SK 25 படத்தின் முக்கிய அறிவிப்பு நாளை வெளியாகும் என அறிவிக்கப்பட்டுள்ளது.
தமிழ் சினிமாவில் இறுதிச்சுற்று, சூரரைப் போற்று ஆகிய படங்களின் மூலம் ரசிகர்கள் மத்தியில் மிகவும் பிரபலமானவர் சுதா கொங்கரா. இவரது இயக்கத்தில் தற்போது உருவாகி வரும் திரைப்படம் தான் SK 25. இந்த படத்தில் சிவகார்த்திகேயன் கதாநாயகனாக நடிக்கிறார். சிவகார்த்திகேயனின் 25 வது படமாக உருவாகும் இந்த படத்தினை டான் பிக்சர்ஸ் நிறுவனம் தயாரிக்க ஜி.வி. பிரகாஷ் இதற்கு இசையமைக்கிறார். இந்த படத்தில் சிவகார்த்திகேயன் தவிர அதர்வா, ஸ்ரீலீலா ஆகியோர் முக்கிய கதாபாத்திரங்களில் நடிக்கின்றனர். ஜெயம் ரவி இப்படத்தில் வில்லனாக நடிக்கிறார். இந்த படமானது ஏற்கனவே சூர்யா நடிக்க இருந்து கைவிடப்பட்ட புறநானூறு திரைப்படம் என்பது குறிப்பிடத்தக்கது. இந்த படமானது 1965 ஆம் ஆண்டு நடந்த இந்தி திணைப்பை மையமாகக் கொண்டு உருவாக்கப்படுகிறது. அதன்படி கடந்த ஆண்டு டிசம்பர் மாதத்தில் இந்த படத்தின் படப்பிடிப்பு பூஜையுடன் தொடங்கப்பட்டு விறுவிறுப்பாக நடைபெற்று வருகிறது.
மிகுந்த எதிர்பார்ப்புகளுடன் உருவாகி வரும் இந்த படத்திற்கு 1965 அல்லது பராசக்தி என்று தலைப்பு வைக்கப்பட்டிருப்பதாக சமீபகாலமாக சமூக வலைதளங்களில் பல தகவல்கள் பரவி வருகின்றன. இந்நிலையில் இந்த படத்தின் முக்கிய அறிவிப்பு நாளை (ஜனவரி 28) மாலை 5 மணி அளவில் வெளியாகும் என படக்குழு புதிய போஸ்டர் ஒன்றை வெளியிட்டு அதிகாரப்பூர்வமாக அறிவித்துள்ளது. எனவே இது டைட்டில் குறித்த அறிவிப்பாக இருக்கலாம் என்று எதிர்பார்க்கப்படுகிறது.