இந்தியா–ஆப்கானிஸ்தான் அணிகள் மோதும் முதல் T20 போட்டி இன்று (செப்டம்பர் 13) டெல்லியில் உள்ள அருண் ஜெட்லி மைதானத்தில் நடைபெறுகிறது. போட்டியைக் காண ஆயிரக்கணக்கான ரசிகர்கள் திரள்வார்கள் என எதிர்பார்க்கப்படும் நிலையில், டெல்லியில் நடைபெறும் BRICS உச்சி மாநாடும் ஒரே நாளில் இருப்பதால் போக்குவரத்து நெரிசலை சமாளிக்க போலீசார் பல்வேறு கட்டுப்பாடுகளை அறிவித்துள்ளனர்.
இன்று இரவு 7 மணிக்கு போட்டி
இந்தியா–ஆப்கானிஸ்தான் இடையிலான மூன்று போட்டிகள் கொண்ட T20 தொடரின் முதல் ஆட்டம் இன்று இரவு 7 மணிக்கு தொடங்குகிறது. அருண் ஜெட்லி மைதானத்தில் நடைபெறும் இந்தப் போட்டி இரவு சுமார் 11.30 மணிக்கு நிறைவடையும் என எதிர்பார்க்கப்படுகிறது.
இந்தத் தொடரின் அடுத்த இரண்டு போட்டிகள் செப்டம்பர் 15 மற்றும் 17 ஆகிய தேதிகளில் இதே மைதானத்தில் நடைபெற உள்ளன.
மதியம் 2 மணி முதல் போக்குவரத்து கட்டுப்பாடு
போட்டி காரணமாக அருண் ஜெட்லி மைதானத்தைச் சுற்றியுள்ள பகுதிகளில் இன்று மதியம் 2 மணி முதல் போக்குவரத்து கட்டுப்பாடுகள் மற்றும் மாற்றுப்பாதைகள் அமல்படுத்தப்பட உள்ளன.
பஹதூர் ஷா ஜாஃபர் மார்க், DDU மார்க், ஜே.எல்.என் மார்க் மற்றும் மிர்தார்டு சவுக் உள்ளிட்ட பகுதிகளில் போக்குவரத்து நிலவரத்தைப் பொறுத்து கட்டுப்பாடுகள் விதிக்கப்படலாம்.
இந்த சாலைகளை தவிர்க்க அறிவுரை
போட்டி நடைபெறும் நேரத்தில் தேவையில்லாமல் பஹதூர் ஷா ஜாஃபர் மார்க், ஜே.எல்.என் மார்க், அசஃப் அலி ரோடு மற்றும் DDU மார்க் பகுதிகளுக்குச் செல்வதை பொதுமக்கள் தவிர்க்குமாறு போக்குவரத்து போலீசார் அறிவுறுத்தியுள்ளனர்.
போக்குவரத்து நெரிசலைத் தவிர்க்க மாற்றுப்பாதைகளைப் பயன்படுத்தவும், பயணத்தை முன்கூட்டியே திட்டமிடவும் அறிவுறுத்தப்பட்டுள்ளது.
பார்க்கிங் வசதியிலும் கட்டுப்பாடு
மைதானத்தைச் சுற்றியுள்ள பகுதிகளில் பொதுமக்களுக்கான வாகன நிறுத்தத்திற்கு கட்டுப்பாடுகள் விதிக்கப்பட்டுள்ளன. Mata Sundari Road, Rajghat Power House Road மற்றும் Velodrome Road ஆகிய இடங்களில் இலவச பார்க்கிங் மற்றும் Park & Ride வசதி ஏற்பாடு செய்யப்பட்டுள்ளது.
அனுமதியின்றி தடை செய்யப்பட்ட பகுதிகளில் வாகனங்களை நிறுத்தினால் அவை அப்புறப்படுத்தப்பட்டு நடவடிக்கை எடுக்கப்படும் என போலீசார் எச்சரித்துள்ளனர்.
BRICS மாநாட்டாலும் கூடுதல் கட்டுப்பாடு
இன்றைய போட்டியுடன் BRICS உச்சி மாநாட்டின் நிறைவு நிகழ்வுகளும் டெல்லியில் நடைபெறுவதால், VVIP வாகன அணிவகுப்புகள் மற்றும் பாதுகாப்பு ஏற்பாடுகள் காரணமாக நகரின் பல பகுதிகளில் போக்குவரத்து பாதிக்கப்பட வாய்ப்புள்ளது.
எனவே, பொதுமக்கள் தேவையற்ற பயணங்களைத் தவிர்த்து, முடிந்தவரை மெட்ரோ உள்ளிட்ட பொதுப் போக்குவரத்தைப் பயன்படுத்துமாறு அறிவுறுத்தப்பட்டுள்ளது.
இந்தியா–ஆப்கானிஸ்தான் போட்டியில் எதிர்பார்ப்பு
இந்திய அணிக்கு ஷ்ரேயாஸ் ஐயர் கேப்டனாக களமிறங்குகிறார். ஆப்கானிஸ்தான் அணியை இப்ராஹிம் ஜத்ரான் வழிநடத்துகிறார். இந்திய அணியின் வேகப்பந்து வீச்சாளர் ஜஸ்பிரித் பும்ரா மற்றும் இளம் வீரர் வைபவ் சூர்யவன்ஷி மீது ஆப்கானிஸ்தான் அணி சிறப்பு கவனம் செலுத்தி வருவதாகவும் தகவல் வெளியாகியுள்ளது.
இதனால் கிரிக்கெட் ரசிகர்களின் எதிர்பார்ப்பு ஒருபுறம் அதிகரித்துள்ள நிலையில், BRICS மாநாடு காரணமாக டெல்லியில் ஏற்கனவே இருக்கும் பாதுகாப்பு மற்றும் போக்குவரத்து கட்டுப்பாடுகளுடன் போட்டி ஏற்படுத்தும் கூடுதல் நெரிசலும் இன்று முக்கிய பேசுபொருளாகியுள்ளது.