அர்னாப் புயல் தாக்கத்தின் போது ஒடிசா மாநிலத்தில் 931 குழந்தைகள் பிறந்துள்ளன. புயலுக்கு முன்னதாக முன்னெச்சரிக்கை நடவடிக்கையாக மருத்துவமனைகளுக்கு மாற்றப்பட்ட கர்ப்பிணிப் பெண்களில் 931 பேர் பிரசவித்துள்ளதாக மாநில முதலமைச்சர் மோகன் சரண் மாஜி தெரிவித்துள்ளார். பிறந்த குழந்தைகளுக்கும் தாய்மார்களுக்கும் நலமாக இருப்பதாகவும் அவர் கூறியுள்ளார்.
2,245 கர்ப்பிணிப் பெண்கள் மருத்துவமனைகளுக்கு மாற்றம்
அர்னாப் புயல் ஒடிசாவின் தெற்குப் பகுதிகளில் கனமழையை ஏற்படுத்திய நிலையில், பாதுகாப்பான பிரசவத்தை உறுதி செய்வதற்காக மாநில அரசு முன்னெச்சரிக்கை நடவடிக்கைகளை மேற்கொண்டது.
புயல் கரையைக் கடப்பதற்கு முன்பாக 2,245 கர்ப்பிணிப் பெண்கள் பல்வேறு மருத்துவமனைகள் மற்றும் சுகாதார மையங்களுக்கு மாற்றப்பட்டனர். அவர்களில் 931 பெண்களுக்குப் புயல் காலகட்டத்தில் குழந்தைகள் பிறந்ததாக முதலமைச்சர் மோகன் சரண் மாஜி தெரிவித்துள்ளார்.
புயலின் பெயரில் குழந்தைகளுக்குப் பெயர் சூட்டிய பெற்றோர்
புயல் காலத்தில் குழந்தைகள் பிறந்ததை நினைவுகூரும் வகையில் சில பெற்றோர், தங்களது குழந்தைகளுக்குப் புயல் மற்றும் மழையுடன் தொடர்புடைய பெயர்களைச் சூட்டியுள்ளனர்.
ஆண் குழந்தைகளுக்கு ‘அர்னாப்’, ‘தூஃபான்’, ‘பவன்’ என்றும், பெண் குழந்தைகளுக்கு ‘வர்ஷா’, ‘பதாசி’ என்றும் பெயர்கள் சூட்டப்பட்டுள்ளதாக அதிகாரிகள் தெரிவித்துள்ளனர்.
பத்ராபூர் பகுதியைச் சேர்ந்த சுகந்தி பிரதான் என்ற பெண் ஆண் குழந்தையைப் பெற்றெடுத்தார். அவரது குடும்பத்தினர் அந்தக் குழந்தைக்கு ‘அர்னாப்’ எனப் பெயரிட்டனர்.
அதே மருத்துவமனையில் ருக்முணி பெஹெரா என்ற பெண் பெண் குழந்தையைப் பெற்றெடுத்தார். கனமழை பெய்த நேரத்தில் குழந்தை பிறந்ததால், அந்தக் குடும்பத்தினர் குழந்தைக்கு ‘வர்ஷாராணி’ எனப் பெயரிட்டனர்.
கஞ்சம் மாவட்டத்தில் 220 பிரசவங்கள்
ஒடிசாவின் கஞ்சம் மாவட்டத்தில் மட்டும் முன்னெச்சரிக்கை நடவடிக்கையாக அக்டோபர் 25 முதல் 493 கர்ப்பிணிப் பெண்கள் அருகிலுள்ள மருத்துவமனைகளுக்கு மாற்றப்பட்டனர்.
அவர்களில் 220 பெண்கள் பிரசவித்துள்ளதாக மாவட்ட சுகாதாரத் துறை அதிகாரி எஸ். காமேஸ்வர ராவ் தெரிவித்துள்ளார். பிறந்த குழந்தைகளில் 101 ஆண் குழந்தைகளும் 119 பெண் குழந்தைகளும் அடங்குவர். தாய்மார்களும் குழந்தைகளும் நலமாக இருப்பதாகவும், சிலர் ஏற்கெனவே மருத்துவமனைகளிலிருந்து வீடு திரும்பியுள்ளதாகவும் அவர் கூறியுள்ளார்.
அர்னாப் என்ற பெயரின் பொருள் என்ன?
அர்னாப் புயலுக்கு வங்கதேசம் பெயரிட்டது. இந்தப் பெயர் ‘ஓர்னாப்’ என உச்சரிக்கப்படுகிறது. கடல் அல்லது பரந்த நீர்நிலையைக் குறிக்கும் சமஸ்கிருதச் சொல்லான ‘அர்ணவ’ என்பதிலிருந்து இப்பெயர் வந்ததாகக் கூறப்படுகிறது. வங்காள மக்களிடையே அர்னாப் என்பது பொதுவாகப் பயன்படுத்தப்படும் பெயராகவும் உள்ளது.
வங்கக்கடல் மற்றும் அரபிக்கடல் பகுதிகளில் உருவாகும் புயல்களை அடையாளம் காண்பதற்காக, உலக வானிலை அமைப்பு மற்றும் ஐ.நா. அமைப்பின் தொடர்புடைய குழுவின் நடைமுறைகளின்படி புயல்களுக்குப் பெயர்கள் வழங்கப்படுகின்றன.
புயலால் கனமழை மற்றும் பாதிப்புகள் ஏற்பட்ட சூழலிலும், மருத்துவமனைகளில் முன்னெச்சரிக்கை ஏற்பாடுகள் செய்யப்பட்டதால் நூற்றுக்கணக்கான குழந்தைகள் பாதுகாப்பாகப் பிறந்துள்ளன. புயலின் நினைவாகப் பெற்றோர் குழந்தைகளுக்குப் பெயர் சூட்டியிருப்பதும் கவனம் பெற்றுள்ளது.
அர்னாப் புயல் பாதிப்பு: ஆந்திராவுக்கு உதவிக்கரம் நீட்டிய தெலுங்கானா அரசு!