மகாராஷ்டிராவில் பாஜகவின் சாதி அரசியல்: ஃபட்னாவிஸ்-க்கு பெரும் சிக்கல்..!

மகாராஷ்டிர முதல்வர் போட்டியில் ஷிண்டே வெளியேறினால், ஃபட்னாவிஸ் மீது சஸ்பென்ஸ் உள்ளது, எந்த சமன்பாட்டின் மூலம் பாஜக முதல்வராகும்?
மகாராஷ்டிராவில் முதல்வர் யார் என்ற சந்தேகம் இன்னும் நீடிக்கிறது. வினோத் தாவ்டே, அமித் ஷா சந்திப்புக்குப் பிறகு இது இன்னும் அதிகரித்துள்ளது. பா.ஜ., யாரை முதல்வராக்கினாலும் ஏற்றுக் கொள்ளக்கூடியவர் என ஏக்நாத் ஷிண்டே கூறியுள்ளார்.

Meet

மகாராஷ்டிராவின் புதிய முதல்வராக யார் நியமிக்கப்படுவார் என்பதை இந்தியாவே உற்று நோக்கி வருகிறது. சிவசேனா தலைவர் ஏக்நாத் ஷிண்டே, முதல்வர் போட்டியில் இருந்து தன்னை விலக்கிக் கொண்டார். பாஜக யாரை முன்னிருத்துகிறதோ அதனை ஏற்றுக் கொள்வதாக அவர் தெரிவித்து விட்டார். இதனால், தேவேந்திர ஃபட்னாவிஸ் முதல்வராகும் பாதை எளிதாகி விட்டது. ஆனால் பாஜகவில் அறிவிப்பு வெளியாகாத வரை, என்ன நடக்கும் என்பதை யூகிக்க முடியவில்லை.

பாஜக பொதுச் செயலாளர் வினோத் தாவ்டே நேற்று இரவு மத்திய உள்துறை அமைச்சர் அமித் ஷாவை சந்தித்தது முதல்வர் யார் என்ற சஸ்பென்ஸை மீண்டும் அதிகரித்துள்ளது. ஏனென்றால், பிரதமர் மோடியும், அமித் ஷாவும் எப்போது என்ன முடிவெடுப்பார்கள் என்பது யாருக்கும் தெரியாது. மகாராஷ்டிராவில் புதிய முதல்வர் என்பது குறித்து பாஜக தீவிரமாக ஆலோசித்து வருகிறது. தேர்தலில் மாபெரும் வெற்றி கிடைத்துள்ளதால் பாஜக ஒவ்வொரு அரசியல் சமன்பாட்டையும் ஒழுங்காக வைத்திருக்க விரும்புகிறது.

வினோத் தாவ்டே – அமித் ஷா, பாஜக உயர்மட்ட தலைவர்களுடன் ஷிண்டே-பட்னாவிஸ் மற்றும் அஜித் பவார் ஆகியோர் சந்தித்துப் பேசினர். அப்போது, ​​மகாராஷ்டிரா அரசியல் நிலைப்பாடு குறித்து அமித் ஷாவிடம் தவ்டே சில விஷயங்களை எடுத்துக் கூறியுள்ளார். இதனால், புதிய அரசியல் குழப்பம் ஏற்பட்டுள்ளதாக கூறப்படுகிறது.

அமித் ஷா – வினோத் தாவ்டே சந்திப்பு சுமார் அரை மணி நேரம் நீடித்தது. அப்போது​​ மகாராஷ்டிராவில் ஏற்பட்டுள்ள அரசியல் முன்னேற்றங்கள், புதிய ஆட்சி அமைப்பதற்கான முயற்சிகள் குறித்து தவ்டே பேசியுள்ளார். மாநில அரசியலில் ஷிண்டே முதல்வராக இல்லாமல் போனால் அதன் தாக்கம் எப்படி இருக்கும் எனவும் எடுத்துக் கூறியுள்ளார். மகாராஷ்டிராவின் மராட்டிய வாக்காளர்களுக்கு ஏற்படும் பாதிப்பு குறித்தும் பேசியுள்ளார்.

ஷிண்டே-ஃபட்னாவிஸ் , அஜித் பவார் உடனான சந்திப்புக்கு முன், அமித் ஷா தொடர்ந்து மகாராஷ்டிர தலைவர்களிடமிருந்து கருத்துக்களைப் பெற்று, புதிய முதல்வரின் பெயரில் அரசியல் லாபம், இழப்புகளை மதிப்பீடு செய்து வருகிறார். இப்படிப்பட்ட சூழ்நிலையில், வினோத் தாவ்டேவின் கருத்து ஃபட்னாவிஸ் முதல்வர் ஆவதற்கு சிரமத்தை உருவாக்கும் எனக் கூறப்படுகிறது.

