ஐ.பி.எல். 2026 தொடரில் பஞ்சாப் கிங்ஸ் அணி தொடர்ச்சியாக 5-வது தோல்வியைச் சந்தித்தது. தர்மசாலாவில் நடைபெற்ற லீக் ஆட்டத்தில் மும்பை இந்தியன்ஸிடம் தோல்வியடைந்த பிறகு பேசிய கேப்டன் ஸ்ரேயஸ் ஐயர், இந்த தொடர் தோல்விகள்”செரிக்க முடியாத கசப்பான மாத்திரை” (A Tough Pill to Swallow) போன்றது என உருக்கமுடன் தெரிவித்தார். 
ஐபிஎல் 2026 சீசனில் அதிரடியாகத் தொடங்கிய பஞ்சாப் கிங்ஸ் அணி, தற்போது தொடர் தோல்விகளால் பிளே-ஆஃப் வாய்ப்பை தக்கவைக்கப் போராடி வருகிறது. நேற்று மும்பை இந்தியன்ஸ் அணிக்கு எதிராக நடைபெற்ற விறுவிறுப்பான போட்டியில் 6 விக்கெட் வித்தியாசத்தில் தோல்வியடைந்ததன் மூலம், பஞ்சாப் அணி தொடர்ச்சியாக தனது 5-வது தோல்வியைப் பதிவு செய்துள்ளது.
தோல்விக்குப் பிறகு செய்தியாளர்களிடம் பேசிய கேப்டன் ஸ்ரேயஸ் ஐயர், இந்தத் தோல்வி மிகவும் வருத்தமளிப்பதாகக் கூறினார். ”இந்தத் தோல்வி ஒரு கசப்பான மாத்திரையை விழுங்குவது போல (A tough pill to swallow) மிகவும் கடினமாக உள்ளது. ஒரு குறிப்பிட்ட சூழலை மட்டும் என்னால் குறை சொல்ல முடியாது, ஏனெனில் இது ஒரு மிகச்சிறந்த கிரிக்கெட் போட்டியாக அமைந்தது. நாங்கள் நன்றாகவே போராடினோம்.”
பஞ்சாப் அணி 200 ரன்கள் குவித்தும், மும்பை அணியின் திலக் வர்மா (33 பந்துகளில் 75* ரன்கள்) ஆட்டத்தை மாற்றியதை ஸ்ரேயஸ் பாராட்டினார். “அவர் பந்துகளைத் தேர்வு செய்த விதம் மற்றும் பீல்டிங்கிற்கு ஏற்றவாறு விளையாடியது அற்புதம்,” என்றார்.கடைசி ஓவர்களில் மும்பை பேட்ஸ்மேன்களைக் கட்டுப்படுத்தத் தவறியது பஞ்சாப் அணிக்கு பின்னடைவாக அமைந்தது.
தொடர் தோல்விகளுக்கு மத்தியிலும், இந்தப் போட்டியில் ஸ்ரேயஸ் ஐயர் ஒரு சாதனையைப் படைத்தார். ஐபிஎல் வரலாற்றில் பஞ்சாப் கிங்ஸ் அணிக்காக 1,000 ரன்களைக் கடந்த இரண்டாவது கேப்டன் என்ற பெருமையை அவர் பெற்றார். இதற்கு முன் கே.எல். ராகுல் மட்டுமே இந்த மைல்கல்லை எட்டியிருந்தார்.
அடுத்த கட்டம் என்ன?
தற்போது 12 போட்டிகளில் 13 புள்ளிகளுடன் புள்ளிகள் பட்டியலில் 4-வது இடத்தில் இருக்கும் பஞ்சாப் அணிக்கு, பிளே-ஆஃப் வாய்ப்பு 43% ஆகக் குறைந்துள்ளது.
”அடுத்ததாக ராயல் சேலஞ்சர்ஸ் பெங்களூரு அணிக்கு எதிரான போட்டியில் விளையாட ஆவலாக உள்ளோம். மீதமுள்ள இரண்டு போட்டிகளிலும் நாங்கள் கட்டாயம் வெற்றி பெற்றாக வேண்டும். அது ஒரு சவாலான ஆட்டமாக இருக்கும்,” என்று ஸ்ரேயஸ் நம்பிக்கை தெரிவித்தார்.