மருத்துவப் படிப்பிற்கான சூப்பர் ஸ்பெஷாலிட்டி இடங்களில் தமிழ்நாட்டின் உரிமைகளைப் பாதுகாக்கத் தவறிய தவெக அரசு இதற்கு உரிய விளக்கம் அளிக்க வேண்டும் என்று முன்னாள் முதலமைச்சர் மு.க.ஸ்டாலின் வலியுறுத்தியுள்ளார். உச்சநீதிமன்றத்தில் தமிழக அரசு வழக்கறிஞர்கள் ஆஜராகாமல் அலட்சியமாக இருந்ததே இந்தப் பேரிழப்புக்குக் காரணம் என்றும் அவர் குற்றம்சாட்டியுள்ளார்.
முன்னாள் முதலமைச்சர் மு.க.ஸ்டாலின் வெளியிட்ட அறிக்கை விவரம்:
ஆறாண்டுகளுக்கு முன்பு இதே நாளில், இந்தியா முழுவதும் உள்ள இதர பிற்படுத்தப்பட்ட (OBC) மாணவர்களுக்கான 27 சதவீத இடஒதுக்கீட்டைத் தி.மு.க. சட்டப்போராட்டம் நடத்திப் பெற்றுத் தந்தது. ஆனால், இன்றோ மருத்துவப் படிப்பில் தமிழ்நாட்டின் சூப்பர் ஸ்பெஷாலிட்டி இடங்களை இழந்து நிற்கும் அவல நிலை ஏற்பட்டுள்ளது. தமிழ்நாட்டின் எதிர்கால நலனுக்காகத் தொண்டாற்ற வேண்டிய 151 உயர்சிறப்பு அரசு மருத்துவர்களின் இடங்களை நாம் இழந்துள்ளோம். இலட்சக்கணக்கான தமிழ்நாட்டு மக்களின் உயிர்ப்பிரச்சினையாக உள்ள இந்த விவகாரத்தில், தவெக அரசு கைகட்டி வேடிக்கை பார்ப்பது ஏன்? என்று அவர் கேள்வி எழுப்பியுள்ளார்.
தவெக அரசுக்கு எதிராக எழுந்துள்ள முக்கியக் கேள்விகள்:
வழக்கறிஞர்கள் ஏன் ஆஜராகவில்லை?: இவ்வளவு முக்கியத்துவம் வாய்ந்த வழக்கில் தமிழ்நாடு அரசு நியமித்த மூத்த வழக்கறிஞர்கள் ஏன் ஆஜராகவில்லை? தொடக்கம் முதல் இந்த விவகாரத்தில் இவ்வளவு அலட்சியம் காட்டப்பட்டதற்கான காரணம் என்ன?
நீதிமன்றத்தில் சரண்டர் ஆனது ஏன்?: நியாயம் நம் பக்கம் இருந்தும், உச்சநீதிமன்றத்தில் எந்தவொரு வலுவான வாதங்களையும் எடுத்து வைக்காமல் அரசு வழக்கறிஞர்கள் வாய்மூடி மௌனமாக ‘சரண்டர்’ ஆனது யாருடைய நலனுக்காக?
அவசரக் கலந்தாய்வு பின்னணி: அகில இந்திய கவுன்சிலிங்கின் இரண்டாம் சுற்று நடைபெறுவதற்கு முன்னரே, மாநிலக் கலந்தாய்வை அவசரமாக நடத்தி 151 இடங்கள் காலியாக இருப்பதாக அறிவித்தது திட்டமிட்டுச் செய்யப்பட்ட சதியா?
சிறப்புத் தீர்மானம் நிறைவேற்றாதது ஏன்?: தமிழ்நாட்டின் சூப்பர் ஸ்பெஷாலிட்டி இடங்கள் அகில இந்தியத் தொகுப்புக்கு மாற்றப்படுவதை எதிர்த்து, கடந்த சட்டமன்றக் கூட்டத்தொடரிலேயே சிறப்புத் தீர்மானம் நிறைவேற்ற வலியுறுத்தியும் அரசு அதனைச் செய்யாதது ஏன்?
மறுசீராய்வு மனுவின் நிலை என்ன?: கடந்த மே 29 அன்று வெளியான உச்சநீதிமன்றத் தீர்ப்பை எதிர்த்துத் தமிழ்நாடு அரசு தாக்கல் செய்த மறுசீராய்வு மனுவின் தற்போதைய நிலை என்ன?
இத்தகைய பலத்த கேள்விகளைப் பாதிக்கப்பட்ட அரசு மருத்துவர்களும், பொதுமக்களும் எழுப்பி வருவதாகத் தெரிவித்துள்ள மு.க.ஸ்டாலின், தமிழ்நாட்டின் மருத்துவக் கல்வியின் எதிர்களத்தைப் பலிகடாவாக்கியுள்ள தவெக அரசு இதற்கு உரிய விளக்கத்தை உடனடியாக அளித்தாக வேண்டும் என்று முழங்கியுள்ளார்.
யோகி பாபுவின் 300-வது படம்: டி. இமான் இசையில் வெளியான ‘பொறு மனமே பொறு’ பாடல்!