“உண்மையை உண்மை என்றும், பொய்யை பொய் என்று அறிவதுதான் ஞானம்” என்ற புத்தரின் வாக்கினைச் சுட்டிக்காட்டி, தற்கால அரசியல் சூழலில் திராவிட இயக்கங்கள் குறித்தும் தலித் மக்களின் அரசியல் நிலைப்பாடு குறித்தும் பரப்பப்படும் பொய்ப் பிரசாரங்கள் குறித்துப் பிரபல எழுத்தாளர் அழகியபெரியவன் எழுதியுள்ள சிந்தனைத் தாக்கம் தமிழ் அரசியல் களத்தில் பெரும் விவாதத்தை ஏற்படுத்தியுள்ளது. விதிவிலக்குகளைப் பொதுமைப்படுத்தி, திசைதிருப்பும் வேலைகளைச் சில தோழர்கள் அதிகாரத்தின் துணையோடு செய்து வருவதாக அவர் அதில் கடுமையாகச் சாடியுள்ளார்.
பெரியாரைத் தொடர்ந்து அம்பேத்கரைக் குறிவைக்கும் ஆபத்து
தலித் மக்களுக்குத் திமுகவை எதிரியாக நிறுத்தும் அபாயகரமான வேலையைச் சில தோழர்கள் திட்டமிட்டுச் செய்து வருவதாகக் குறிப்பிட்ட எழுத்தாளர், இது எதிர்கால சமூகக் கருத்தியலில் கடுமையான எதிர்விளைவுகளை ஏற்படுத்தும் என்று எச்சரித்துள்ளார்.
முன்பு பெரியாரைத் தலித் மக்களுக்கு எதிரானவராகச் சித்தரித்ததன் பலனை இந்துத்துவ அமைப்புகளும், சாதிய சக்திகளுமே அறுவடை செய்தன என்பதை அவர் சுட்டிக்காட்டியுள்ளார். அதேபோன்று, எதிர்காலத்தில் அம்பேத்கரின் பெயருக்கும் களங்கம் விளைவிக்கும் வகையில், “அம்பேத்கருக்கு முன்பே எங்கள் அயோத்திதாசர், எங்களுக்கு அம்பேத்கரும் முக்கியமில்லை, நாங்கள் ஆண்ட பரம்பரை” என்ற ரீதியில் சில அறிவார்ந்த தோழர்கள் பேசத் தொடங்கியிருப்பது கவலை அளிப்பதாகக் குறிப்பிட்டுள்ளார்.
ஒடுக்கப்பட்ட மக்களும் திராவிட இயக்கத்தின் பங்கும்
“தலித் மக்களுக்குத் திமுக ஒன்றும் செய்யவில்லை; 60% பேர் இன்னும் குடிசைகளில்தான் வாழ்கிறார்கள்” என்று குற்றஞ்சுமத்தும் தோழர்களின் பெரும்பாலான முன்னோர்கள் திராவிட முன்னேற்றக் கழகத்தில்தான் இருந்திருப்பார்கள் என்பதே வரலாற்று உண்மை என்கிறார் அழகியபெரியவன். ஒடுக்கப்பட்ட மக்களைப் பொதுச்சமூகத்துடன் இணைத்து, அவர்களுக்குத் துணிவூட்டி, அரசியல் அதிகாரத்தை அளிப்பதில் திமுகவுக்கு மாபெரும் பங்கு உண்டு. தொடக்கக் காலத்தில் திமுகவை ‘ஒடுக்கப்பட்டோர் கட்சி’ என்றே பலரும் அழைத்தனர். இந்த வரலாற்று உண்ைமயின் மீது பொய் முலாம் பூச முடியாது என்று அவர் திட்டவட்டமாகத் தெரிவித்துள்ளார்.
பண்ணையாரிய மனோபாவமும் சனாதனப் பிம்பங்களும்
இத்தகைய விமர்சனங்களை வைப்பவர்கள் காங்கிரஸ் அல்லது அதிமுக மீதெல்லாம் கேள்விகளை எழுப்புவதில்லை என்பதை அவர் கேள்விக்குள்ளாக்கியுள்ளார். உள்வாங்குதலும் உட்செறித்தலும் சனாதனத்தின் பண்புகள் என்பதைப் புரிந்து கொள்ளாமல், சுயவிருப்பங்களுக்காக அதிகாரத்துடன் இணைந்து பொய்யான பிம்பங்களை உருவாக்குவது மாபெரும் பிழையாகும். பகுத்தறிவு, சுயமரியாதை மூலம் விழிப்புபெற்ற மக்களைத் திரைப்படக் கவர்ச்சியில் மூழ்கடித்து, அதன் திரைமறைவில் சாதிய அமைப்புகளையும் சனாதன சக்திகளையும் வளர்த்தவர்கள் யார் என்பதைப் பொய் கலக்காமல் பேச முடியுமா என்றும் அவர் கேள்வி எழுப்பியுள்ளார்.
உண்மையான அம்பேத்கரிய கோட்பாடு என்ன?
அடையாள அதிகார அரசியலை மட்டுமே செய்வதல்ல உண்மையான அம்பேத்கரிய கோட்பாடு. இந்திய மண்ணில் இன்றளவும் சாதியவாதிகள் சனாதனச் சட்டகத்துக்குள்ளேயே இயங்கும் நிலையில், சாதியாதிக்கக் கட்டமைப்பை நிர்மூலமாக்கிட ஆதரவு சக்திகளுடன் ஒன்றிணைந்து இயங்குவதே உண்மையான அம்பேத்கரியம் ஆகும். மக்களைக் குழப்பி திசைதிருப்பும் செயல்களைத் தவிர்த்து, உண்மையான சமூக மாற்றத்திற்கான களத்தில் தோழர்கள் நிற்க வேண்டும் என்பதே இவ்வட்டுரையின் சாரமாகும்.
வறட்சிப் பிடியில் தமிழகம்! உடனடியாக அவசரச் செயல் திட்டம் தேவை! -அம்மா கோபி, மூத்த பத்திரிகையாளர்.