அமெரிக்க விண்வெளி ஆய்வு நிறுவனமான நாசா (NASA) விண்ணில் செலுத்திய 1.5 டன் எடையுள்ள விண்வெளித் தொலைநோக்கி பூமியின் வளிமண்டலத்தை நோக்கி வேகமாக இறங்கி வருகிறது. நவம்பர் 4-ஆம் தேதி பூமியின் வளிமண்டலத்தில் மீண்டும் நுழையும் என எதிர்பார்க்கப்படும் இந்தத் தொலைநோக்கியின் பாகங்கள் இந்தியாவின் சில பகுதிகளில் விழுவதற்கான சாத்தியம் இருப்பதாக விஞ்ஞானிகள் தெரிவித்துள்ளனர்.
குறிப்பாக சென்னை, பெங்களூரு, மும்பை, ஹைதராபாத் உள்ளிட்ட நகரங்கள் சாத்தியமான விண்வெளிக் குப்பைகள் விழும் பகுதிக்குள் வருவதால் பரபரப்பு ஏற்பட்டுள்ளது.
22 ஆண்டுகளாக விண்வெளியில் செயல்பட்ட தொலைநோக்கி!
நாசாவின் ‘நீல் கெஹ்ரல்ஸ் ஸ்விஃப்ட் அப்சர்வேட்டரி’ (Neil Gehrels Swift Observatory) என்ற இந்த விண்வெளித் தொலைநோக்கி கடந்த 2004-ஆம் ஆண்டு நவம்பர் 20-ஆம் தேதி விண்ணில் செலுத்தப்பட்டது.
விண்வெளியில் ஏற்படும் காமா கதிர் வெடிப்புகள் (Gamma-Ray Bursts), சூப்பர்நோவா எனப்படும் நட்சத்திர வெடிப்புகள் மற்றும் கருந்துளைகள் தொடர்பான நிகழ்வுகளை ஆய்வு செய்வதற்காக இது உருவாக்கப்பட்டது.
இரண்டு ஆண்டுகள் மட்டுமே செயல்படும் வகையில் வடிவமைக்கப்பட்ட இந்தத் தொலைநோக்கி, எதிர்பார்ப்புகளைத் தாண்டி சுமார் 22 ஆண்டுகள் விண்வெளியில் செயல்பட்டு பல்வேறு முக்கியமான அறிவியல் தகவல்களை வழங்கியுள்ளது.
இதுவரை 2,000-க்கும் மேற்பட்ட காமா கதிர் வெடிப்புகளையும், 1,400-க்கும் அதிகமான சூப்பர்நோவா நிகழ்வுகளையும் ஆய்வு செய்துள்ளது.
நவம்பர் 4-ல் பூமியின் வளிமண்டலத்தில் நுழையும்!
விண்வெளியில் அதன் சுற்றுப்பாதை படிப்படியாகத் தாழ்ந்து வந்த நிலையில், சூரியனின் அதிகரித்த செயல்பாடுகளால் ஏற்பட்ட வளிமண்டல இழுவிசை அதன் இறக்கத்தை மேலும் வேகப்படுத்தியுள்ளது.
இதன் சுற்றுப்பாதையை உயர்த்தி மீண்டும் செயல்பட வைப்பதற்காக மேற்கொள்ளப்பட்ட மீட்பு முயற்சியும் தோல்வியடைந்தது. இதையடுத்து அக்டோபர் மாதத்தில் அதன் அறிவியல் செயல்பாடுகள் நிறுத்தப்பட்டன.
இந்நிலையில், நவம்பர் 4-ஆம் தேதி இந்திய நேரப்படி பிற்பகல் சுமார் 2 மணியளவில் பூமியின் வளிமண்டலத்தில் நுழையலாம் என நாசா கணித்துள்ளது. இருப்பினும், சுமார் 11 மணி நேரம் வரை நேரக் கணிப்பில் மாற்றம் இருக்கலாம் என்பதால் துல்லியமான நேரம் உறுதியாகவில்லை.
சென்னை, பெங்களூரு உள்ளிட்ட நகரங்கள் பாதிப்பு மண்டலத்திற்குள்!
