கமல்ஹாசன் நடிப்பில், இயக்குநர் ஷங்கர் இயக்கத்தில் உருவாகி வரும் ‘இந்தியன் 3’ திரைப்படத்தின் பணிகள் மீண்டும் தொடங்கியிருப்பதை படக்குழு அதிகாரப்பூர்வமாக உறுதி செய்துள்ளது.
1996-ம் ஆண்டு வெளியான ‘இந்தியன்’ திரைப்படத்தின் வெற்றியைத் தொடர்ந்து, நீண்ட இடைவெளிக்குப் பிறகு உருவான ‘இந்தியன் 2’ திரைப்படம் கடந்த 2024-ம் ஆண்டு வெளியானது. படத்தின் இறுதியில் ‘இந்தியன் 3’ திரைப்படத்தின் காட்சிகள் இடம்பெற்றிருந்ததால், மூன்றாம் பாகத்தின் மீதான எதிர்பார்ப்பு ரசிகர்கள் மத்தியில் அதிகமாக இருந்தது.
ஆனால், ‘இந்தியன் 2’ திரைப்படம் எதிர்பார்த்த அளவுக்கு வரவேற்பையும் வசூலையும் பெறவில்லை. இதையடுத்து ‘இந்தியன் 3’ திரைப்படத்தின் பணிகள் தொடருமா என்ற கேள்வி எழுந்தது. நீண்ட காலமாக படத்தைப் பற்றிய அதிகாரப்பூர்வ தகவல் எதுவும் வெளியாகாமல் இருந்தது.
இந்நிலையில், ‘இந்தியன் 3’ படத்தின் பணிகள் மீண்டும் முன்னெடுக்கப்படுவதை லைகா புரொடக்ஷன்ஸ் நிறுவனம் அதிகாரப்பூர்வமாக அறிவித்துள்ளது.
படத்தின் புதிய போஸ்டரை வெளியிட்டுள்ள லைகா புரொடக்ஷன்ஸ், “சமரசம் இல்லாத மனநிலையுடன் சேனாபதி திரும்பிவிட்டார். ‘இந்தியன் 3: War Mode’ மூலம் அந்த மறுவருகை தொடங்குகிறது” என்ற அறிவிப்பை வெளியிட்டுள்ளது.
புதிய போஸ்டரில் மூன்று வீரர்கள் குதிரைகளில் வேகமாகப் பயணிப்பது போன்ற காட்சி இடம்பெற்றுள்ளது. இதன் மூலம் ‘இந்தியன் 3’ திரைப்படம் முந்தைய பாகங்களை விட வித்தியாசமான காலகட்டத்தையும், ஆக்ஷன் நிறைந்த கதைக்களத்தையும் கொண்டிருக்கலாம் என்ற எதிர்பார்ப்பு உருவாகியுள்ளது.
‘இந்தியன் 3’ திரைப்படத்தில் கமல்ஹாசன் மீண்டும் சேனாபதி கதாபாத்திரத்தில் நடிக்கிறார். மேலும், சித்தார்த், காஜல் அகர்வால், பிரியா பவானி சங்கர், பாபி சிம்ஹா மற்றும் எஸ்.ஜே.சூர்யா உள்ளிட்டோர் முக்கிய கதாபாத்திரங்களில் இடம்பெறுகின்றனர்.
இத்திரைப்படத்திற்கு அனிருத் இசையமைக்கிறார். ரவிவர்மன் ஒளிப்பதிவு செய்கிறார். லைகா புரொடக்ஷன்ஸ் நிறுவனம் படத்தை தயாரிக்கிறது.
‘இந்தியன் 3’ திரைப்படம் சேனாபதியின் பின்னணிக் கதையை மையமாகக் கொண்ட ப்ரீக்வெல் பகுதிகளையும் உள்ளடக்கியதாக கூறப்படுகிறது. குறிப்பாக, சுதந்திரப் போராட்ட காலத்துடன் தொடர்புடைய சேனாபதியின் தந்தை வீரசேகரன் பாலராம் கதாபாத்திரத்தையும் கமல்ஹாசன் ஏற்று நடிப்பதாக தகவல்கள் வெளியாகியுள்ளன.
தற்போது படத்தின் போஸ்ட் புரொடக்ஷன் பணிகள் தீவிரமாக நடைபெற்று வருவதாகவும் தகவல்கள் வெளியாகியுள்ளன. எனினும், ‘இந்தியன் 3’ திரைப்படத்தின் அதிகாரப்பூர்வ வெளியீட்டு தேதி இதுவரை அறிவிக்கப்படவில்லை.
‘War Mode’ என்ற புதிய அறிவிப்புடன் மீண்டும் களமிறங்கியுள்ள ‘இந்தியன் 3’, ‘இந்தியன் 2’ ஏற்படுத்திய ஏமாற்றத்தை சரிசெய்து ரசிகர்களின் எதிர்பார்ப்பை பூர்த்தி செய்யுமா என்ற எதிர்பார்ப்பு கோலிவுட் வட்டாரத்தில் எழுந்துள்ளது.
கௌதம் மேனனின் 25 ஆண்டு திரைப்பயணம்: கோலாலம்பூரில் ‘ஒன்றா ரெண்டா’ இசை விருந்து!