தேவேந்திர ஃபட்னாவிஸ் பிராமண சமூகத்திலிருந்து வந்தவர். ஏக்நாத் ஷிண்டே மராட்டிய சமூகத்தைச் சேர்ந்தவர். மராட்டிய வாக்காளர்கள் மகாராஷ்டிராவில் மிகவும் முக்கியமானவர்கள். முதல்வர் பதவி குறித்து, ‘‘நான் பிரதமர் மோடி-அமித் ஷாவை அழைத்து நீங்கள் எந்த முடிவை எடுத்தாலும் ஏற்றுக்கொள்வோம் என்று கூறியுள்ளேன். பாஜக யாரை முதல்வராக தேர்வு செய்தாலும் அதை ஏற்றுக்கொள்வோம். ஆட்சி அமைப்பதில் தடைகளை ஏற்படுத்த மாட்டோம்’’ என. ஷிண்டே தெரிவித்த பிறகுதான், பாஜக மிகக் கவனமாகச் சிந்தித்து முதலமைச்சராக்க விரும்புகிறது. ஃபட்னாவிஸை முதல்வராக்கினால் மராட்டியர்களின் அதிருப்தியை சந்திக்கக்கூடும் அபாயம் உள்ளது.

மராட்டியம் அல்லாத ஒருவரை முதல்வராக்கினால் மராட்டிய சமூகம் கோபப்பட்டுவிடக் கூடாது என்பதற்காக பாஜக மேலிடத் தலைமையும் யோசித்து வருகிறது. மகாராஷ்டிராவில் பாஜக முதல்வரானால், துணை முதல்வர் பதவியை என்சிபி, சிவசேனா ஆகிய இரு கட்சிகளுக்கும் அளிக்கும். என்சிபியில் இருந்து அஜித் பவார் துணை முதல்வராக பதவியேற்பார் என்பது உறுதி. அப்போது சிவசேனாவை சேர்ந்த ஏக்நாத் ஷிண்டே துணை முதல்வர் பதவியை ஏற்க மாட்டார். தனது கட்சியில் உள்ள ஒருவரை துணை முதல்வராக தேர்தெடுப்பார்.

இந்நிலையில், புதிய சமன்பாட்டை உருவாக்குவதில் பாஜக மும்முரமாக இருப்பதால், மராட்டியம் அல்லாத தேவிந்திர ஃபட்னாவிஸை முதல்வராக்கினால் என்ன நடக்கும் என்பதையும் பாஜக பரிசீலித்து வருவதாகக் கூறப்படுகிறது.

வினோத் தாவ்டே மகாராஷ்டிராவிலிருந்து வந்தவர். ஓபிசி சமூகத்தைச் சேர்ந்தவர். தாவ்டே பாஜகவின் தேசிய பொதுச் செயலாளராகவும், பீகார் மாநிலத்தின் பொறுப்பாளராகவும் உள்ளார். ஏக்நாத் ஷிண்டே தேவேந்திர ஃபட்னாவிஸிற்கு முதல்வர் பதவிக்கி வழிவிட்டு இருக்கலாம். ஆனால் வினோத் தாவ்டேவின் கருத்து மீண்டும் சஸ்பென்ஸை அதிகப்படுத்தியுள்ளது. மகாராஷ்டிராவில் பாஜகவின் அரசியல் அடித்தளம் ஓபிசி. மஹாராஷ்டிராவில் தொடக்கம் முதலே ஓபிசி வாக்குகள் அடிப்படையில் பாஜக அரசியல் செய்து வருகிறது

மகாராஷ்டிராவில், பாஜக எந்த விதமான ரிஸ்க்கும் எடுக்க விரும்பவில்லை. 2024 லோக்சபா தேர்தலில் சீர்குலைந்த சாதி சமன்பாட்டை, சட்டசபை தேர்தலில் பா.ஜ., சரி செய்துள்ளது. இப்போது பாஜக எந்த ஆபத்தான நடவடிக்கையையும் எடுக்க விரும்பவில்லை. இப்படியிருக்கையில், மகாராஷ்டிர முதல்வர் பதவிக்கு தேவேந்திர ஃபட்னாவிஸ் பெயரை பா.ஜ., நம்பிக்கை தெரிவிக்குமா அல்லது புது முகத்தின் பெயரை அறிவித்து ஆச்சரியப் பரிசு கொடுக்குமா என்பதை பொறுத்திருந்து தான் பார்க்க வேண்டும்.