பிரிட்டனில் விவசாயி ஒருவர் சுமார் 1,300 கிலோ எடையுள்ள பிரம்மாண்ட பூசணிக்காயை வளர்த்து கின்னஸ் உலக சாதனை படைத்துள்ளார்.
ஹாம்ப்ஷயர் பகுதியைச் சேர்ந்த தாவர நர்சரி உரிமையாளரும், பல ஆண்டுகளாக பிரம்மாண்ட பூசணிக்காய்களை வளர்த்து வரும் விவசாயியுமான இயான் பேட்டன் (Ian Paton), இந்த சாதனையை நிகழ்த்தியுள்ளார்.
அவர் வளர்த்த பூசணிக்காய்க்கு தனது மகனின் பரிந்துரையின் பேரில் “Bagheera” என பெயரிடப்பட்டுள்ளது. “The Jungle Book” கதாபாத்திரமான பாகீராவின் பெயரிலேயே இந்தப் பெயர் சூட்டப்பட்டுள்ளது.
1,295.8 கிலோ எடை!
2026 அக்டோபர் 3-ம் தேதி, இங்கிலாந்தின் பெர்க்ஷயர் பகுதியில் நடைபெற்ற Wargrave Nursery Giant Vegetable Weigh-off போட்டியில் Bagheera பூசணிக்காய் அதிகாரப்பூர்வமாக எடை போடப்பட்டது.
அப்போது அதன் எடை 1,295.8 கிலோ என பதிவானது. அதாவது 2,856 பவுண்டுகளுக்கும் அதிகமான எடை கொண்ட இந்தப் பிரம்மாண்ட பூசணிக்காய், கின்னஸ் உலக சாதனையில் உலகின் அதிக எடை கொண்ட பூசணிக்காயாக அங்கீகரிக்கப்பட்டுள்ளது.
இந்த சாதனையை Great Pumpkin Commonwealth அமைப்பு உறுதி செய்துள்ளது.
தனது சொந்த சாதனையையே முறியடித்தார்!
கடந்த 2025-ம் ஆண்டு இயான் பேட்டன் தனது இரட்டை சகோதரர் ஸ்டூவர்ட் பேட்டனுடன் இணைந்து வளர்த்த “Muggle” என்ற பூசணிக்காய் 1,278.8 கிலோ எடையுடன் உலகின் அதிக எடை கொண்ட பூசணிக்காய் என்ற சாதனையை படைத்திருந்தது.
தற்போது 1,295.8 கிலோ எடையுள்ள Bagheera மூலம் தனது முந்தைய சாதனையை இயான் பேட்டன் முறியடித்துள்ளார்.
இதன் மூலம் முந்தைய சாதனையை விட சுமார் 17 கிலோ அதிக எடையுள்ள பூசணிக்காயை அவர் உருவாக்கியுள்ளார்.
தினமும் 6 மணி நேரம் உழைப்பு!
இந்த ஆண்டு இயான் பேட்டன் தனியாகவே பூசணிக்காய்களை வளர்த்துள்ளார். அவரது சகோதரர் ஸ்டூவர்ட் 2025-ம் ஆண்டு உலக சாதனை படைத்த பின்னர் ஓய்வு பெற்ற நிலையில், இயான் தொடர்ந்து தனது சாதனையை மேம்படுத்தும் முயற்சியில் ஈடுபட்டார்.
குறிப்பாக இரண்டு மாதங்களுக்கு தினமும் சுமார் 6 மணி நேரம் பூசணிக்காய் தோட்டத்தில் பணியாற்றியதாக அவர் தெரிவித்துள்ளார்.
பிரிட்டனில் இந்த ஆண்டு நிலவிய கடுமையான வெப்ப அலைகளையும் சமாளித்து, பசுமைக் குடிலில் பூசணிக்காயை வளர்த்துள்ளார்.
வெப்பநிலை 40 டிகிரி செல்சியஸ் வரை உயர்ந்த நாட்களில், பூசணிக்காய் செடிகளுக்கு தினமும் சுமார் 590 லிட்டர் தண்ணீர் வரை வழங்கப்பட்டதாக கின்னஸ் உலக சாதனை நிறுவனம் தெரிவித்துள்ளது.
3,000 பவுண்டு இலக்கு!
தற்போதைய உலக சாதனையுடன் திருப்தி அடையாமல், எதிர்காலத்தில் 3,000 பவுண்டு எடையுள்ள பூசணிக்காயை வளர்ப்பதே தனது அடுத்த இலக்கு என இயான் பேட்டன் தெரிவித்துள்ளார்.
Bagheera பூசணிக்காயிலிருந்து 2,600-க்கும் மேற்பட்ட விதைகள் சேகரிக்கப்பட்டுள்ளதால், எதிர்காலத்தில் மேலும் பிரம்மாண்டமான பூசணிக்காய்களை வளர்க்கும் வாய்ப்பும் அவருக்கு உள்ளது.
தற்போது உலக சாதனை படைத்த Bagheera, இங்கிலாந்தின் ஹாம்ப்ஷயர் பகுதியில் உள்ள Sunnyfields Farm-ல் அக்டோபர் மாத இறுதி வரை பொதுமக்கள் பார்வைக்காக வைக்கப்பட உள்ளது.