மத்திய கிழக்குப் பிராந்தியத்தில் அமெரிக்கா மற்றும் ஈரான் இடையேயான மோதல் புதிய பரிமாணத்தை எட்டியுள்ளது.
அமெரிக்க ராணுவத்திற்குத் தேவையான உணவுப் பொருட்கள், மூலப்பொருட்கள் மற்றும் ஆயுதங்களை ஏற்றிச் செல்லும் கப்பல்கள், விநியோகச் சங்கிலிகள் மற்றும் இடைத்தரகர்கள் என அனைவரையும் தனது இலக்காக மாற்ற ஈரான் திட்டமிட்டுள்ளதாகத் தகவல்கள் வெளியாகியுள்ளன.
ஈரானின் புதிய வியூகம்: இதுவரை அமெரிக்கா மட்டுமே தாக்குதல்களை நடத்தி வந்த நிலையில், தற்போது ஈரான் மிகத் துல்லியமான திட்டமிடலுடன் செயல்படத் தொடங்கியுள்ளது.
அமெரிக்க ராணுவ நிறுவனங்களுடன் தொடர்புடைய அனைத்து வர்த்தக இணைப்புகளையும், கப்பல் போக்குவரத்து நிறுவனங்களையும் தங்களது கண்காணிப்பு வளையத்திற்குள் கொண்டு வந்துள்ளதாக ஈரான் எச்சரித்துள்ளது.
இந்த அச்சுறுத்தலால் உலகளாவிய கப்பல் நிறுவனங்கள் மற்றும் வர்த்தகர்கள் பெரும் அச்சத்தில் ஆழ்ந்துள்ளனர். இந்த நடவடிக்கை அமெரிக்காவிற்கு மட்டுமின்றி, ஒட்டுமொத்த உலக வர்த்தகத்திற்கும் பெரும் பின்னடைவை ஏற்படுத்தும் என்று சர்வதேச அரசியல் ஆய்வாளர்கள் கவலை தெரிவிக்கின்றனர்.
அமெரிக்காவின் இக்கட்டான சூழல்: மறுபுறம், வளைகுடா நாடுகளில் உள்ள தனது ராணுவத் தளங்களை மறுபரிசீலனை செய்ய அமெரிக்காவின் பெண்டகன் ஆலோசித்து வருவதாகக் கூறப்படுகிறது. பஹ்ரைன் மற்றும் குவைத் உள்ளிட்ட இடங்களில் உள்ள அமெரிக்க ராணுவ நிலைகளை வடிவமைக்க அதிக நிதி தேவைப்படுவதால், இந்தப் பகுதிகளில் இருந்து படைகளைத் திரும்பப் பெறவோ அல்லது தளங்களை மாற்றவோ அமெரிக்கா திட்டமிட்டுள்ளது.
இதனிடையே, ஆசியப் பிராந்தியத்திலும் அமெரிக்காவின் பிடி தளர்ந்து வருகிறது. ஜப்பான் மற்றும் தென்கொரியா உள்ளிட்ட நாடுகளில் பாதுகாப்பு ஏற்பாடுகளை மேம்படுத்த அதிக நிதி கோரியுள்ள அமெரிக்காவின் கோரிக்கையை அந்த நாடுகள் தயக்கத்துடன் அணுகி வருகின்றன. இதனால், ஜப்பான் மற்றும் ஆஸ்திரேலியா இணைந்து அமெரிக்காவைச் சாராத புதிய ராணுவக் கூட்டணியை உருவாக்கி வருகின்றன.
டிரம்ப் சந்திக்கும் பின்னடைவுகள்: அதிபர் டொனால்ட் டிரம்ப் மீதான வழக்குகள் மற்றும் உள்நாட்டு அரசியல் சவால்கள் அவருக்கு அரசியல் ரீதியாகப் பெரும் பின்னடைவை ஏற்படுத்தியுள்ளன.
சீனாவுடனான நட்புறவை மேம்படுத்த அமெரிக்கா முயன்று வரும் வேளையில், இந்தோ-பசிபிக் பிராந்தியத்தில் ஏற்பட்டுள்ள இத்தகைய மாற்றங்கள், உலக அரசியலில் அமெரிக்காவின் செல்வாக்கு குறைந்து வருவதையே காட்டுவதாக ஆய்வாளர்கள் கருதுகின்றனர். மத்திய கிழக்கு மற்றும் ஆசியப் பகுதிகளில் இருந்து அமெரிக்கா மெல்ல மெல்ல வெளியேறி வருகிறதா என்ற கேள்வியும் தற்போது உலக அளவில் எழுந்துள்ளது.