வரவிருக்கும் ஐபிஎல் 2027 (IPL 2027) தொடருக்கு முன்பு மும்பை இந்தியன்ஸ் (MI) அணியிலிருந்து வெளியேறத் தயாராகி வரும் நட்சத்திர ஆல்-அவுண்ட் வீரர் ஹார்திக் பாண்டியாவைத் தங்களது அணிக்குக் கொண்டுவரச் சென்னை சூப்பர் கிங்ஸ் (CSK) தீவிர முயற்சி மேற்கொண்டு வருவதாகத் தகவல்கள் வெளியாகியுள்ளன.
மும்பை அணியின் கேப்டனான ஹார்திக் பாண்டியாவுக்கான டிரேட் ஒப்பந்தத்தில், இளம் வீரர் ஆயுஷ் மத்ரே மற்றும் பணத்தை மும்பை அணி கோரியுள்ளதாக ஒரு செய்தி கூறுகிறது. இருப்பினும், ஆயுஷ் மத்ரேவை விட்டுக் கொடுக்க சிஎஸ்கே விரும்பவில்லை. மாறாக, டெவால்ட் ப்ரீவிஸ் (Dewald Brevis), சிவம் துபே (Shivam Dube) ஆகியோருடன் ரூ. 10 கோடி ரொக்கப் பணத்தை மும்பை அணிக்கு சிஎஸ்கே மாற்று ஆஃபராக வழங்கியுள்ளதாகத் தெரிகிறது.
மும்பை அணியின் எதிர்பார்ப்பு:
‘ஹிந்துஸ்தான் டைம்ஸ்’ வெளியிட்ட அறிக்கையின்படி, தங்கள் அணியின் நட்சத்திர ஆல்-ரவுண்டருக்குப் பதிலாக மிகப்பெரிய தொகையையும் வீரர்களையும் மும்பை இந்தியன்ஸ் எதிர்பார்க்கிறது. அனுபவமிக்க அதிரடி வீரர் சிவம் துபே மற்றும் வளர்ந்து வரும் தொடக்க ஆட்டக்காரர் ஆயுஷ் மத்ரே ஆகியோரை உள்ளடக்கிய தொகுப்பே தங்களின் விருப்பம் என மும்பை கருதுகிறது. குறிப்பாக, கடந்த ஐபிஎல் 2026 தொடரில் 180-க்கு அருகில் ஸ்ட்ரைக் ரேட்டுடன் கலக்கிய ஆயுஷ் மத்ரேவை, தங்கள் அணியின் எதிர்காலத் தூணாக மும்பை அணி பார்க்கிறது.
சிஎஸ்கேவின் மாற்றுத் திட்டம்:
ஆனால், ஆயுஷ் மத்ரேவின் எதிர்காலம் குறித்துச் சென்னை சூப்பர் கிங்ஸ் அணி மிகவும் உறுதியாக உள்ளது. 19 வயது இளம் பேட்டரான அவரை விட்டுக்கொடுக்க மறுத்துவிட்ட சிஎஸ்கே, அதற்கு மாற்றாக வேறு ஒரு திட்டத்தை முன்வைத்துள்ளது. அதன்படி சிவம் துபே, தென்னாப்பிரிக்காவின் அதிரடி பேட்டர் டெவால்ட் ப்ரீவிஸ் மற்றும் ரூ. 10 கோடி பணத்தைக் கொடுத்து இந்த ஒப்பந்தத்தை முடிக்க சிஎஸ்கே முன்வந்துள்ளதாகக் கூறப்படுகிறது.
இந்த ஒப்பந்தம் இறுதி செய்யப்பட்டால், இதன் மொத்த மதிப்பு ரூ. 20 கோடியைத் தாண்டும் என எதிர்பார்க்கப்படுகிறது. வேகப்பந்து வீச்சுடன் கூடிய மிடில் ஆர்டர் பேட்டிங் திறமை மற்றும் வெளிநாட்டு வீரருக்கான இடத்தை ஆக்கிரமிக்கத் தேவையில்லாதது போன்ற காரணங்களால் ஹார்திக் பாண்டியா இந்திய கிரிக்கெட்டில் மிகவும் அரிதான ஒரு சொத்தாகக் கருதப்படுகிறார். எனினும், கடந்த ஐபிஎல் 2026 தொடரில் அவர் 206 ரன்கள் மட்டுமே அடித்து 4 விக்கெட்டுகளை மட்டுமே வீழ்த்தியிருந்தது குறிப்பிடத்தக்கது.
இரு அணிகளும் இதுவரை அதிகாரப்பூர்வமாக ஒப்பந்தத்தை உறுதிப்படுத்தவில்லை என்றாலும், மும்பையின் இளம் திறமை மீதான எதிர்பார்ப்புக்கும், சென்னையின் சொந்த வீரர்களைப் பாதுகாக்கும் முனைப்புக்கும் இடையே இந்த விவகாரம் ஒரு முக்கியப் பேச்சுவார்த்தையாக மாறியுள்ளது. ஒருவேளை இந்த ஒப்பந்தம் கைவிடப்பட்டால், கொல்கத்தா நைட் ரைடர்ஸ் (KKR) போன்ற பிற அணிகள் இந்த நிலையை உன்னிப்பாகக் கவனித்து வருவதாகவும் தகவல்கள் தெரிவிக்கின்றன.