நடிகர் கமல்ஹாசன் தற்போது பல படங்களில் நடிப்பதற்கு கமிட்டாகி வருகிறார். அந்த வகையில் சில மாதங்களுக்கு முன்பாக தீரன் அதிகாரம் ஒன்று, நேர்கொண்ட பார்வை, வலிமை, துணிவு உள்ளிட்ட படங்களை இயக்கிய எச். வினோத் இயக்கத்தில், புதிய படம் ஒன்றில் கமல்ஹாசன் நடிக்க இருப்பதாக அறிவிப்பு வெளியானது. அதன்படி தற்காலிகமாக KH233 என்று தலைப்பு வைக்கப்பட்டுள்ள இந்தப் படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்க உள்ளதாகவும் தெரிவிக்கப்பட்டது. ஆனால் அதை தொடர்ந்து படப்பிடிப்பு சம்பந்தமான எந்த தகவலும் வெளியாகவில்லை. இதற்கிடையில் நடிகர் கமல்ஹாசன் மணிரத்னம் இயக்கத்தில் தக் லைஃப் படத்தில் நடிப்பதற்கு கமிட்டாகி படப்பிடிப்புகளும் தொடங்கப்பட்டு விட்டன.
இந்நிலையில் சில தினங்களுக்கு முன்பாக KH233 படம் அதிகாரப்பூர்வமாக கைவிடப்பட்டதாக சமூக வலைதளங்களில் செய்திகள் வெளியானது. இந்த தகவல் ரசிகர்களிடையே பெரும் அதிர்ச்சியை ஏற்படுத்தியது.
இந்நிலையில் இப்படம் கைவிடப்படவில்லை என்று புதிய தகவல் கிடைத்துள்ளது. எனவே ரசிகர்கள் ஆவலுடன் எதிர்பார்த்து காத்துக் கொண்டிருக்கும் கமல்ஹாசன், எச் வினோத் கூட்டணியின் KH233 படமானது தக் லைஃப் படத்திற்கு பின் தொடங்கப்படும் எனவும், இந்த இடைவெளியில் எச் வினோத் தனுஷ் நடிப்பில் புதிய படம் ஒன்றை இயக்க இருக்கிறார் எனவும் கூறப்படுகிறது.