தமிழகத்தில் பல்வேறு நலத்திட்டங்களை தொடங்கி வைக்க கோவை வந்த பிரதமர் நரேந்திர மோடியை, தமிழக பாஜக தலைவர் அண்ணாமலை நேரில் வந்து வரவேற்காதது அரசியல் வட்டாரத்தில் பெரும் பரபரப்பை ஏற்படுத்தியுள்ளது. அண்ணாமலையின் பெயர் வரவேற்பாளர்கள் பட்டியலில் இருந்தும் அவர் வராதது குறித்து பாஜக எம்.எல்.ஏ வானதி சீனிவாசன் அளித்த பேட்டி தற்போது விவாதப் பொருளாகியுள்ளது.
பிரதமர் மோடி பல்வேறு அரசு மற்றும் கட்சி நிகழ்ச்சிகளில் பங்கேற்பதற்காக இன்று கோவை விமான நிலையம் வந்தடைந்தார். அவருக்குத் தமிழக அரசு சார்பிலும், பாஜக சார்பிலும் உற்சாக வரவேற்பு அளிக்கப்பட்டது. பொதுவாகப் பிரதமர் வருகையின் போது மாநிலத் தலைவர் முன்னின்று வரவேற்பது வழக்கம். ஆனால், இன்றைய நிகழ்வில் அண்ணாமலை கலந்து கொள்ளவில்லை.
இது குறித்து செய்தியாளர்களிடம் பேசிய கோவை தெற்கு தொகுதி எம்.எல்.ஏ வானதி சீனிவாசன் கூறியதாவது:
“பிரதமர் மோடியை வரவேற்கும் அதிகாரப்பூர்வ பட்டியலில் மாநிலத் தலைவர் அண்ணாமலையின் பெயர் இடம் பெற்றிருந்தது. இருப்பினும், அவர் ஏன் வரவில்லை என்பது குறித்து எனக்குத் தெரியவில்லை. கட்சி மேலிடம் அல்லது அவர்தான் இதற்கு விளக்கம் அளிக்க வேண்டும்.”
கடந்த சில நாட்களாகவே தமிழக பாஜக மற்றும் கூட்டணி கட்சிகளிடையே தொகுதிப் பங்கீடு மற்றும் உட்கட்சி விவகாரங்கள் தொடர்பாகச் சில கருத்து வேறுபாடுகள் நிலவி வருவதாகக் கூறப்படும் நிலையில், அண்ணாமலையின் இந்த ‘ஆப்சென்ட்’ பல கேள்விகளை எழுப்பியுள்ளது.
இது புறக்கணிப்பா? அல்லது தவிர்க்க முடியாத காரணமா? டெல்லியில் முக்கிய ஆலோசனையில் இருந்ததால் அவர் வரவில்லையா அல்லது திட்டமிட்டே இந்த நிகழ்வைத் தவிர்த்தாரா என்பது குறித்து அண்ணாமலை தரப்பில் இருந்து இன்னும் அதிகாரப்பூர்வ விளக்கம் வரவில்லை.
“சொந்தக் கட்சித் தலைவரையே வரவேற்க வராத அளவுக்குத் தமிழக பாஜகவில் பிளவு ஏற்பட்டுள்ளதா?” என பல கேள்விகள் எழுப்பி வருகின்றன.
பிரதமர் மோடியின் இந்தப் பயணத்தில் அண்ணாமலையின் வருகை எதிர்பார்க்கப்பட்ட நிலையில், வானதி சீனிவாசனின் இந்தப் பேட்டி கட்சிக்குள் இருக்கும் புகைச்சலை வெளிச்சம் போட்டுக் காட்டுவதாக தெரிகிறது.