தனுஷ் நடிக்கும் குபேர படத்தின் இரண்டாவது பாடல் குறித்த அறிவிப்பு வெளியாகியுள்ளது.
நடிகர் தனுஷ் தற்போது இட்லி கடை, தேரே இஷ்க் மெய்ன் ஆகிய படங்களை கைவசம் வைத்திருக்கிறார். இதற்கிடையில் இவர் குபேரா எனும் திரைப்படத்தில் நடித்து முடித்துள்ளார். தனுஷின் 51வது படமான இந்த படத்தை பிரபல தெலுங்கு இயக்குனர் சேகர் கம்முலா இயக்கியுள்ளார். ஶ்ரீ வெங்கடேஸ்வரா சினிமாஸ் நிறுவனம் இந்த படத்தை தயாரிக்க தேவி ஸ்ரீ பிரசாத் இதற்கு இசையமைத்துள்ளார். இதில் தனுஷுடன் இணைந்து நாகர்ஜுனா, ராஷ்மிகா மந்தனா ஆகியோர் முக்கிய கதாபாத்திரங்களில் நடித்திருக்கின்றனர். ஏற்கனவே இந்த படத்தின் படப்பிடிப்புகள் நிறைவடைந்த நிலையில் படமானது வருகின்ற ஜூன் 20 ஆம் தேதி திரைக்கு வர தயாராகி வருகிறது. அதாவது பிரம்மாண்ட பட்ஜெட்டில் எடுக்கப்பட்ட இப்படம் தமிழ், தெலுங்கு, மலையாளம், இந்தி, கன்னடம் ஆகிய மொழிகளில் ரிலீஸாக உள்ளது.
இதற்கிடையில் இந்த படத்தில் இருந்து அடுத்தடுத்து போஸ்டர்களும், டீசரும் வெளியாகி ஏகபோக வரவேற்பை பெற்றுள்ளது. இது தவிர இந்த படத்தில் இருந்து முதல் பாடலும் வெளியாகி ரசிகர்களை கவர்ந்தது. இந்நிலையில் அடுத்ததாக வருகின்ற ஜூன் 2ஆம் தேதி இந்த படத்தில் இருந்து இரண்டாவது பாடல் வெளியாகும் என அதிகாரப்பூர்வமாக அறிவிக்கப்பட்டுள்ளது.