விஜய் ஆண்டனி நடிக்கும் சக்தித் திருமகன் படத்தின் டீசர் வெளியாகி உள்ளது.
தமிழ் சினிமாவில் இசையமைப்பாளராக தனது திரைப் பயணத்தை தொடங்கிய விஜய் ஆண்டனி, கடந்த 2012 ஆம் ஆண்டு வெளியான நான் படத்தின் மூலம் கதாநாயகனாக களமிறங்கினார். அதை தொடர்ந்து பிச்சைக்காரன் உள்ளிட்ட பல வெற்றி படங்களில் நடித்து பெயர் பெற்றார். தற்போது தொடர்ந்து பல படங்களில் பிஸியாக நடித்து வரும் விஜய் ஆண்டனி, வள்ளி மயில், ககன மார்கன் ஆகிய படங்களை கைவசம் வைத்திருக்கிறார். இதற்கிடையில் இவர் அருவி படத்தின் இயக்குனர் அருண் பிரபு இயக்கத்தில் சக்தித் திருமகன் எனும் திரைப்படத்தில் நடித்துள்ளார். இந்த படத்தில் விஜய் ஆண்டனியுடன் இணைந்து வாகை சந்திரசேகர், சுனில் கிருபாலினி, த்ருப்தி ரவீந்திரா, கிரண், செல் முருகன் மற்றும் பலர் நடித்திருக்கின்றனர். செல்லி கலிஸ்ட் இதன் ஒளிப்பதிவு பணிகளை கவனிக்க விஜய் ஆண்டனி படத்திற்கு இசையமைத்துள்ளார். விஜய் ஆண்டனி ஃபிலிம் கார்ப்பரேஷன் நிறுவனம் இப்படத்தை தயாரித்துள்ளது. ஏற்கனவே இந்த படத்தின் படப்பிடிப்புகள் நிறைவடைந்த நிலையில் படமானது 2025 கோடையில் வெளியாகும் என ஏற்கனவே அறிவிக்கப்பட்டிருக்கிறது.
இந்நிலையில் இந்த படத்தின் டீசரை படக்குழு வெளியிட்டுள்ளது. இந்த டீசரை பார்க்கும்போது இப்படமானது அரசியல் திரில்லர் ஜானரில் உருவாகி இருப்பது போல் தெரிகிறது. ஏற்கனவே நடிகர் விஜய் ஆண்டனி கோடியில் ஒருவன் போன்ற அரசியல் தொடர்பான கதைக்களத்தில் நடித்திருந்தது குறிப்பிடத்தக்கது. இந்நிலையில் மீண்டும் இவர் அரசியல் படத்தில் நடித்திருப்பது எதிர்பார்ப்பை ஏற்படுத்தி இருக்கிறது. அத்துடன் இந்த டீசர் ரசிகர்கள் மத்தியில் கவனம் பெற்று இணையத்தில் வைரலாகி வருகிறது.