நாளை ஒரே நாளில் 6 தமிழ் படங்கள் வெளியீடு
ஜெயம் ரவி நடிப்பில் உருவான அகிலன் திரைப்படம் நாளை திரைக்கு வருகிறது. என்.கல்யாண கிருஷ்ணன் இயக்கத்தில் உருவான இந்த படத்தில் ப்ரியா பவானி சங்கர், தான்யா ரவிச்சந்திரன் ஆகியோர் முக்கிய கதாபாத்திரத்தில் நடித்துள்ளனர். ஸ்கிரீன் சீன் நிறுவனம் தயாரித்த இந்த படத்துக்கு சாம்.சி.எஸ். இசையமைத்துள்ளார். பூலோகம் படத்துக்கு பின் அகிலன் படத்தின் மூலம் 2-வது முறையாக இயக்குநருடன் கைக்கோர்த்துள்ளார் நடிகர் ஜெயம் ரவி.
அதேபோல் வரலட்சுமி சரத்குமார், சந்தோஷ் முன்னணி கதாபாத்திரத்தில் நடித்த ‘கொன்றால் பாவம்‘ படம் நாளை திரையரங்குகளில் வெளியாகிறது. ஈஸ்வரி ராவ், சார்லி, மனோபாலா, சென்றாயன் உள்ளிட்ட பலர் இந்த படத்தில் நடித்துள்ளனர். ஸ்ரீ மோகன் ஹபு அவர்களின் கன்னட நாடகத்தை அடிப்படையாகக் கொண்டு இப்படத்தின் கதை உருவாக்கப்பட்டுள்ளது. 1980-களில் நடைபெறும் கதைக்களமாக இப்படத்தை இயக்கி உள்ளார் இயக்குநர் தயாள் பத்மநாபன்.
நடிகர் வெற்றி நடிப்பில், இயக்குநர்கள் ஷியாம் மற்றும் ப்ரவீன் இயக்கத்தில் உருவாகியுள்ள “மெமரீஸ்” திரைப்படம் நாளை வெளியாக உள்ளது. இந்த படத்தில் பார்வதி அருண், ரமேஷ் திலக் ஆகியோர் முக்கிய கதாபாத்திரத்தில் நடித்துள்ளனர். ஒரு புதுமையான கதைக்களத்தில், திரில்லர் பாணியில் இப்படம் உருவாகியுள்ளது.
ஜூனியர் எம்.ஜி.ஆர். என அழைக்கப்படும் ராமச்சந்திரன் நாயகனாக நடித்துள்ள ‘இரும்பன்’ திரைப்படமும் நாளை திரைக்கு வருகிறது. கீரா இயக்கி உள்ள இந்த படத்தில் நகைச்சுவை நடிகர் யோகிபாபு முக்கிய கதாபாத்திரத்தில் நடித்துள்ளார். தமிழ் பாலா மற்றும் வினோத் குமார் இணைந்து தயாரித்துள்ள இந்த படத்துக்கு ஶ்ரீகாந்த் தேவா இசையமைத்திருக்கிறார். மேலும் ‘பியூட்டி’ மற்றும் ‘மான்வேட்டை’ திரைப்படங்களும் நாளை வெளியாக உள்ளன.
அதுமட்டுமில்லாமல் நேரடி ஓ.டி.டி.யில் வைபவ், ரம்யா பாண்டியன் நடிப்பில் உருவான Accidental Farmer And Co சோனி லைவ் ஓ.டி.டி. தளத்தில் நாளை வெளியாகிறது. மேலும் கடந்த 3-ம் தேதி திரைக்கு வந்த யோகிபாபுவின் பொம்மை நாயகி, ஆர்.ஜே.பாலாஜியின் ரன் பேபி ரன் மற்றும் கவினின் டாடா படங்களும் வெவ்வேறு ஓ.டி.டி. தளங்களில் நாளை வெளியாக உள்ளன.