Homeசெய்திகள்உலகம்சீனாவில் தொடங்கியது APEC உச்சிமாநாடு: ஒரே மேடையில் டிரம்ப், புதின், ஜி ஜின்பிங்! – உலக...

சீனாவில் தொடங்கியது APEC உச்சிமாநாடு: ஒரே மேடையில் டிரம்ப், புதின், ஜி ஜின்பிங்! – உலக நாடுகள் மத்தியில் பெரும் எதிர்பார்ப்பு!

-

- Advertisement -

சீனாவின் குவாங்டாங் மாகாணத்தில் உள்ள ஷென்சென் நகரில் 33-வது ஆசிய-பசிபிக் பொருளாதார ஒத்துழைப்பு (APEC) அமைப்பின் தலைவர்கள் உச்சிமாநாடு இன்று (நவம்பர் 19) கோலாகலமாகத் தொடங்கியது. இந்த மாநாட்டின் முக்கிய நிகழ்வாக, சீன அதிபர் ஜி ஜின்பிங், அமெரிக்க அதிபர் டொனால்ட் டிரம்ப் மற்றும் ரஷ்ய அதிபர் விளாடிமிர் புதின் ஆகியோர் பங்கேற்கும் முத்தரப்புச் சந்திப்பு நடைபெற உள்ளதால் உலக நாடுகள் மத்தியில் பெரும் எதிர்பார்ப்பு ஏற்பட்டுள்ளது.

‘எதிர்காலத்தை ஒன்றாக வளப்படுத்துவோம், வெற்றி பெறுவோம்’ என்ற மையக்கருத்துடன் இரண்டு நாட்கள் நடைபெறும் இந்த உச்சிமாநாட்டில், 21 உறுப்பு நாடுகளின் தலைவர்கள் மற்றும் 2,000-க்கும் மேற்பட்ட வணிக மற்றும் அரசியல் பிரதிநிதிகள் கலந்து கொண்டுள்ளனர். மாநாட்டின் தலைவரான சீன அதிபர் ஜி ஜின்பிங் தொடக்க உரையாற்றினார்.

1989-ஆம் ஆண்டு நிறுவப்பட்ட APEC அமைப்பு, உலக மொத்த உள்நாட்டு உற்பத்தியில் 60 சதவீதத்திற்கும் அதிகமான பங்கையும், உலக மக்கள் தொகையில் சுமார் 40 சதவீதத்தையும் பிரதிநிதித்துவப்படுத்துகிறது என்பது குறிப்பிடத்தக்கது.

முத்தரப்புச் சந்திப்பில் முக்கிய விவகாரங்கள்!

உலக அரசியலில் முக்கியத் திருப்புமுனையாகக் கருதப்படும் இந்தச் சந்திப்பில், அணு ஆயுதக் குறைப்பு, ரஷ்யா-உக்ரைன் போர், ஈரான் நெருக்கடி மற்றும் சர்வதேச வர்த்தகப் பிரச்சினைகள் குறித்து மூன்று தலைவர்களும் விவாதிக்க உள்ளனர்.

ஈரான் மற்றும் உக்ரைனில் தொடர்ந்து வரும் போர்கள், காசா மீதான இஸ்ரேலின் தாக்குதல்கள் ஆகியவற்றுக்கு மத்தியில், உலக அமைதி தொடர்பான முக்கிய விவகாரங்கள் குறித்து ஆலோசிக்கப்படும் என்று சீன வெளியுறவு அமைச்சகம் தெரிவித்துள்ளது.

இந்த ஆண்டில் அமெரிக்க அதிபர் டொனால்ட் டிரம்ப் மற்றும் சீன அதிபர் ஜி ஜின்பிங் சந்தித்துக் கொள்வது இது மூன்றாவது முறையாகும்.

அணு ஆயுதக் குறைப்பு: அமெரிக்கா, ரஷ்யாவுக்கு சவால்!

அணு ஆயுதங்களைக் கைவிடுவதில் வல்லரசு நாடுகளுக்கு உள்ள சவால்களை அமெரிக்க அதிபர் டிரம்ப் ஒப்புக்கொண்டுள்ளார். இருப்பினும், இந்தச் சந்திப்பின் மூலம் பல முக்கிய முடிவுகளை எட்ட முடியும் என அவர் நம்பிக்கை தெரிவித்துள்ளார்.

ஸ்டாக்ஹோம் சர்வதேச அமைதி ஆராய்ச்சி நிறுவனத்தின் ஜனவரி 2026 தரவுகளின்படி, ரஷ்யாவிடம் 5,420 அணு ஆயுதங்களும், அமெரிக்காவிடம் 5,042 அணு ஆயுதங்களும் உள்ளன. அதேவேளையில், சீனாவிடம் சுமார் 620 அணு ஆயுதங்கள் மட்டுமே உள்ளதாகத் தெரிவிக்கப்பட்டுள்ளது.

அமெரிக்கா மற்றும் ரஷ்யாவுடன் ஒப்பிடும்போது தங்களிடம் அணு ஆயுதக் கையிருப்பு குறைவாக இருப்பதால், அணு ஆயுதக் குறைப்பு தொடர்பான பேச்சுவார்த்தைகளில் இணைய சீனா தொடர்ந்து மறுத்து வருகிறது.

கிம் ஜாங் உன்னை சந்திப்பாரா டிரம்ப்?

இந்த மாநாட்டிற்கு இடையே, காசா மீதான இஸ்ரேலின் தாக்குதல்கள் மற்றும் இரு நாடுகள் தீர்வு தொடர்பான சாத்தியக்கூறுகள் விவாதிக்கப்படுமா என்பது இன்னும் தெளிவாகவில்லை.

இதற்கிடையே, தனது ஆசியச் சுற்றுப்பயணத்தின்போது வடகொரியத் தலைவர் கிம் ஜாங் உன்னைச் சந்திக்க வாய்ப்புள்ளதாக டிரம்ப் சூசகமாகத் தெரிவித்துள்ளார். எனினும், இதுகுறித்து வடகொரிய தரப்பிலிருந்து இதுவரை அதிகாரப்பூர்வ அறிவிப்பு வெளியாகவில்லை.

உலகின் மூன்று முக்கிய வல்லரசுகளின் தலைவர்களும் ஒரே மாநாட்டில் பங்கேற்கும் சூழலில், இந்தச் சந்திப்பில் எடுக்கப்படும் முடிவுகள் சர்வதேச அரசியல், போர் பதற்றம் மற்றும் பொருளாதார உறவுகளில் என்ன மாதிரியான தாக்கத்தை ஏற்படுத்தும் என்ற எதிர்பார்ப்பு அதிகரித்துள்ளது.

ஷென்செனில் டிரம்ப் – புதின் – ஷி ஜின்பிங் சந்திப்பு: APEC மாநாட்டில் இந்தியா ஏன் பங்கேற்கவில்லை? பின்னணி என்ன?

MUST READ