செயற்கை நுண்ணறிவு எனப்படும் AI தொழில்நுட்பம் வேகமாக வளர்ந்து வரும் நிலையில், 2030-க்குள் AI காரணமாக மனிதகுலம் அழிந்துவிடும் என்ற அச்சம் குறித்து விவாதம் தீவிரமடைந்துள்ளது. இந்த நிலையில், NVIDIA நிறுவனத்தின் தலைமை செயல் அதிகாரி ஜென்சன் ஹுவாங், 2030-ல் AI காரணமாக உலகம் அழியும் என்ற கருத்தை திட்டவட்டமாக மறுத்துள்ளார்.
“2030 உலகத்தின் முடிவாக இருக்காது”
CBS News-க்கு அளித்த பேட்டியில் பேசிய ஜென்சன் ஹுவாங், 2030-ம் ஆண்டு உலகத்தின் முடிவாக இருக்கும் என்ற கருத்தை ஏற்கவில்லை என தெரிவித்துள்ளார். AI காரணமாக மனிதகுலம் அழியும் வாய்ப்பு இருப்பதாக கூறப்படுவதை அவர் நிராகரித்ததுடன், 2030-ல் உலகம் முடிவடையும் என்பதற்கு “0% வாய்ப்பு” இருப்பதாக குறிப்பிட்டுள்ளார்.
AI வளர்ச்சியை வேகப்படுத்த வேண்டும்
AI தொழில்நுட்பத்தின் வளர்ச்சியை நிறுத்தவோ அல்லது மெதுவாக்கவோ கூடாது என்றும் ஜென்சன் ஹுவாங் தெரிவித்துள்ளார். AI துறையில் தொழில்நுட்ப வளர்ச்சியை முடிந்தவரை வேகமாக முன்னெடுக்க வேண்டும் என்றும், அதே நேரத்தில் பாதுகாப்பற்ற தயாரிப்புகளை வெளியிடக்கூடாது என்றும் அவர் வலியுறுத்தியுள்ளார்.
AI பாதுகாப்பு குறித்து ஏன் அச்சம்?
இதற்கு மாறாக, சில AI ஆராய்ச்சியாளர்கள் மற்றும் தொழில்நுட்பத் துறை தலைவர்கள், மிகவும் சக்திவாய்ந்த AI அமைப்புகள் எதிர்காலத்தில் மனிதர்களின் கட்டுப்பாட்டை மீறக்கூடும் என்று எச்சரித்து வருகின்றனர்.
Anthropic நிறுவனத்தின் முன்னாள் ஆராய்ச்சியாளர் Jacob Coxon, AI மனிதகுலத்திற்கு மிகப்பெரிய ஆபத்தை ஏற்படுத்தக்கூடும் என எச்சரித்திருந்தார். Anthropic CEO Dario Amodei உள்ளிட்ட சில AI துறை தலைவர்களும் AI வளர்ச்சியின் வேகத்துடன் பாதுகாப்பு நடவடிக்கைகளும் அதிகரிக்க வேண்டும் என வலியுறுத்தியுள்ளனர்.
AI துறையில் தீவிரமடையும் விவாதம்
ஒருபுறம் AI தொழில்நுட்பத்தின் வேகமான வளர்ச்சி மருத்துவம், பொறியியல் உள்ளிட்ட பல துறைகளில் புதிய வாய்ப்புகளை உருவாக்கும் என கூறப்படுகிறது. மறுபுறம், அதிக திறன் கொண்ட AI அமைப்புகள் எதிர்காலத்தில் மனிதர்களின் கண்காணிப்பை மீறக்கூடும் என்ற பாதுகாப்பு கவலையும் முன்வைக்கப்படுகிறது.
இந்த நிலையில், “AI மனிதகுலத்தை அழித்துவிடும்” என்ற அச்சத்தை ஜென்சன் ஹுவாங் திட்டவட்டமாக நிராகரித்திருப்பது, AI பாதுகாப்பு குறித்த உலகளாவிய விவாதத்தில் முக்கியமான கருத்தாக பார்க்கப்படுகிறது.