SK 23 படத்தின் டைட்டில் குறித்து அறிவிப்பு வெளியாகி உள்ளது.
தமிழ் சினிமாவில் முக்கியமான இயக்குனர்களில் ஒருவராக வலம் வருபவர் ஏ.ஆர். முருகதாஸ். இவரது இயக்கத்தில் வெளியான தீனா, ரமணா, கத்தி, துப்பாக்கி ஆகிய வெற்றி படங்களை இயக்கி ரசிகர்கள் மனதில் நீங்கா இடம் பிடித்துள்ளார். தற்போது இவர், சல்மான் கான் நடிப்பில் சிக்கந்தர் எனும் திரைப்படத்தை இயக்கி வருகிறார். அதேசமயம் சிவகார்த்திகேயன் நடிப்பில் புதிய படம் ஒன்றையும் இயக்கி வருகிறார் ஏ.ஆர். முருகதாஸ். இந்த படம் சிவகார்த்திகேயனின் 23 வது படமாகும். இப்படத்தில் சிவகார்த்திகேயனுடன் இணைந்து ருக்மினி வசந்த், விக்ராந்த், வித்யூத் ஜம்வால், டான்சிங் ரோஸ் சபீர், பிஜு மேனன் மற்றும் பலர் நடிக்கின்றனர். ஸ்ரீ லட்சுமி மூவிஸ் நிறுவனம் இந்த படத்தை தயாரிக்கிறது. அனிருத் இதற்கு இசையமைக்கிறார். ஆக்சன் கலந்த கதைக்களத்தில் உருவாகும் இந்த படத்தின் படப்பிடிப்புகள் ஏற்கனவே தூத்துக்குடி, சென்னை ஆகிய பகுதிகளில் விறுவிறுப்பாக நடைபெற்று வந்தது.
தற்போது இந்த படத்தின் படப்பிடிப்பு இறுதிக்கட்டத்தை நெருங்கி உள்ளதாக சொல்லப்படுகிறது. இந்நிலையில் நடிகர் சிவகார்த்திகேயனின் 40வது பிறந்த நாளான இன்று (பிப்ரவரி 17) SK 23 படத்தின் டைட்டில் மற்றும் ஃபர்ஸ்ட் லுக் போஸ்டரை படக்குழு வெளியிட்டுள்ளது. அதன்படி இந்த படத்திற்கு மதராஸி என்ற தலைப்பு வைக்கப்பட்டிருக்கிறது. இது குறித்த கிளிம்ப்ஸ் வீடியோவில் நடிகர் சிவகார்த்திகேயன் வெறித்தனமான லுக்கில் மிரட்டுகிறார். இந்த வீடியோ தற்போது இணையத்தில் வைரலாகி வருகிறது.