உலக அமைதியின் முகமூடியாக வலம்வரும் ஓமன் நாட்டின் மீது அமெரிக்க அதிபர் டொனால்ட் டிரம்ப் விடுத்திருக்கும் நேரடி மிரட்டல், சர்வதேச அரசியலில் பேரதிர்ச்சியை ஏற்படுத்தியுள்ளது. ஹார்முஸ் நீரிணையில் ஈரானுடன் கைகோர்த்து ஓமன் புதிய கப்பல் வழித்தடங்களை உருவாக்கும் துணிச்சலான நடவடிக்கையே, அமெரிக்காவின் இந்த ஆவேசப் புயலுக்குக் காரணமாகும்!
அமெரிக்காவின் பிடியில் ஓமன்!
அமெரிக்காவுக்கும் ஓமானுக்கும் இடையேயான ராணுவ உறவு என்பது பல தசாப்தங்களைக் கடந்தது. ஒமானின் டும் மற்றும் சலா துறைமுகங்கள், மஸீரா விமானத்தளம் ஆகியவற்றைத் தனது பிரம்மாண்ட போர்க்கப்பல்களை நிறுத்துவதற்காக அமெரிக்கா தாராளமாகப் பயன்படுத்தி வருகிறது.
மறுபுறம் அமெரிக்கா விதித்த பொருளாதாரத் தடைகளை மீறி, ஈரானிய வர்த்தகர்களுக்குத் தன் துறைமுகங்களை வாசல் திறந்துவிட்டு, அவர்களுக்குத் தூதரகக் கவசமாக ஓமன் செயல்பட்டு வருகிறது. ஒருபுறம் அமெரிக்காவின் ராணுவக் கூட்டாளியாகவும், மறுபுறம் அமெரிக்காவின் பரம எதிரியான ஈரானுக்குப் பொருளாதாரப் பாதுகாவலனாகவும் ஓமன் நடத்தும் இந்த ‘இருதலைக் கொள்ளி எறும்பு’ ஆட்டம் தற்போது உச்சக்கட்டத்தை எட்டியுள்ளது.
டிரம்பின் எச்சரிக்கைக்குப் பின்னணி என்ன?
ஹார்முஸ் நீரிணையில் ஈரானும் ஓமானும் இணைந்து பாதுகாப்புடன் கூடிய புதிய ஷிப்பிங் வழித்தடங்களை உருவாக்கியுள்ளன. மேலும், உலகப் பொருளாதாரத்தை முடக்கிவிடக் கூடாது என்பதற்காகக் கப்பல்களுக்கு ‘கட்டணமில்லா நுழைவு’ (Toll-free entry) முறையை ஓமன் கொண்டுவந்துள்ளது. அமெரிக்காவின் ஆதிக்கத்திற்குச் சவால் விடும் வகையில் ஈரான் மற்றும் ஓமான் இணைந்து மேற்கொள்ளும் இந்த ராஜதந்திர நகர்வுதான் டிரம்பை ரத்தக் கொதிக்க வைத்துள்ளது. ஹார்முஸ் நீரிணை அமெரிக்காவிற்குச் சொந்தமானது என பகிரங்கமாக முழங்கும் டிரம்ப், ஓமன் மீது குண்டு மழை பொழியும் என்றும் பகிரங்கமாக எச்சரித்துள்ளார்.
ஒமானின் ராஜதந்திரப் பதிலடி: மெர்கல் முறை!
அமெரிக்காவின் இந்த அதிரடி மிரட்டலை ஓமன் எவ்வாறு எதிர்கொள்ளப் போகிறது? அரசியல் ஆய்வாளர்களின் கணிப்புப்படி, ஓமன் எப்போதும் போல வெளிப்படையாகக் கோபத்தைக் காட்டாமல், அமைதியான ஆனால் வலிமையான ‘மெர்கல் முறை’ (Merkel Method) ராஜதந்திரத்தைக் கையாளும் என எதிர்பார்க்கப்படுகிறது.
பகிரங்க வார்த்தைப் போர்களைத் தவிர்த்துவிட்டு, திரைமறைவில் அமெரிக்க வெளியுறவுத்துறை அதிகாரிகளுடன் ரகசியப் பேச்சுவார்த்தை நடத்தி பதற்றத்தைத் தணிக்க ஓமன் முயலும். மேலும், அமெரிக்காவின் மத்திய கிழக்கு ராணுவத் தளங்கள் ஒமானையே முழுமையாகச் சார்ந்துள்ளதால், டிரம்பின் இந்த மிரட்டல்கள் வெறும் அரசியல் மிரட்டல்களாகவே (Rhetoric) முடியும் என்று நம்பப்படுகிறது.
வல்லாதிக்க நாடுகளின் ஆதிக்கப் போருக்கு மத்தியில், நடுநிலையைக் காப்பாற்ற முயலும் ஓமானின் இந்த ஆபத்தான கயிறு மற்றும் நெருப்புக் களம், உலகப் பொருளாதாரத்தின் எதிர்காலத்தையே தீர்மானிக்கும் சக்தியாக உருவெடுத்துள்ளது!
நம்பிக்கைத் துரோகத்தின் உச்சம்: எதிர்ப்புகளைக் கடந்து தபாலில் வாக்களித்த டொனால்ட் டிரம்ப்!