ஒரு முழுநீள மலையாளத் திரைப்படத்தில் நடிக்க வேண்டும் என்ற எனது 20 ஆண்டுகால ஆசை ‘என்ன விலை’ திரைப்படத்தின் மூலம் நிறைவேறியுள்ளது” என நடிகர் கருணாஸ் நெகிழ்ச்சியுடன் தெரிவித்துள்ளார்.
திரைப்பட ட்ரெய்லர் வெளியீட்டு விழா
நடிகர் கருணாஸ் மற்றும் நிமிஷா சஜயன் முதன்மை கதாபாத்திரங்களில் நடித்துள்ள ‘என்ன விலை’ திரைப்படத்தின் ட்ரெய்லர் வெளியீட்டு விழா சென்னை சாலிகிராமத்தில் நடைபெற்றது.
இதில் படத்தின் இயக்குநர் சஜீவ் பழூர், நடிகர் கருணாஸ் உள்ளிட்ட படக்குழுவினர் பலர் கலந்து கொண்டனர்.
இயக்குநர் சஜீவ் பழூர் பேச்சு
விழாவில் பேசிய இயக்குநர் சஜீவ் பழூர், “சமுதாயத்தில் கட்டாயம் பேசப்பட வேண்டிய ஒரு முக்கியமான கருத்தை இந்தப் படம் பேசுகிறது.
நடிகர்களின் சிறப்பான பங்களிப்பு கதைக்கு மிகப்பெரிய பலம் சேர்த்துள்ளது. எனக்குத் தமிழ் மொழி மிகவும் பிடிக்கும் என்பதால், தமிழில் இயக்குநராக அறிமுகமாக வேண்டும் என்பது எனது நீண்ட நாள் விருப்பமாக இருந்தது. குறிப்பாக 2000-ஆம் ஆண்டுக்குப் பிறகு வெளியான தமிழ் சினிமாக்கள் என்னை மிகவும் கவர்ந்தன” என்று குறிப்பிட்டார்.
20 ஆண்டுகால ஆசை நிறைவேறியது
இதனைத் தொடர்ந்து பேசிய நடிகர் கருணாஸ், “2001-இல் பாலா அண்ணனின் ‘நந்தா’ படம் மூலம் நான் அறிமுகமானேன்.
அன்றைய காலகட்டத்தில் இருந்தே மலையாளத் திரைப்படங்களை அதிகம் ரசித்துப் பார்ப்பேன்.
எளிய கதைக் கருவை வைத்துக்கொண்டு நேர்த்தியான முழுநீளப் படங்களை அவர்கள் உருவாக்குவார்கள்.
அப்போதே அதுபோன்ற ஒரு மலையாளப் படத்தில் நடிக்க வேண்டும் என்ற ஆசை எனக்குள் இருந்தது. அது இப்போது சாத்தியமாகியுள்ளது” என்றார்.
தயாரிப்பாளரின் நம்பிக்கை
மேலும் பேசிய அவர், “என்னை நம்பி 7 கோடி ரூபாய் பட்ஜெட்டில் படம் எடுக்க சினிமா தெரிந்தவர்கள் யாரும் முன்வர மாட்டார்கள் என்பதை முதல் நாளிலேயே தயாரிப்பாளரிடம் கூறிவிட்டேன்.
ஆனால், கதையை மட்டுமே நம்பி துணிச்சலாக இப்படத்தைத் தயாரித்துள்ளனர். வியாபாரத்தைப் பற்றி கவலைப்படாமல் ஒரு நல்ல கதையை உருவாக்கியிருப்பது மகிழ்ச்சியளிக்கிறது” எனக் கூறினார்.
திரைவிமர்சனம்: ஜி.வி.பிரகாஷின் ஃபேண்டஸி காதல் த்ரில்லர் – ரசிகர்களைக் கவர்ந்ததா?