‘வேட்டையன்’ படத்தின் ரிலீஸ் தேதியை லாக் செய்த படக்குழு!

ரஜினி நடிப்பில் உருவாகியுள்ள திரைப்படம் தான் வேட்டையன். இந்த படத்தை டிஜே ஞானவேல் இயக்க லைக்கா நிறுவனம் படத்தை தயாரிக்கிறது. அனிருத் இதற்கு இசை அமைக்கிறார். படத்தில் ரஜினிக்கு ஜோடியாக மஞ்சு வாரியர் நடிக்கிறார். மேலும் இவர்களுடன் இணைந்து அமிதாப் பச்சன், பகத் பாசில், ராணா டகுபதி, ரித்திகா சிங், துஷாரா விஜயன் உள்ளிட்ட பலர் முக்கிய கதாபாத்திரங்களில் நடிக்கின்றனர். ஜெய் பீம் படத்திற்கு பிறகு டிஜே ஞானவேல் இயக்கும் இந்த படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. ரஜினியும் இந்த படத்தில் ஜெயிலர் திரைப்படத்தை போல் வேட்டையன் படத்திலும் போலீஸ் கதாபாத்திரத்தில் நடிக்கிறார். ஏற்கனவே இந்த படத்தின் அறிவிப்பு டீசர் வெளியாகி நல்ல வரவேற்பை பெற்றது. அதைத்தொடர்ந்து படமானது அக்டோபர் மாதத்தில் வெளியாகும் என அறிவிக்கப்பட்டது. இதற்கிடையில் இதன் படப்பிடிப்புகள் திருவனந்தபுரம், சென்னை, ஐதராபாத், மும்பை போன்ற பல பகுதிகளில் பல கட்டங்களாக நடைபெற்று முடிந்துள்ளது. தற்போது டப்பிங் பணிகள் மிக தீவிரமாக நடைபெற்று வரும் நிலையில் படக்குழுவினர் வேட்டையன் திரைப்படத்தின் ரிலீஸ் தேதி குறித்து அறிவிப்பை வெளியிட்டுள்ளனர். அதன்படி வருகின்ற அக்டோபர் 10 அன்று வேட்டையன் திரைப்படம் உலகம் முழுவதும் வெளியாக இருக்கிறது என்று புதிய போஸ்டர் ஒன்று வெளியிடப்பட்டு அறிவிக்கப்பட்டுள்ளது. ஏற்கனவே சூர்யாவின் கங்குவா திரைப்படம் அக்டோபர் 10 அன்று தான் வெளியாக இருக்கிறது என்பது குறிப்பிடத்தக்கது.