பிரதீப் ரங்கநாதன் நடிக்கும் எல்ஐசி படத்தில் புதிய டைட்டில் குறித்த அப்டேட் வெளியாகியுள்ளது.
இயக்குனரும் நடிகருமான பிரதீப் ரங்கநாதன் கடந்த 2019 ஆம் ஆண்டு ஜெயம் ரவி நடிப்பில் வெளியான கோமாளி திரைப்படத்தை இயக்கியதன் மூலம் ரசிகர்கள் மத்தியில் பிரபலமானவர். அதைத்தொடர்ந்து இவர் லவ் டுடே எனும் திரைப்படத்தை தானே இயக்கி நடித்திருந்தார். இந்த படம் இளைஞர்கள் மத்தியில் ஏகோபித்த வரவேற்பை பெற்று மிகப்பெரிய வெற்றி படமாக அமைந்தது. அதன் பின்னர் பிரதீப் ரங்கநாதன் தொடர்ந்து பல படங்களில் ஹீரோவாக நடித்து வருகிறார். ஏற்கனவே ஓ மை கடவுளே பட இயக்குனர் அஸ்வத் மாரிமுத்து இயக்கத்தில் டிராகன் எனும் திரைப்படத்தில் நடித்து வருகிறார். 
இதற்கிடையில் விக்னேஷ் சிவன் இயக்கத்தில் எல்ஐசி (LOVE INSURANCE CORPORATION) எனும் திரைப்படத்திலும் கமிட் ஆகி நடித்து வருகிறார். இந்த படத்தில் பிரதீப் ரங்கநாதன் தவிர எஸ் ஜே சூர்யா, கிரித்தி ஷெட்டி உள்ளிட்டோர் முக்கிய கதாபாத்திரங்களில் நடிக்கின்றனர். இந்த படத்தை செவன் ஸ்கிரீன் ஸ்டுடியோ நிறுவனமும் ரௌடி பிக்சர்ஸ் நிறுவனமும் இணைந்து தயாரிக்கிறது. அனிருத் இந்த படத்திற்கு இசையமைக்கிறார். இந்த படம் தொடர்பான அதிகாரப்பூர்வ அறிவிப்பு வெளியாகி சிங்கப்பூர், மலேசியா போன்ற பகுதிகளிலும் படப்பிடிப்பு நடத்தப்பட்டு தற்போது இறுதிக்கட்டத்தை நெருங்கி உள்ளது. இதற்கிடையில் எல்ஐசி என்ற தலைப்பினால் இந்த படத்திற்கு பல சிக்கல்கள் இருந்தது. இதன் காரணமாக படத்தில் தலைப்பை மாற்ற பட குழுவினர் திட்டமிட்டுள்ளனர். 
அதன்படி வருகின்ற ஜூலை 25ஆம் தேதி பிரதீப் ரங்கநாதனின் பிறந்தநாளை முன்னிட்டு இந்தப் படத்தின் புதிய டைட்டில் மற்றும் ஃபர்ஸ்ட் லுக் வெளியாக இருக்கிறது. அதே சமயம் இந்த படத்திற்கு ப்ளூ ஸ்டோரி என்று புதிய தலைப்பு வைக்கப்பட்டுள்ளதாக பல தகவல்கள் சமூக வலைதளங்களில் வெளிவந்து கொண்டிருக்கின்றன. இருப்பினும் இந்த படத்திற்கு என்ன டைட்டில் வைக்கப்பட்டுள்ளது? என்பதை பொறுத்திருந்துதான் பார்க்க வேண்டும்.