரமாகவும் குளிர்ச்சியாகவும் வைத்திருக்க, தண்ணீர் மற்றும் துணிகளைப் பயன்படுத்தி தன்னார்வலர்கள் உதவினர்.
சில திமிங்கலங்களை மீண்டும் கடலுக்குள் விடும் முயற்சியும் மேற்கொள்ளப்பட்டது. இருப்பினும், காயங்கள் மற்றும் உடல்நலக் குறைவு காரணமாக பெரும்பாலான திமிங்கலங்கள் உயிரிழந்தன. மீட்புப் பணிகளுக்குப் பிறகும் உயிர் பிழைத்திருந்த திமிங்கலங்களும் உயிரிழந்ததாகத் தகவல்கள் தெரிவிக்கின்றன.
நியூசிலாந்து மற்றும் ஆஸ்திரேலியக் கடற்கரைகளில் பைலட் திமிங்கலங்கள் கூட்டமாகக் கரை ஒதுங்குவது அவ்வப்போது நிகழும் சம்பவமாகும். ஆனால், இந்தத் திமிங்கலங்கள் கரை ஒதுங்கியதற்கான துல்லியமான காரணம் இதுவரை கண்டறியப்படவில்லை.
திமிங்கலங்களின் உயிரிழப்பு அப்பகுதி மக்களிடையே சோகத்தை ஏற்படுத்தியுள்ள நிலையில், உயிரிழந்த திமிங்கலங்களுக்கு மரியாதை செலுத்தும் நடவடிக்கைகளிலும் உள்ளூர் சமூகத்தினர் ஈடுபட உள்ளனர்.
இஸ்ரேலில் அடுத்த பிரதமர் யார்? கட்சித் தலைவர்களுடன் அதிபர் ஹெர்ஸாக் 2-வது நாளாக தீவிர ஆலோசனை!