இந்த விண்வெளித் தொலைநோக்கியின் சுற்றுப்பாதை பூமத்திய ரேகைக்கு வடக்கிலும் தெற்கிலும் சுமார் 20.6 டிகிரி அட்சரேகை வரை பரவியுள்ளது.
இதனால் இந்தியாவில் தாமன் முதல் ஒடிசாவின் கட்டாக் வரையிலான கற்பனைக் கோட்டுக்குத் தெற்கே உள்ள பகுதிகள் சாத்தியமான பாதிப்பு மண்டலத்திற்குள் வருகின்றன.
இதில் சென்னை, பெங்களூரு, மும்பை, ஹைதராபாத் உள்ளிட்ட நகரங்களும் அடங்குகின்றன. அதேநேரத்தில் டெல்லி, கொல்கத்தா உள்ளிட்ட வட இந்தியாவின் பெரும்பாலான பகுதிகள் இந்த மண்டலத்திற்கு வெளியே உள்ளன.
ஆனால், இந்த நகரங்கள் அனைத்திலும் விண்வெளித் தொலைநோக்கியின் பாகங்கள் விழும் என்று அர்த்தமல்ல. இது அதன் சுற்றுப்பாதை கடந்து செல்லக்கூடிய பரந்த மண்டலம் மட்டுமே. உண்மையில் எந்தப் பகுதியில் அது வளிமண்டலத்திற்குள் நுழையும் என்பது துல்லியமாகக் கணிக்க முடியாத நிலையில் உள்ளது.
பெரும்பாலான பாகங்கள் எரிந்து சாம்பலாகும்!
பூமியின் வளிமண்டலத்திற்குள் அதிவேகமாக நுழையும்போது ஏற்படும் கடுமையான வெப்பத்தால் தொலைநோக்கியின் பெரும்பாலான பாகங்கள் எரிந்து அழிந்துவிடும் என எதிர்பார்க்கப்படுகிறது.
இருப்பினும், அதிக அடர்த்தி கொண்ட டங்ஸ்டன் (Tungsten) பாகங்கள் மற்றும் கண்ணாடிப் பகுதிகளில் சில பூமியை வந்தடைய வாய்ப்புள்ளதாக விஞ்ஞானிகள் தெரிவித்துள்ளனர்.
பூமியின் பரப்பில் சுமார் 70 சதவீதம் கடல் என்பதால், எஞ்சிய பாகங்கள் கடலில் விழுவதற்கான வாய்ப்பே அதிகம் என்றும் நிபுணர்கள் கூறுகின்றனர்.
மேலும், இந்த விண்வெளித் தொலைநோக்கியின் பாகங்கள் மக்கள் வசிக்கும் பகுதிகளில் விழுந்து பாதிப்பை ஏற்படுத்துவதற்கான வாய்ப்பு மிகவும் குறைவு எனவும் தெரிவிக்கப்பட்டுள்ளது.
கண்காணிப்பில் இஸ்ரோ!
இந்திய விண்வெளி ஆய்வு நிறுவனமான இஸ்ரோவிடம் (ISRO), ஸ்ரீஹரிகோட்டாவில் விண்வெளிப் பொருட்களைக் கண்காணிக்கும் மல்டி ஆப்ஜெக்ட் டிராக்கிங் ரேடார் (MOTR) வசதி உள்ளது.
செயற்கைக்கோள்கள் மற்றும் ராக்கெட்டுகளின் பாகங்கள் பூமியின் வளிமண்டலத்திற்குள் நுழையும் இறுதிக்கட்டத்தை இந்த ரேடார் மூலம் கண்காணிக்க முடியும்.
இருப்பினும், தற்போது நாசாவின் ஸ்விஃப்ட் தொலைநோக்கியை இஸ்ரோ கண்காணித்து வருகிறதா என்பது குறித்து அதிகாரப்பூர்வத் தகவல் வெளியாகவில்லை.
22 ஆண்டுகளாக விண்வெளி ஆய்வில் முக்கியப் பங்காற்றிய தொலைநோக்கி பூமிக்குத் திரும்பும் நிலையில், அதன் இறுதிக்கட்ட நகர்வுகளை உலக நாடுகளின் விண்வெளி ஆய்வு நிறுவனங்கள் தொடர்ந்து கண்காணித்து வருகின்றன.