அட்லீ – விஜய் சேதுபதி கூட்டணியில் உருவாகும் புதிய படத்தின் கதாநாயகி குறித்த தகவல் வெளியாகி உள்ளது.
விஜய் சேதுபதி நடிப்பில் கடைசியாக ‘தலைவன் தலைவி’ திரைப்படம் வெளியானது. அடுத்தது ‘ட்ரெயின்’ திரைப்படம் திரைக்கு வர இருக்கிறது. இதற்கிடையில் விஜய் சேதுபதி, பூரி ஜெகன்நாத் இயக்கத்தில் புதிய படம் ஒன்றில் நடித்து வருகிறார். மேலும் கிருத்திகா உதயநிதி இயக்கத்தில் நடிப்பதற்கு கமிட்டாகி உள்ளதாகவும் சொல்லப்படுகிறது. அதே சமயம் பிக் பாஸ் நிகழ்ச்சியிலும் கவனம் செலுத்தி வருகிறார். இது தவிர, அட்லீ தயாரிப்பில் உருவாகும் புதிய படத்தில் நடித்து வருகிறார் விஜய் சேதுபதி. இந்த படத்தை நடுவுல கொஞ்சம் பக்கத்த காணோம், சீதக்காதி ஆகிய படங்களை இயக்கிய பாலாஜி தரணிதரன் இயக்கி வருகிறார். இந்த படத்தின் படப்பிடிப்பு ஏற்கனவே தொடங்கி சென்னை போன்ற பகுதிகளில் நடைபெற்று வந்தது. 
அதன்படி கிட்டத்தட்ட இரண்டு வார படப்பிடிப்பு நடைபெற்றதாக சொல்லப்படுகிறது. இதைத்தொடர்ந்து இதன் அடுத்த கட்ட படப்பிடிப்பு இந்த மாத இறுதியில் தொடங்கும் என தற்போதைய தகவல்கள் தெரிவிக்கின்றன. இந்நிலையில் இதன் கூடுதல் தகவல் என்னவென்றால், இந்த படத்தில் கதாநாயகியாக லிஜோமோல் ஜோஸ் நடித்து வருகிறாராம். இனிவரும் நாட்களில் மற்ற தகவல்கள் வெளியாகும் என்று நம்பப்படுகிறது.
நடிகை லிஜோமோல் ஜோஸ், ஜி.வி. பிரகாஷ், சித்தார்த் ஆகியோரின் நடிப்பில் வெளியான ‘சிவப்பு மஞ்சள் பச்சை’ திரைப்படத்தில் நடித்திருந்தார். அதைத்தொடர்ந்து சூர்யாவின் ‘ஜெய்பீம்’ படத்தில் தனது சிறந்த நடிப்பை வெளிப்படுத்தி பெயரையும் புகழையும் பெற்றார். மேலும் இவர் மலையாளப் படங்களிலும் கவனம் செலுத்தி வருகிறார் என்பது குறிப்பிடத்தக்கது.