NTR 31 படத்தின் ரிலீஸ் தேதி ஒத்திவைக்கப்பட்டுள்ளது.
ஜூனியர் என்டிஆர் நடிப்பில் கடைசியாக தேவரா திரைப்படம் வெளியாகி கலவையான விமர்சனங்களை பெற்றாலும் வசூல் ரீதியாக வெற்றி பெற்றது. அதைத் தொடர்ந்து ஜூனியர் என்டிஆர், NTR 31 என்று தற்காலிகமாக தலைப்பு வைக்கப்பட்டிருக்கும் புதிய படத்தில் நடித்து வருகிறார். இந்த படத்தை கே ஜி எஃப் படத்தின் இயக்குனர் பிரசாந்த் நீல் இயக்குகிறார். நந்தமுரி தரகா ராமாராவ் ஆர்ட்ஸ் நிறுவனமும், மைத்ரி மூவி மேக்கர்ஸ் நிறுவனமும் இணைந்து தயாரிக்கிறது. ரவி பஸ்ரூர் இந்த படத்திற்கு இசை அமைக்கிறார். புவன் கௌடா இப்படத்திற்கு ஒளிப்பதிவு செய்கிறார். பிரம்மாண்ட பட்ஜெட்டில் மிகுந்த எதிர்பார்ப்புகளுடன் உருவாகும் இந்த படத்திற்கு டிராகன் என்ற தலைப்பு வைக்கப்பட்டிருப்பதாக சொல்லப்படுகிறது. அதேசமயம் இந்த படத்தில் ருக்மினி வசந்த் கதாநாயகியாக நடிக்கிறார் என்றும், ஸ்ருதிஹாசன் சிறப்பு பாடல் ஒன்றுக்கு நடனமாட இருக்கிறார் என்றும் தகவல் வெளியாகி வருகின்றன. ஆனால் அதிகாரப்பூர்வ அறிவிப்பு இதுவரை வெளியாகவில்லை. மேலும் இந்த படத்தின் படப்பிடிப்புகள் கடந்த சில தினங்களுக்கு முன்னர் தொடங்கி விறுவிறுப்பாக நடைபெற்று வருகின்றன. 
இதற்கிடையில் இப்படம் 2026 ஜனவரி 9ஆம் தேதி உலகம் முழுவதும் வெளியாகும் என அறிவிக்கப்பட்டிருந்தது. ஆனால் தற்போது படக்குழு இந்த படத்தின் ரிலீஸ் தேதியை ஒத்தி வைத்துள்ளது. அதாவது 2026 ஜூன் மாதம் 25ஆம் தேதி பட திரைக்கு வரும் என படக்குழு புதிய அறிவிப்பை வெளியிட்டுள்ளது.