ஈரான்-இஸ்ரேல் போர் தீவிரமடைந்துள்ள சூழலில், ஹார்முஸ் நீரிணையை ஈரான் மூடியுள்ளது. இதனை பாதுகாக்க “சர்வதேச கூட்டணி” அமைக்க அமெரிக்க அதிபர் டொனால்ட் டிரம்ப் அழைப்பு விடுத்திருந்தாா். இதனை ஜப்பான், மற்றம் ஆஸ்திரேலியா நிராகரித்துள்ளது. மேலும் இந்த ஒப்பந்தத்திற்கு சீனா மற்றும் பிரான்ஸ், பிரிட்டன் போன்ற நாடுகளும் இதுவரை எவ்வித உறுதியான வாக்குறுதியையும் அளிக்கவில்லை.
வாஷிங்டன்: ஈரான் உடனான மோதல் உச்சகட்டத்தை எட்டியுள்ள நிலையில், உலகளாவிய எரிசக்தி போக்குவரத்திற்கு முக்கிய ஆதாரமாக விளங்கும் ஹார்முஸ் நீரிணையை பாதுகாக்க “சர்வதேச கூட்டணி” அமைக்க அமெரிக்க அதிபர் டொனால்ட் டிரம்ப் அழைப்பு விடுத்திருந்தார். ஆனால், ஜப்பான் மற்றும் ஆஸ்திரேலியா போன்ற நெருங்கிய நட்பு நாடுகளே இந்த விவகாரத்தில் பின்வாங்கியிருப்பது டிரம்பிற்கு பெரும் பின்னடைவாகக் கருதப்படுகிறது.
மோதலின் பின்னணி
ஈரான்-இஸ்ரேல் போர் தீவிரமடைந்துள்ள சூழலில், உலக கச்சா எண்ணெய் போக்குவரத்தில் 20 சதவீதத்திற்கும் அதிகமான பங்கு வகிக்கும் ஹார்முஸ் நீரிணையை ஈரான் மூடியுள்ளது. இதனால் உலக சந்தையில் கச்சா எண்ணெய் விலை 40 முதல் 50 சதவீதம் வரை உயர்ந்துள்ளது.
டிரம்பின் பிடிவாதம்
இது குறித்து செய்தியாளர்களிடம் பேசிய டிரம்ப் பின்வருமாறு தெரிவித்தார்:
”இந்த கடல் பகுதி வழியாகத்தான் சீனா, ஜப்பான் மற்றும் ஐரோப்பிய நாடுகள் தங்கள் எரிசக்தி தேவையைப் பூர்த்தி செய்கின்றன. ஆனால் அமெரிக்காவிற்கு அங்கிருந்து வெறும் 1 சதவீத எண்ணெய் மட்டுமே வருகிறது. எனவே, அந்தப் பகுதியைத் திறக்க அந்தந்த நாடுகளே போர் கப்பல்களை அனுப்பி பாதுகாப்பு வழங்க வேண்டும் என நான் கோருகிறேன்.”
மேலும், நேட்டோ (NATO) நாடுகள் மற்றும் சீனா இதற்கு உதவவில்லை எனில், எதிர்காலத்தில் அதன் விளைவுகள் மோசமாக இருக்கும் என்றும் அவர் எச்சரிக்கை விடுத்துள்ளார்.
பின்வாங்கிய நாடுகள்: முக்கிய காரணங்கள்
டிரம்பின் இந்த அழைப்பிற்குப் பிறகு, முக்கிய நாடுகள் தங்கள் நிலைப்பாட்டை அறிவித்துள்ளன:
ஜப்பான்: ஜப்பானியப் பிரதமர் சனாயே தகாயிச்சி (Sanae Takaichi) கூறுகையில், “எங்கள் நாட்டின் அரசியலமைப்பு சட்டங்களின்படி, போர்க்கப்பல்களை வெளிநாட்டு எல்லைகளுக்கு பாதுகாப்புப் பணிக்காக அனுப்ப முடியாது. இதில் தன்னிச்சையாக முடிவெடுக்க இயலாது,” எனத் தெரிவித்து டிரம்பின் கோரிக்கையை நிராகரித்தார்.
ஆஸ்திரேலியா: மற்றுமொரு முக்கிய நட்பு நாடான ஆஸ்திரேலியாவும், இந்த விவகாரத்தில் கப்பல்களை அனுப்பும் திட்டம் தற்போது இல்லை எனத் தெளிவுபடுத்தியுள்ளது.
சீனா மற்றும் ஐரோப்பா: கச்சா எண்ணெய்க்கு இப்பகுதியை அதிகம் நம்பியிருக்கும் சீனா மற்றும் பிரான்ஸ், பிரிட்டன் போன்ற நாடுகளும் இதுவரை எவ்வித உறுதியான வாக்குறுதியையும் அளிக்கவில்லை.
பின்னடைவாகக் கருதப்படுவது ஏன்?
உக்ரைன் போரின் போது ஐரோப்பிய நாடுகளுக்கு அமெரிக்கா உதவியதைச் சுட்டிக்காட்டிய டிரம்ப், தற்போது கைமாறு செய்ய வேண்டிய நேரம் இது என வலியுறுத்தினார். இருப்பினும், ஈரானுடன் நேரடிப் போரில் ஈடுபட அஞ்சும் நாடுகள், டிரம்பின் “அமெரிக்கா ஃபர்ஸ்ட்” (America First) கொள்கையின் ஒரு பகுதியாகவே இதைப் பார்க்கின்றன. இதனால் சர்வதேச அளவில் அமெரிக்கா தனிமைப்படுத்தப்படுகிறதா என்ற கேள்வியும் எழுந்துள்ளது.
இந்தியக் கப்பல்களுக்கு அனுமதி? ஈரானிய வட்டாரங்கள் மறுப்பு: ஹார்முஸ் ஜலசந்தியில் தொடரும் பதற்றம்…