இளையராஜாவிடம் வாழ்த்து பெற்ற பிரேம்ஜி – இந்து தம்பதி
- Advertisement -

தமிழ் சினிமாவில் பன்முகக் திறமை கொண்டவரான கங்கை அமரனுக்கு இரண்டு மகன்கள் உள்ளனர். பெரியவர் வெங்கட் பிரபு. இவர், தமிழ் சினிமாவில் முன்னணி இயக்குநராகவும், நடிகராகவும் வலம் வருகிறார். அதேபோல, இரண்டாவது மகன் பிரேம்ஜியும், பிரபல நடிகர் ஆவார். இதில் வெங்கட் பிரபுவுக்கு ஏற்கனவே திருமணமாகி குழந்தைகள் உள்ளனர். அதே சமயம், நடிகரும், இசை அமைப்பாளருமான பிரேம்ஜிக்கு இதுவரை திருமணம் ஆகவில்லை. முரட்டு சிங்கிள் என ரசிகர்கள் அவரை கொண்டாடுவது வழக்கமாகும்.

வெங்கட் பிரபு இயக்கும் பெரும்பாலான படங்களில் நடிகர் பிரேம்ஜிக்கு இடம் இருக்கும். தற்போது வெங்கட் பிரபு இயக்கத்தில் விஜய் நடித்து வரும் தி கோட் திரைப்படத்திலும் பிரேம்ஜி முக்கிய கதாபாத்திரத்தில் நடித்து வருகிறார். கடந்த 9-ம் தேதி திருத்தணி முருகன் கோயிலில் நடிகர் பிரேம்ஜி, தனது நீண்ட நாள் காதலியான இந்துவை திருமணம் செய்து கொண்டார். இந்த திருமண வைபோகத்தில் நெருங்கிய உறவினர்களும், நண்பர்களும் மட்டும் கலந்து கொண்டனர்.

இந்நிலையில், நடிகர் பிரேம்ஜியும் அவரது மனைவியான இந்தும், இசை அமைப்பாளரும், உறவினருமான இளையராஜாவை சந்தித்து வாழ்த்து பெற்றனர். புதுமணத் தம்பதியோடு, இளையராஜா எடுத்துக் கொண்ட புகைப்படமும் இணையத்தில் வைரலாகி வருகிறது.