இயக்குனர் லிங்குசாமி அஞ்சான் படம் குறித்து பேசி உள்ளார்.
கடந்த 2014 ஆம் ஆண்டு சூர்யா நடிப்பில் ‘அஞ்சான்’ திரைப்படம் வெளியானது. இந்த படத்தில் சூர்யாவுடன் இணைந்து சமந்தா, வித் யூத் ஜம்வால் ஆகியோர் முக்கிய கதாபாத்திரங்களில் நடித்திருந்தனர். மிகுந்த எதிர்பார்ப்புகளுடன் வெளியான இந்த படம் ரசிகர்கள் மத்தியில் எதிர்பார்த்த வெற்றியை பெறவில்லை. அதேசமயம் இந்த படத்தின் இயக்குனர் லிங்குசாமியை பலரும் ட்ரோல் செய்து வந்தனர். இந்நிலையில் இந்த படம் கிட்டத்தட்ட 11 வருடங்கள் கழித்து ரீ எடிட் செய்யப்பட்டு மீண்டும் ரிலீஸ் செய்யப்பட்டுள்ளது. 2 மணி நேரம் 36 நிமிடங்கள் இருந்த இந்த படத்தை ரீ எடிட் செய்து 2 மணி நேரமாக குறைத்து ரீ எடிட்டிங் வெர்ஷனில் வெளியிடப்பட்டுள்ளது. இந்த நிலையில் இந்த படம் ரசிகர்களை கவர்ந்து திரையரங்குகளில் வெற்றி நடைபோட்டு வருகிறது. அதாவது நேற்று (நவம்பர் 28) திரைக்கு வந்த தேரே இஷ்க் மெய்ன், ரிவால்வர் ரீட்டா ஆகிய படங்களை விட அதிகமாக வசூல் செய்திருப்பதாக சினிமா வட்டாரங்கள் தெரிவிக்கின்றன. 
அதேசமயம் சமீபத்தில் நடந்த பேட்டியில் லிங்குசாமி, அஞ்சான் படம் குறித்து பேசி இருக்கிறார். அதன்படி அவர், “அஞ்சான் படத்தை தனிப்பட்ட முறையில் நிறைய பேர் வந்து எனக்கு பிடித்திருக்கிறது என்று கூறினார்கள். அப்போது அந்த படத்தை பிளான் பண்ணி அடிச்ச மாதிரி இருக்கும். இன்னொரு முறை இந்த படம் வெற்றி, தோல்வி ஆகுதுங்குறத பற்றி கவலைப்படாமல் முழுக்க முழுக்க சூர்யா ரசிகர்களுக்காக அஞ்சான் படத்தை ரீ ரிலீஸ் பண்றேன். போட்டி, பொறாமை இல்லாத உண்மையான ரசிகர்களுக்கு அஞ்சான் படம் உண்மையிலேயே பிடிச்சிருக்கு” என்று தெரிவித்துள்ளார்.